KUMMENTI    U   TRUFIJIET

Ippermettuli  nfakkarkom...

Ftit taż-żmien ilu konna tkellimna dwar l-atteġġjamenti tagħna waqt il-funerali.   Jien bqajt inkun fuq iz-zuntier anke matul din is-sena u erġajt ħassejt il-bżonn li nagħmel riflessjoni oħra dwar dak kollu li jiġri fil-funerali.   Niżgurakom li dak li qed ngħid mhux qed ngħidu biex nikkritika, iżda għax naħseb li l-funerali għandu jkollhom kull tip ta’ serjetà jekk nemmnu f’dak li jkun qed isir.   Kemm inħossni mewġġa’ meta nara nies jidħqu u jiċċaċċraw bejniethom għaliex ilhom ma jiltaqgħu; kemm inħossni rrabjat meta nara nies tal-familja jew ħbieb qegħdin ipejpu qisu ninsabu f’ħin ta’ ntervall; kemm niddejjaq meta nara xi wħud jużaw il-mobile f’nofs il-folla!  

Żgur li dak il-ħin mhux intervall fejn wieħed jieħu nifs qabel ma jasal biex ikompli l-kedda li jmiss, jiġifieri d-difna…  Nifhem li xi tip ta’ kondoljanzi jridu jingħataw, iżda żgur li mhux f’dan il-ħin meta s-saċerdot ftit qabel ikun bierek u inċensa dak il-katavru qabel ma jmur għad-difna.

Min-naħa l-oħra ninnota li s-solidarjetà bejnietna f’mumenti ta’ niket qegħedha dejjem tiżdied, u dan hu pożittiv ħafna bħal ma huwa pożittiv ukoll il-fatt li ħafna nies jixtiequ li flok fjuri jingħataw donazjonijiet ta’ karità li jkunu siewja ħafna aktar mill-fjuri.   Nieħu gost ukoll meta fuq iz-zuntier nara nies li minnflok jieħdu l-bukketti magħhom fuq il-qabar, jħalluhom quddiem is-Sagrament jew fuq l-Artal.    Jiena smajt li l-Awtoritajiet tad-Djoċesi se jagħmlu proposti dwar il-funerali….   Dan ikun ferm aħjar.   Nittamaw li ma jdumux ma jkunu f’idejna…..