IL-KATEKIŻMU  TAL-KNISJA  KATTOLIKA

Jispjega  Fr Tito Sammut

Il-Kredu ta’ l-Appostli u dak ta’ Niċea fihom it-tagħlim li kull Kattoliku għandu jkun jaf.   Din hi l-ewwel parti ta’ din l-ispjega li tkompli fil-ħarġa li jmiss.

IT-TRINITÀ - Il-Missier, l-Iben u l-Ispirtu s-Santu  - huma tlett persuni, iżda ALLA wieħed.   Dan hu misteru, iżda nistgħu nifmuh.   Kull persuna fid-dinja hija differenti minn oħra, iżda l-persuni kollha fid-dinja għandhom natura waħda - dik umana.   Alla hu l-istess tlett persuni differenti, iżda natura waħda - dik Divina.   Meta Alla ħalaq il-bniedem, Hu qal: “Ejjew nagħmlu l-bniedem xbieha tagħna”.   Skond San Ġwann  “Kristu kien il-Verb Divin li bih sar kollox”.  

Kristu  miet  biex  isalva  l-bnedmin.    Ħafna  mietu  msallbin bħal Kristu, iżda ħadd minnhom ma setgħa jsalvana.  Kristu salvana għax hu Alla.   It-tlett persuni flimkien ħadu sehem fil-fidwa tagħna.  Kristu kellu bżonn ġisem bħal tagħna li kien konċeput f’Marija bil-qawwa ta’ l-Ispirtu s-Santu.   Meta Ġesù miet Hu offra ħajtu lil Missieru bħala rahan għalina minħabba li konna skjavi tad-dnub.   Alla l-Missier aċċetta l-offerta ta’ Ibnu u tagħna ċans ieħor biex nistgħu ningħaqdu miegħu fis-sema.

Alla qatt ma abbanduna lil bniedem għax dan kien il-kapulavur tar-raġuni.   Ħadd fid-dinja ma jista’ jsib l’Alla, iżda dan ma jfissirx li Alla ma jeżistix.   Ix-xewqa li jsib l’Alla hi minquxa f’qalb il-bniedem li sa mill-qedem fittex allat biex iħarsuh.    Skond l-Antik Testment kien Alla stess li wera min Hu meta talab lil Abraham imur fil-post li wrieh biex isseħħ il-wegħda li għamel lil Adam u Eva.  Meta Alla ħalaq il-bniedem tah il-libertà mhux biex jagħmel dak li jrid hu, iżda biex jagħmel it-tajjeb biex isalva ruħu. Alla jikkontrolla kollox barra l-libertà, għalhekk jippermetti l-ħażen li l-bniedem  jagħżel.   Alla hu ġust, ħanin, jagħder u jaħfer, iżda l-bniedem li jagħżel il-ħażen lanqas Alla ma jkun jista’ jsalvah.

Marija hi dik il-mara li Adam u Eva semgħu biha fil-ġnien ta’ l-Għeden meta Alla qal lis-serp: “Jiena nqajjem mibgħeda bejnek u bejn mara, bejn nislek u nisilha, u hu jisħaqlek rasek u int tisħaqlu għarqubu”.    Il-Kardinal Newman kiteb ħafna dwar il-Madonna u l-Misteru ta’ l-Inkarnazzjoni.   Alla ma riedx li Marija tkun skjava tad-dnub oriġinali għax kellha tkun dik il-Verġni li ġġib fid-dinja lil “Magħna hu EL”.   Il-kelma "EL" tfisser qawwa u poter u l-Lhud kienu jużawha fl-ismijiet li taw lil Mulej.  

Marija kienet Omm Alla għax Kristu kellu natura Divina u natura Umana u dawn iż-żewġ naturi kienu f’persuna waħda.  Hi aċċettat li ssir Omm is-Salvatur bil-qawwa ta’ l-Ispirtu  s-Santu.     F’Marija l-Missier  ried  juri  lil  bnedmin kollha li l-bniedem ma kienx maħluq biex imut.   Kien id-dnub li daħħal il-mewt fid-dinja.   Għalhekk Hu daħħalha s-sema bir-ruħ u bil-ġisem biex tkun Miegħu, ma’ l-Ispirtu s-Santu u ma’ Ibnu Ġesù li kien ukoll binha.

Il-mewt  ma kelliex  poter fuq Kristu.    Huwa qam mill-mewt  għall-ħajja u miegħu tella’ s-sema lil dawk l-erwieħ twajba li kienu qed jistennew il-fidwa.   Kristu għad jerġa' jiġi fil-glorja biex jagħmel ħaqq mit-tajbin u mill-ħżiena.   Sakemm jasal dak il-jum, l-Ispirtu s-Santu bħala difensur tal-”Ġisem ta’ Kristu” (Knisja Waħda, Qaddisa, Kattolika u Appostolika), jkompli jaħdem biex jgħaqqad f’komunjoni waħda 'l dawk  li  hemm  fis-sema, fil-purgatorju u fuq l-art.    Hu jgħin  bis-Sagramenti u t-Tagħlim tal-Knisja lil dawk li jridu jsalvaw, sakemm tispiċċa d-dinja.   It-tajbin imorru jgħixu ma’ Alla u l-ħżiena jmorru fejn hemm il-biki u t-theżżiż tas-snien għall-eternità.