INT  MISTIEDEN ... TISKOPRI!

KATEKEŻI  GĦALL-ADULTI

Albert Galea

 Kordinatur, Komunità Ċelloli Parrokkjali

Dan kien it-titlu ta’ serje ta’ ħames laqgħat ta’ Katakeżi Parrokkjali ta’ l-Adulti li ġew organiżżati fil-Parroċċa tagħna bejn Ottubru u Diċembru 2003.  L-iskop tagħhom kien li jilħaq lill-adulti, għax kull ma tmur qed iżjed u iżjed tinħass il-ħtieġa li tingħata formazzjoni adulta.

Attendew dawn il-Katakeżi  madwar 120 ruħ, rispons inkoraġġanti ħafna minn lajċi li xi wħud huma mpenjati b’mod jew ieħor fil-parroċċa.   Dan wera li l-lajċi attivi jħossu bżonn tat-tagħlim ukoll, għax jifhmu kemm hija bżonnjuża l-formazzjoni personali.   Ħadna ferm gost ukoll naraw  xi wċuħ ġodda.

L-iskop ewlieni ta’ dawn il-laqgħat kien li tingħata Katakeżi bażika biex tgħin lil dak li jkun jissoda fil-fidi.  Fid-dinja ta' llum, li tkun nisrani jfisser li l-lajk jifhem aħjar il-vokazzjoni tiegħu fid-dinja, billi l-fidi tiegħu tkun mibnija  fuq tagħlim u formazzjoni biex “jkun lest li jagħti tweġiba għat-tama tiegħu”  (ara t-2 ittra ta’ San Pietru) fil-familja, fuq il-post tax-xogħol, f’postijiet ta’ divertiment u anke fuq il-media meta hawn ħafna u ħafna parteċipazzjoni tal-poplu fuq programmi tar-radju u t-televiżjoni.  Fi ftit kliem, l-iskop ewlieni ma kienx biex iżjed nies jidħlu fl-għaqdiet  jew biex ikun sar “xi ħaġa”.  Kienet opportunità biex in-nisrani jirċievi formazzjoni  aħjar li tgħinu fil-ħajja personali u fir-rwol li għandu fis-soċjetà.  Xtaqna biss li kull min jattendi jiskopri aħjar is-sejħa personali tiegħu.

Il-temi li ntagħżlu huma relevanti ħafna għas-sitwazzjoni tal-lum.   Il-kelliema kienu esperti fis-suġġetti li ngħatawlhom kif ukoll kapaċi joħolqu diskussjonijiet u dibattiti.

Fl-ewwel tema,  IT-TIFSIRA  TAL-ĦAJJA  LLUM, Mons Ġorġ Deguara  tkellem fuq l-iżvillup tar-reliġjonijiet u x’sens fiha r-reliġjon fil-ħajja llum.

Patri Pawl Cremona O.P., fit-tieni laqgħa, tkellem fuq  IL-PJAN TAS-SALVAZZJONI  T’ALLA  U  L-BNIEDEM.  B’lingwaġġ popolari u mexxej,  wera kif il-pjan tas-salvazzjoni huwa pjan ta’ mħabba li għadu jiżvolġi llum fil-ħajja ta’ kull wieħed u waħda minna. 

Fit-tielet laqgħa, Fr. William Axiaq O.F.M. Cap. wera, mill-esperjenża li għandu, kemm il-bniedem illum qed jagħmel minn kollox biex jikseb il-kuntentezza u l-vera paċi u ferh.  It-tema kienet  IR-RISPOSTA  TAL-BNIEDEM  LIL  ALLA.

It-tema:  X’RILEVENZA  GĦANDHA  L-KNISJA  LLUM?, ittrattha Dun Renè Camilleri.   Bla tlaqliq huwa spjega kif il-Knisja għadha u tibqa’ relevanti fiż-żminijiet tal-llum skond kif twieġeb għall-kulturi differenti fi ħdanha, u minn kemm il-lajċi sejrin ikunu ffurmati u attrezzati f’ministeri u rwoli differenti.  Spiċċa ż-żmien fejn wieħed seta’ jserraħ rasu fuq il-kleru biss!

L-aħħar laqgħa żvolġiet fuq  IL-BŻONN  LI  NAGĦTI  KAŻ  MADWARI,  minn Dun Ġorġ Dalli.  Huwa spjega li ma nistgħux nibqgħu nisimgħu biss, jew inkunu sempliċiment spettaturi fil-bankijiet tal-Knisja.  Jinħtieġ li kulħadd jerfgħa r-risponsabiltà tiegħu jekk verament irridu nkunu xhieda ta’ Ġesù fil-ħajja kollha tagħna. 

Il-laqgħat ma kienux monologu tal-kelliema, iżda l-ħin tqassam billi qabel u wara l-kelliem, il-parteċipanti setgħu jagħtu l-opinjoni tagħhom fuq is-suġġett, jagħmlu interventi permezz ta’ mistoqsijiet, diffikultajiet u anke kritika kostruttiva.  Il-parteċipazzjoni u l-esperjenzi ta’ kull min ħa sehem għenu mhux ftit biex il-Katakeżi jkunu ta’ suċċess .

Il-laqgħat intemmu fit-12 ta’ Dicembru, bil-Kappillan Fr. Noel Vassallo jiċċelebra l-Ewkaristija għal parteċipanti kollha fil-post fejn saru l-laqgħat, is-sala tal-Paola Youth Centre. Fl-omelija kulhadd ingħata ċ-ċans li jesprimi dak li laqtu f’dawn il-Katakeżi.

Irridu nirringrazzjaw lis-Sorijiet tas-St Joseph fejn kien ippjanat li jsiru l-laqgħat iżda li kellna nibdlu l-post wara l-ewel laqgħa minħabba li n-numru kien akbar milli stennejna.  Grazzi kbira ukoll lid-direzzjoni tal-Youth Centre li ħallew il-post għad-dispożizzjoni tagħna.  Radd il-ħajr kbir wkoll lil-Kappillan li kien ta’ support kbir speċjalment bil-preżenaa tiegħu f’kull laqgħa.  Dan għen biex dawn il-Katakeai tal-Adulti jkunu verament parrokkjali.

Matul din is-sena, il-Komunità ta’ Ċelloli  Parrokkjali, ukoll diversi Għaqdiet u Movimenti fil-Parroċċa, joffrulek opportunita’ biex tiġi u tisma l-Kelma t’Alla u/jew tagħlim ieħor.

GĦALFEJN  MA  TAGĦMILX  RIŻOLUZZJONI  FIL-BIDU  TA’  DIN  IS-SENA BIEX  META  TITĦABBAR  XI  INIZJATTIVA  FIL-PARROĊĊA  MA  ŻŻOMX LURA  U  TERSAQ  INTI  WKOLL?

Nistednuk li ma tieqaf qatt tiskopri l-fidi tiegħek ...