IL-KARNIVAL  TA'  MALTA

Il-Karnival hu festa folklorista qadima  li fi żmien ir-Rumani  kienu jiffestiġġjawha fi tmiem l-istaġun tax-xitwa u biex jilqgħu bil-ferħ dak tar-Rebbiegħa.   Mhux kulħadd jaqbel kif tnisslet il-kelma “Karnival” .  Il-Professur Aquilina u Erin Serracino Inglott   isostnu  li  hi  magħmula  minn  żewġ  kelmiet Taljani  “carne” u “vale” li jfissru “laħam jiswa”.   Studjużi taljani jagħtu diversi tifsiriet oħra.   

Il-Karnival ta’ Malta kif nafuh illum, iċċelebrat matul it-tlett ijiem ta’ qabel Ras ir-Randan, hu wieħed mill-eqdem fl-Ewropa.  Jingħad, għalkemm hemm min ma jaqbilx ma’ dan, li l-Karnival ġie ntrodott f’pajjiżna mill-Kavallieri ta’ San Ġwann fis-sena 1535 għalkemm il-poplu Malti iffesteġġjah għall-ewwel darba fl-1560 fl-inħawi tal-Kottonera.   Kien għal ħabta tas-seklu 18 li l-Karnival f’Malta laħaq il-qofol tiegħu minkejja li ħafna kienu jqisuh bħala l-festa tax-xitan.   Iżda taħt il-ħakma ta’ l-Ingliżi, l-Karnival mar lura u kien biss fl-1926 li reġa’ ħa r-ruħ u beda jiġi organiżżat fuq livell nazzjonali mill-gvernijiet tal-ġurnata.

Minn wara l-gwerra il-qofol tal-Karnival kien jintlaħaq fit-toroq ewlenin tal-Belt Valletta u kien ikun hemm parteċipazzjoni qawwija fil-kompetizzjonijiet taż-żfin b’kostumi mill-isbaħ u bil-karrijiet b’temi komiċi.   Mas-snin il-karrijiet trijonfali u l-kostumi ħadu dimensjoni oħra.  Kibru fid-daqs u fl-ispettaklu tant artistiku li bdew joffru.  Il-barranin li jżuruna f’dawk il-ġranet kollha jibqgħu msaħħra mill-kapaċitajiet u l-ħila tal-karristi Maltin.

Matul il-ġranet tal-Karnival fil-ħwienet tal-ħelu jispikkaw il-prinjolata u l-perlini.     Dawk li jbiegħu fit-toroq, partikularment fid-daħla ta’ Bieb il-Belt, jippikaw fil-bejgħ ta’ maskri, blalen u kpiepel ikkuluriti, trumbetti u kull ħaġa li tagħmel il-ħoss.  Issib ukoll varjetà ta’ pistoli ta’ l-ilma li ż-żgħażagħ jixxalaw bihom jimbxu lil kull min jgħaddi minn quddiemhom.

Ħafna jħarsu lejn il-Karnival bl-ikreh minħabba xi abbużi li jsiru.  Imma m’għandniex inħarsu lejn dawk il-ftit li  jitilfu s-sens ta’ responsabiltà.  Din għandha tkun festa tal-poplu li matulha jinsa xi ftit mill-problemi ta’ matul is-sena u jgħin biex il-familji jingħaqdu flimkien biex  jiddevertu f’ambjent ta’ maturità u ferħ.