Jiena nemmem fl-Ispirtu s-Santu, l-Ispirtu tal-Verità.   Dan huwa r-ruħ u l-ħajja ta’ Kristu u l-Knisja.    Jekk  Alla  huwa  wieħed,  anki  l-Knisja  jeħtieġ  li tkun  waħda, bi Kristu Ġesù bħala Kap.   Is-setgħa li tirrenja ġiet mogħtija  minn  Kristu  lil  Xmun  Pietru.    Bħala  l-blata ewlenija,  Pietru ngħata l-infietaħ tas-Saltna biex jgħaqqad u jħoll.  Bħala soċjetà dan hu mportanti għall-Knisja biex tmexxi infallibilment is-segwaċi tagħha.  B’xorti tajba hu Alla li jmexxi l-Knisja, u Huwa nfallibli u ma jistà jiżbalja qatt.

Il-Knisja hi 'Kattolika' li tfisser 'universali' għax Ġesù qal lid-dixxipli biex imorru jgħallmu u jkunu xhieda tiegħu mal-ġnus kollha.   Dan ma jfissirx li l-kattoliċi biss jmorru l-ġenna, għaliex din mhi monopolju ta’ ħadd.   Alla biss jaf x’hemm f’ruħ il-bniedem.   

Il-Knisja hi Qaddisa  għax min waqqafha hu Qdusija            u ħallielha l-meżżi kollha biex il-poplu jkun jista        jitqaddes - is-Sagramenti.    Il-bnedmin huma kollha midinbin, iżda Ġesù nnifsu offra lil Missieru t-tpattija għan-nuqqasijiet tal-bniedem, billi ġarr fuq spallejh il-piż tad-dnubiet ta’ l-umanità .   L-għan tas-Sagramenti hu  biex meta nidinbu nkunu nistgħu nerġgħu nakkwistaw mill-ġdid il-grazzja t’Alla.

Il-Knisja hi Appostolika.  Kull razza, kull soċjetà, kull nazzjon, kull għaqda, jrid ikollhom min imexxiehom.  Kull min imexxi għandu bżonn oħrajn biex jgħinuh.   Ġesù hu l-Kap tal-Knisja li ħatar lil Pietru biex imexxieha.  "Xmun! Xmun! Ara,  ix-xitan  riedkom  f’idejh  biex  jgħaddikom  mill-għarbiel bħall-qamħ; imma jiena tlabt għalik, biex il-fidi tiegħek ma tiġix nieqsa.   Inti mbagħad, meta terġa' lura għas-sewwa, wettaq lil ħutek"  (Lk 21, 31-32).    Ħafna jaħsbu li r-reliġjonijiet  u  d-denominazzjonijiet huma kollha l-istess f’għajnejn  Alla.     Il-Kardinal Ratzinger,  fid-Dokument  tiegħu  dwar  Ġesù  Kristu jgħid: "Kull reliġjon, kull  denominazzjoni għandha fiha xi verità , imma l-verità fl-intier tagħha kollha tinsab biss fil-Knisja Kattolika."                                                                 

Il-Kredu jfakkarna fil-kliem tal-Bibbja fejn insibu li biex nevitaw id-dnub irridu naħsbu  fuq  il-Mewt,   il-Ġudizzju  Universali,   il-Ġenna  u   l-Infern.    Għalhekk għandna nżommu dejjem f’moħħna li lkoll kemm aħna nappartjenu  lix-Xirka  tal-Qaddisin u f’dawk li diġà  huma  salvi  u  qed jitolbu għalina.   Niftakru wkoll f’dawk l-erwieħ li jinsabu fil-Purgatorju li filwaqt li għandhom bżonn it-talb tagħna biex jissaffew mill-aktar fis minn ħtijiethom,  huma  wkoll  jitolbu  għalina quddiem Alla.   Irridu nfittxu li fil-ħajja tagħna nimitaw lill-Qaddisin u nitolbu l-interċessjoni tagħhom biex ngħixu ħajja tajba biex bħal ma għamlu huma aħna wkoll immorru ngawdu l-hena ta’ dejjem fis-Saltna ta’ Kristu.

It-Tieni Parti: Is-Sagramenti

Il-bniedem hu dik l-unika kreatura misterjuża li għandha moħħ biex taħseb u tibdel id-dinja.    Minħabba l-libertà li Alla ta lill-bniedem,  din  hi  l-unika  kreatura  li  hi  kapaċi tagħmel it-tajjeb u l-ħażin.  Alla qatt ma abbanduna lill-bniedem u għaldaqstant Ġesù tagħna is-Seba’ Sagramenti.   Peress li jaf kemm aħna fraġli, s-Sagramenti huma mibnija fuq il-ħajja umana.  

Il-bniedem jitwieled u għalhekk Ġesù ried li jagħtina  twelid spiritwali permezz tal-MAGĦMUDIJA.  It-tarbija għandha bżonn ħafna nutriment u mħabba biex tikber f’saħħitha.  Alla jrid li jagħtina mħabbtu u l-għajnuna kollha biex nikbru spiritwalment u għalhekk Ġesù tagħna s-Sagrament tal-GRIŻMA.  Il-bniedem għandu  bżonn  li  jikkomunika  ma’  oħrajn  biex  jibqa’  f’sensieh.  Ġesù  jaf  li għandna bżonn nitkellmu dwar il-problemi spiritwali li niltaqgħu magħhom.  Għal din ir-raġuni, tagħna s-Sagrament tar-RIKONĊILJAZZJONI (il-Qrar).   Taħseb li l-bniedem jistà jgħix mingħajr ikel u xorb?  Tistà r-ruħ tgħix mingħajr ikel u xorb?  Ġesù ried li jitmagħna b’Ġismu stess u b'Demmu bħala xorb fl-EWKARISTIJA.   Il-bniedem jeħtieġ li jkollu t-tama fil-futur u jemmen fil-ħajja eterna  ta’  tgawdija  meta  jħalli  din  id-dinja.   U biex jilħaq dan il-għan jeħtieg li jħalliha mingħajr dnub.   Anki hawn Ġesù ħaseb fina bit-twaqqif tal-GRIŻMA TAL-MORDA.   U minn dan naraw kif Ġesù ħaseb għalina mill-bidu tat-twelid tagħna sa ma nkunu lesti li nħallu din id-dinja.

Imma l-Iben t’Alla ried li jieħu ħsieb ukoll il-ħtiġijiet ta’ l-umanità.   Ried li jkollu sehem fit-tisħiħ tas-soċjetà billi jħares il-bżonnijiet spiritwali fl-għaqda ta’ bejn ir-raġel u l-mara, u dan insibuh fis-Sagrament taż-ŻWIEĠ.  Fiż-żwieġ Ġesù ried li jqaddes il-ġisem tal-koppja  li  tkun  qed  tiżżewweġ.  Peress li jaf li fin-natura tiegħu l-bniedem dejjem ifittex dak li hu spiritwali waqqaf l-ORDNI SAGRI.

Fit-twaqqif tas-Sagramenti Ġesù ma wżax xi maġija jew affarijiet ikkumplikati. Irrikorra għall-aktar affarijiet ordinarji u komuni bħal ma hu l-ILMA, element biex tinħasel ruħna.   Uża ż-ŻEJT fi tlett Sagramenti.   Iż-żejn minn dejjem kien jintuża mill-gwerriera biex isiru aktar qalbenin u għalhekk insibuh fil-GRIŻMA ta’ L-ISQOF.   Iż-zejt kien jintuża wkoll bħala element tas-sbuħija u għalhekk jindilku bih idejn is-saċerdoti waqt l-Ordinazzjoni.  Kien jintuża wkoll għall-fejqan ta’ bosta ġrieħi u mard, u għalhekk jintuża fil-GRIŻMA TAL-MORDA.  L-importanza  tal-ħobż  ħadd  ma  jiċħadha.    Fis-Sagrament  ta’  l-EWKARISTIJA  Ġesù  uża  l-ħobż u  l-inbid għax kif kienu jgħidu l-Lhud "fejn m’hemmx inbid m’hemmx ferħ."