Quilala ye y "Siquit-siquit"?

 

"Wam, tu, tri, por…"

 

Casican na boses Mr. Aguilar.  Mr. Rafael Aguilar, mestro niya queng P.E. 'niyang first year.  Matas ya y Mr. Aguilar, matas yang matuling.  Macapal ya labi, kalabi yang Negro. At malapad ya canuan. Calacad yang bibi. Tauli ya buldit… balamu misusubsob ya.  Pero maganaca ne man.  Mahilig yang mamatacut, ampong magpacaili.  "Agui" yng aus mi caya pache e na daramdaman.

 

First period miya yng P.E. Aldo-aldo. Boom, boom, boom… Pache e mamilang pagulisac y Mr. Aguilar, ytang tambol yang manibabo.  Acalinguan cu ne nung ninu yng magtambol.  Y Enrique Gamboa yata.

 

Abe-abe cami quing first period.  Atlu o apat a seccion.  Maranun.  A las siete y media, umpisa na na ning first period.  Roll call.  Deng section one, pambilisan nong Mr. Aguilar, "Naydana, bagsic ning alhambra blanco, atlung David…"  Deng patungculan na canita ri Edwin Aldana, Reyanaldo Bagsic, Felizardo Blanco, at deng atlung David quing seccion mi- Alejandro, Wilfrido at Vergel.

 

Lunis, Medio malulam at marimla.  Maibug muran.  Pero migpila que pa mu rin quing quilual, harap na ning main building.  Ytang grounds carin a maqui dicut.  Macapalibot pun agoho at nara.  Atin pang sirang eroplano carin canita… malapit quing bacud na ning high school.  Balamu pine tree la reng agoho.  Matalic lang mañinat potang matatagtag la neeldles.  Quing high school cu minunang menaquit pun nara… maragul at mamunga la. Deng butol da atin lang pacpac… ba lang macasaque hangin at tumubo la nung misuertian lang dugpa queng mabasang gabun.

 

Calisthenics.  Boom, boom,boom. "Eksersais namber wan… wan, tu, tri…" Macapagal mu rin ing calisthenics. Macapanical.  Daig na pa yng aerobics ngeni… uling e mu balu nung capilan ya tucnang queng "rrrripit" na y Mr. Aguilar.

 

"…siks, payb.. Istap!" Tinucnang yang mamilang.  Pinulis ne yng canuan na queng gamat na… linawe ya banua.  Lilintik na! "Class, let's go the basement." Pulayi.

 

Basement.  Detang classroom a maqui opisina da reng mestro quing lalam ning main building.  Yng cang Mr. Aguilar metung ya caretang bandang cayli… nung macaharap ca main building.  Bandang libutad na ning left wing.  Caracal mi.  Calati na ning basement.  Ala pang luclucan. Nilucluc kami queng cemento.  Lunis.  Bayu ya pang alili yng uniporme cung khaki shorts at maputing t-shirt.

 

E cu na balu nung nanu ing balak nang iturong  Agui canita, pero magdala yang stick… at ken yang harap blackboard.  E cu comportable king puesto cu… mangasicu cu kareng casiping cu.  Mabubuysit cu.

 

"Ayyyy…. Macanian, siquit-siquit… cascup!"

Mipasican ata yng pamagbuwisit cu… dimdam nacung Aqui.  "Aaaahh, mascup? Dagul ca pang bagya mascup no reng panintunan mu, siquit-siquit!"

 

Manibat canita, yng aus na cacung Mr. Aguilar "Siquit-siquit."

 

"Hoy siquit-siquit", queni ca magtambol ca!"

 

 

Danilo Galang