U issa wasal Mejju,

Jum l-omm niċċelebraw,

U meta jiġi Ġunju,

Fuq il-missier naqraw.

Taħdem, tħabrek tul il-ħajja,

Imħabbitha hi bla qies,

Tħobb bil-bosta lil uliedha,

Tal-familja hija s-sies.

Kull filgħodu jrid ibakkar

Biex imur jaqla’ l-għijxien

Ħalli jmantni lill-familja,

Huwa żgur mhuwiex għażżien.

Tqumlek kmieni, tibda taħdem,

Xitwa w sajf dejjem fil-ħin,

Tipprepara għall-familja

Ikel tajjeb tassew bnin.

Il-ġurnata ma tkunx faċli,

Għax problemi jkollu żgur,

Wara l-ħidma u t-tbatija

Mal-familja d-dar imur.

Fid-dar tagħha dejjem sejra,

żgur mhemmx għażż, l-anqas tnikkir,

Hi tinfexx fix-xogħol, fil-ħidma,

Fil-ħasil, tfarfir, tisjir.

X’ħin l-ulied ikunu magħhom,

Qalbhom bl-hena tibda tfur,

Jieħdu ħsiebhom u jfissduhom,

Għaliex dawk tal-ħajja l-fjur.

Sbejħa l-għaqda tal-familja,

Omm, missier w anki wlied,

Bejta ħelwa, kollha mħabba

Fejn hemm paci, mhux inkwiet.

Mel’isimgħu x’qed ngħidilkom,

Ħudu tiegħi dal-parir,

Ħobbu ’l ommkom u ’l missierkom,

Qatt tagħtuhom dispjacir.

NOTA TAD-DIREZZJONI:

F’din il-poeżija, Violet Cassar, li issa saret kontributriċi regulari ta’ dan il-fuljett, għaqqdet  flimkien, kif tant hu xieraq, Jum l-Omm u Jum il-Missier. Dawn il-jiem niċċelebrawhom fix-xhur ta’ Mejju u Ġunju. Id-Direzzjoni tal-Fuljett tingħaqad ma' Violet li ddedikat din il-poeżija tagħha lill-ommijiet u lill-missirijiet kollha b’apprezzament għal tant sagrifiċċji li jagħmlu għal uliedhom u li għalhekk ħaqqhom kull rispett.