Apprezzament

 Grazzi  Dun  Ġużepp…

Nhar il-Ġimgħa, 13 ta’ Frar li għadda, filgħodu kmieni, il-qniepen tal-parroċċa ħabbrulna l-mewt ta’ Mons. Dun Ġużepp Vella li propju f’lejliet il-festa titulari ta’ Kristu Re f’Lulju tas-sena l-oħra beda l-missjoni tiegħu bħala Kanonku tal-Kapitlu tal-Katidral.   Huwa kellu 66 sena.

Għalkemm Dun Ġużepp ftit ħadem direttament bħala saċerdot fil-parroċċa  tagħna, huwa  dejjem  baqa’ jħoss ruħhu bħala  Pawlist.    Kien  bniedem  ferħan,  kemm  f’żogħżitu bħala membru ta’ l-Azzjoni Kattolika, fis-Seminarju  u  wisq aktar  fil-ħajja  saċerdotali tiegħu.    Kien ukoll dejjem pożittiv fl-atteġjamenti tiegħu lejn il-ħajja anki fl-aħħar xhur tal-marda tiegħu, meta kien jaf li riesaq lejn it-tmiem ta’ ħajtu.

Kemm  ilu   li  spiċċa  minn  kappillan (għamel żmien fil-Kalkara, f’Ħaż-Żabbar u f’Ħal Luqa) Dun Ġużepp kellu ħafna kuntatt mal-parruċċani tagħna, mhux biss ma’ dawk li jattendu fil-Knisja ta’ l-Erwieħ, fejn  kien  iservi,  iżda  wkoll  ma’ dawk kollha li jiltaqa’ magħhom fit-triq jew ħdejn il-workshop.   Lil Dun Ġużepp nibqgħu nħossuh magħna kuljum għaliex kien hu li ħadem is-sistema biex mil-kampnar il-qniepen jħeġġuna għall-bxara t-tajba.   

Grazzi Dun Ġużepp għal dak kollu li tajtna!