IL-PARROCCA  MATUL  IS-SENA  LI  GHADDIET

 Raymond Attard B.Eng. (Hons)   Eng. Surv.

SINDKU - Kunsill Lokali Paola

Il-kollaborazzjoni bejn kulħadd hija ħaġa tajba fiha nnifisha.  Meta wieħed jara x’għamel dan il-Kunsill biex jgħin lil kull Għaqda fil-lokal, wieħed malajr jinduna li kien hemm skop wara dan il-mod ta’ tmexxija.

L-iskop prinċipali kien li bil-kollaborazzjoni ta’ kulħadd, wieħed jkun jista' jasal aktar bil-mezz ta’ kommunikazzjoni bejn kulħadd, inżidu l-parteċipazzjoni ta’ kull Għaqda u kull ċittadin li verament għandhom l-interess tal-lokal, mingħajr ma nidħlu f’piki esaġerati.

Bħal ma hu konxju kulħadd, il-parroċċa torganizza attivitajiet varji matul is-sena kollha.  Fost l-attivitajiet hemm, fiera b’risq il-knisja; wirja tal-Ġimgħa Mqaddsa; serata ta’ l-isbaħ kostum tal-karnival; mejda tal-Appostli u tant attivitajiet oħra.  Mhux l-ewwel darba li l-Kumitat tal-Festa talab għajnuna lill-Kunsill biex diversi attivitajiet ikunu jistgħu jiġu mtella'.  Il-Kunsill dan jagħmlu għax jaf li hemm il-parteċipazzjoni tar-residenti u għax il-Kumitat tal-Festa jkun qiegħed ikompli jkattar il-kultura ġewwa l-lokal.

Ezempju ċar ta’ dan kien l-għajnuna li ta il-Kunsill liż-Zgħazagħ Azzjoni Kattolika (Z.A.K.) biex itellgħu attivita’ waqt ic-celebrazzjoni tal-Festa Liturgika ta’ Kristu Rè f’Novembru li għadda.  Kienet serata mill-isbaħ u ta’ min ikompli jinkoragixxi dan it-tip ta’ attivitajiet.

Jien wieħed minn dawk li nemmen li Jum Paola għandu jkun mtella' mill-Għaqdiet, bil-kollaborazzjoni tal-Kunsill.  Wara kollox, Jum Paola mhux għar-residenti tiegħu qiegħed?  Din is-sena l-Kunsill pprova jagħmel dan.  Kienu diversi Għaqdiet li taw sehemhom, inklużi z-Z.A.K., li wrew li l-għajnuna li tahom il-Kunsill kienet ġiet apprezzata.  Iz-Z.A.K. qegħdin jgħinu lill-Kunsill biex jinġabru flus biex jinxtara wheelchair għal dawk in-nies fil-lokal li għandhom bżonn dan l-apparat.  Kien hemm ukoll Għaqdiet oħra li għamlu dan u wrew, bic-car, il-kollaborazzjoni li teżisti bejn il-Kunsill u l-Għaqdiet.

Wieħed ma jistax ma jsemmix l-festa.  Bħal ma jaf kulħadd, il-festa għaddiet u marret tajjeb, però, ma nistgħux niefqu hawn.  Hemm ħafna affarijiet oħra xi jsiru u fejn wieħed jiddiskuti.  Naqbel perfettament ma’ dak li kiteb is-Supt. R. Vella Gregory fil-ħarġa preċedenti tas-Saltna.  Għad hawn min ma fehemx l-iskop aħħari ta’ kull festa – parteċipazzjoni tal-lokal kollu f’ġabra waħda.  Għandna nassiguraw li bl-għemil tagħna ma ntellfux il-gost ta’ ħaddieħor, speċjalment dak tat-tfal żgħar li minn sena qabel jkunu qegħdin jistennew jasal żmien il-festa.  Kull min kellu xi forma ta’ responsabbiltà fl-organizazzjoni tal-festa jaf ix-xogħol li jinvolvi u għalhekk iktar u iktar wieħed għandu jaħdem biex jara li l-festa tkompli titjieb minn sena għal sena.

Waħda mill-aktar affarijiet li qiegħed jaħdem fuqha l-Kunsill huwa l-Ġemellaġġ.  Wasalna fi ftehim ta’ ħbiberija ma’ Calcinaia, post viċin Pisa ġewwa l-Italja.  Dawn riedu jagħmlu dan il-ftehim minħabba li l-ewwel knisja fil-lokal taghna kienet ddedikata lil Sant’Ubaldeska, patruna tal-villaġġ taghhom.  Il-Kunsill qiegħed jipprova jagħmel Gemellaġġ ma’ żewġ postijiet li wkoll jisimhom Paola, wieħed ġewwa l-Italja u l-ieħor fl-Amerika.  Dawn il-Gemellaġġi jservu biex insiru nafu aktar dwar postijiet oħra u biex it-tfal tagħna jkunu jistgħu jkabbru l-kultura tagħhom, speċjalment kif wieħed iħares lejn popli oħrajn.

Nawgura li l-koperazzjoni li kien hemm bejn l-awtoritajiet parrokkjali u l-Kunsill Lokali matul is-sena li ghaddiet tkompli tissahhah fis-snin li gejjin ghall-gid tal-Pawlisti kollha.