Stazzjon  tar-Radju  għall-Komunità  Pawlista

POWER FM  90.4

F’dawn il-ġranet f’Raħal Ġdid rajna inizjattiva ġdida li hi żgur ta’ min ifaħħarha għax tista’ tħalli ħafna ġid kemm materjali kif ukoll spiritwali.   Qed nirreferu għat-twaqqif ta’ Stazzjon tar-Radju ġdid "POWER FM 90.4".

Staqsejna lis-Sur Emanuel Spiteri li hu d-Direttur u Station Manager kif ġietu l-ideja biex iwaqqaf u jħaddem dan l-istazzjon u qalilna:  "L-ideja kienet ilha tberren f’moħħi għax dejjem emmint li f”Raħal Ġdid għandu jkollna Radju Komunitarju bħal ma hemm f’lokalitajiet oħra biex mhux biss iferraħ u jgħaddi tagħrif lill-Pawlisti iżda biex iżomm kuntatt ħaj mal-kumplament tal-gżira Maltija."

Is-Sur Spiteri kompla jgħidilna li POWER FM qed ixandar mill-Istudios f’54 Sammat Street, Paola fuq frekwenza 90.4 FM.   Id-DJs u x-xandara fuq dan l-Istazzjon huma nies stabbiliti u professjonali fil-qasam tax-xandir.   L-għan ewlieni hu li POWER FM ma jdumx ma jkun wieħed mill-aqwa ilħna komunitarji fil-pajjiż.

Meta staqsejna lis-Sur Spiteri dwar min jista’ jieħu sehem, bla tlaqliq wieġeb li dan hu "stazzjon miftuħ għal kulħadd."   Se jxandar programmi li fihom se jkunu mistiedna l-għaqdiet kollha f’Raħal Ġdid – dawk li jaħdmu fil-Volontarjat; fis-Soċjetajiet Filarmoniċi; dawk soċjali u edukattivi; fil-qasam sportiv u fil-qasam reliġjuż.   Il-Parroċċa ukoll se tkun tista’ ssemma l-leħen tagħha permezz tal-Kappillan u membri oħra tal-Kleru.   L-unika ħaġa li se tibqa' barra se tkun il-Politika għax għal din hemm diversi postijiet oħra. Fil-jiem li ġejjin se jkollna wkoll taħdidiet mal-Kunsill Lokali Paola dwar is-sehem tiegħu fuq l-istazzjon.    Is-Sur Spiteri enfasiżża li l-ispazju tax-xandir fuq POWER FM hu vast ħafna.

Is-Sur Spiteri jemmen li kulħadd jista’ jagħti sehemu biex dan l-Istazzjon ikun tagħna l-Pawlisti, partikularment tal-ħwienet billi jirriklamaw il-prodotti u s-servizzi tagħhom lill-komunità Pawlista.    Dan jista’ jsir b’kuntatt mas-Sur Spiteri fl-istudios f’54 Sammat Street jew fuq il-mobile nru  99871163.   Is-Sur Spiteri jemmen li “bdejna biex nibqgħu.   U żgur se nibqgħu!”.