Inosu Enkatini

Paul T. ole Toimasi

East African Publishing House

Enkiterunoto

Ore enkewan ena buku naa pee eisho inkera meisuma inkatinini dorropu neyiolou irorei ngejuko. Ore tenkareke irorei oogol, neitagol intukusi oo rorei. Neyieuni olmalimui neitengen lelo rorei eton eitu eisum enkatini. Eitodoluno kulo rorei te nkitingoto embuku. Eata enkatini enkitengenata enye, nenadkino teneinosaki olmalimui inkera dupoto enye.

Inkatinin Natii

Oltome oe Nkitejo 1

Esidai o Louaru 3

Entito Kambene 5

Intoyie Onguan Sidan 8

Oikurto oe Nkitejo 11

Oingojine 0 Sikiria 13

Ntuli Isiet 15

Olmurrani Olkiteng Loloiboni 17

Entasat Olkiteng Lenye 20

Entito Olmangati 22

Enkatini e Impiti 24

Entito Nalo Olpul 26

Enkukuu oo Lukuny Isiet 28

Emotonyi Olmurrani 30

Enkatini e Ntemelua 32

Enkatini e Njore 34

Entito o Lainyamok 36

Oingojine o Enkijejo o Louaru 38

Enkatini Olmurrani oe Njore 40

Olasurai Oltungani Olkarbobo Oloikuma

Irorei Ngejuko 43

Oltome oe Nkitejo

Netii apa, Netii Oltome oe Nkitejo. Nelo enkitejo aisampash tembata olkeju oruko. Ore enoshi kata egira aton tembata enkare, nedolu Oltome elotu. Neitaakuno Enkitejo anaa enoshi naata osina sapuk oleng.

Nebaiki Oltome enetii Enkitejo nejoki, "Naikitejo, anaaijo iton tembata olkeju aisinanuo?" Nejoki Enkitejo; "Entoki naaitalang ele keu atala, amu etua apa papa o yieyio olalashara lainei pooki niaku nanu ake naishu". Nejoki Oltome Enkitejo: "Tijinga enkoriong ai maitalanga olkeju aya lido kekun."

Neipidoki Enkitejo enkoriong oltome te nchipai sapuk oleng. Nenapita duo Oltome enaisho oo lotorokte nkoriong naya enkang e nkapute. Ore ake peyie eked Enkitejo enkoriong Oltome nedol enaisho natii olbene neiteru anya. Ore enoshi kata einosita, neitongake olkenkei enkoriong Oltome Neikilikuan Oltome Enkitejo ajoki; "Naikitejo, kainyoo doi naitongaka enkoriong ai?" Nejoki Enkitejo, "ilkiyio laainei".

Neitalang Oltome Enkitejo olkeju nejoki tadou. Nejoki Enkitejo peyie eigutie amu keya enkeju. Neingurrie Oltome nenap aya enkop nalakua oleng. Ore eloito, nenya enkitejo enaisho, neitoki adoiki enkiti aisho enkoriong Oltome Nejoki Oltome "Naikitejo kainyoo doi naaitongaki enkoriong ai?" Nejoki enkitejo, "ilkiyio laainei". Negira Oltome

Nenya ake Enkitejo enaisho ometaraposhoyu. Nejoki Enkitejo Oltome meitadou te nkoriong amu etabaiye duo eueji nelo. Ore ake peyie edou Enkitejo, neipirri arem osimeendua amu etumuta duo enaisho Oltome Nelo ake Oltome enkiti ueji, nening enkoriong ajo etenenenga. Nejo aitayu olbene aingura nenyorriki etumuta duo Enkitejo. Negoro oleng, neibelekenya asujaa Enkitejo. Neiposha aingoru nelau, neshuko aio aingoru enkae aisho.

.40

 

Esidai o Louaru

Netii apa, netii Esidai o Louaru. Naa kenyorra apa oleng, netoni tenebo tenkata naado oleng. Neiriamaki pokira are aisho.

Ore enoshi kata aa kutiti inkuoo, nenya inkiyoitin Olouaru ilpepedo. Neidaaya pooki temuoyian. Ore inkiyiotin Esidai naa kepir oleng nesipa iseseni lenye. Nelo Olouaru aikonyarie Esidai inkuoo enyena. Neishir Esidai oleng inkiyioitin enyena.

Nelo aipotu inkulie nguesi meetu aajoki Olouaru metushukoki inkuoo enyena. Neipotu Oloitiko, neureyu

Oluouaru, nejo inenyena inkuoo. Neipotu Emuny, Olmeut, Olkonde, Olbitir, Olngojine, nejo pooki ino Louaru inkuoo, amu keure aatejo ine Sidai inkuoo. Neipot Esidai inguesi pooki, neureyu pooki Olouaru.

Nelo Esidai aipotu Karbobo. Nejoki Karbobo Esidai. "Shomo ingoru olkiu oodo oleng, oata ingumot onguan, nabo natii enchumata o uni natii imbat. Nimpot inguesi pooki meetu enkiguana tembata ele kiu" Nelo Esidai aingoru olkiu netum, neipotu inguesi pooki meetu enkiguana tentonata ele kiu. Nelotu sii ninye Oluouaru, nenapita inkuoo Esidai. Neishirita Esidai tenkaraki natooruo Olouaru inkiyiotin enyena.

Neponu inguesi pooki aasoto tembata olkiu. Negira inguesi pooki aininingu enajo Karbobo.

Nebuak Karbobo to ltoilo sapuk nejo "Nanguesi kuna, itoningo aikata intae eniopir naiu ene papit?" Nebuak inguesi pooki tenebo nejo, "Eitu!" Neitoki Karbobo ajo; "Itodua aikata intae enepapit naiu eniopir?" Nejo inguesi pooki "ERT Nejo Karbobo, "Mus indaai amu ine Sidai inkuoo" Nedoiki Karbobo enaduo gumoto natii enchumata olkiu. Neipidoki Olouaru neibung enkidongoe, Nejo Karbobo, "Hae oloibunga entonai ejo nanu" Neingueki Olouaru neibung entonai. Neipang ninye Karbobo tenkae gumoto eitu eduaya Olouaru. Nekueite Esidai inkuoo enyena eibungita Oluouaru entonai neitu eduaya eneimie. Neton Olouaru arreshu Karbobo meipangu te ngumoto o meewa olameyu teine meyiolo ajo eipanga apa Karbobo.

Entito Kambene

Netii apa, nepuo intoyie entim aitayu ilamuriak. Nejing

intoyie oerata oasur oleng. Netii isanagi sapuki oleng

oomisimis atua. Nejo intoyie maitayu ilamuriak ooto oleng.

Neidapashakino intoyie isanagi aasotu ilamuriak.

Nesotu ilamuriak kumok oleng neiput ilkarash. Ore enoshi

kata esotu, nedol entito nabo enkongu e nkukuu erok tiatua osanag. Nejo, "Nele olamurlaki lai orok oleng". Nejo tauapu intayu, nengamaa enkukuu aibung enkaina nejoki. "Nakerai mikidany enkongu ai". Neirut entito oleng, nejoki, "oi! imaadany."

Neibung enkukuu entito nenangaki olbene. Nejoki, "Kaanya anaa kaitaa enkerai?" Nejoki entito, oi intaake enkerai. Neikenoo enkukuu entito tiatua olbene o metaa kewarie.

Neipangunyie Enkukuu entito kewarie tiatua osanag. Nelo aitamanaa too nkangitie aingoru endaa nanya. Neiter enkang e dukuya neipotisho tiauluo. Nejo. "Natomonok enchooke endaa" Nejokini "Imikiata." Nejoki enaduo tito natii olbene, Kambene iroro". Nerany Kambene osionkolio ajo;

"Mara nanu entito Kambene,

Kara entito e Kamugie,

Yieyio lai natungayie anyor,

Papa lai latungayie anyor,

Ol enkukuri ai oo ntikiya,

Nalepie anaji Tipipi ai".

Ore ake peyie ening olorere osinkolio le nkerai, neboluni neishore kole metooko. Neipang teina ang nelo enkae ang. Neruk inkangitie kumok oleng. Naa ore ake peiyie eipotisho ena Kukuu nejoki Kambene iroro. Nerany Kambene osinkolio lenye neishore endaa.

Nerukoo apake ena Kukuu inkangitie, omeshomo enkang ena tito. Netayioloki apa aajo enkukuu naawa enkerai, netoningoki sii aajo emanaa ena Kukuu too

nkangitie aingoru endaa. Ore peyie ebaiki enkishomi eina tito neipotisho tiauluo. Nejo, "Natomonok enchooki endaa", Nejoki Kambene iroro. Nerany Kambene osinkolio lenye. Neyiolou menye o ngotonye enkerai enye. Nejokini enkukuu intasho penyo matalep inkishu peyie kincho iyie kole.

Nelo ngotonye entito nepej osoit opurupurana te nkima. Ore ake peyie edoru te nkirouaj, nelo abolu enaduo Kukuu. Nejoki ngotonye entito Enkukuu; "Aimutie eitu aabolu amu, aata naaji emoti naiyara oo ronkena. Neaku ninye atangasa aio adotu. Ou inosa eronkai nabo amu eoto." Nerik enkukuu aji nejoki" Tanga taa enkutuk maitadoiki eronkai amu tenimbug nepurda." Nenga Enkukuu enkutuk oleng. Neitadoikini oladuo soit oiroua atua ilgoso. Ore tenkarake eului e Nkukuu, neimurgutaa nabo kata. Nelo osoit apej imonyit. Neisik Enkukuu aosh olpaashe eishirita. Neinguaa entito tenkang enye. Neishiraa omeshomo anang ongata.

Intoyie Onguan Sidan

Netii apa, Netii kuna toyie onguan. Naa enkang nabo namanya, pooki, nerisio pooki teinoto, naa sidan pokira onguan. Ore nabo olong, neishankarra pokira onguan

eorro esidano. Netii apa entito nabo nadanya enkongu. Nejo pooki, ore entoki narish iyiook, naa tenikipuo aikilikuanisho peyie elikini iyiook esidai aisul inkulie.

Nedumunye pooki aapuo enkikilikuanare. Neinepu intasati nejoki; "Noo yieyio, kaa tito esidai aisul iyiook pooki?" Nejoki intasati, "ena paa kedanya enkongu." Nepuo aingua intasati neinepu ilpayiani nejoki; "Loo papa, kaa tito esidai asul iyiook pooki?" Nejoki ilpayiani, "ena paa kedanya enkongu." Nepuo nenangare ilmurran. Nejoki; 'To

murran, kaa tito esidai aisul iyiook pooki?" Nejoki ilmurran, 11 ena paa kedanya enkongu." Nepuo neinepu ilayiok nejoki, "Laayiok, kaa tito esidai aisul iyiook pooki? Nejoki ilayiok, 11 ena paa kedanya enkongu." Neinepu sii ninche inkulie toyie neikilikuan. Nejoki pooki ena paa kedanya enkongu.

Ore peyie eyiolou kuna toyie aajo ena tito nadanya enkongu esidai alang pooki negoro oleng. Neiguana nejo kiar ena tito nadanya enkongu metua. Nepuo netum engumoto olbitir. Nejo, matijing pooki ena gumoto peyie kinguraa tenaa keiting. Nejo inaduo toyie pokira uni, maitabayie ena tito nadanya enkongu paa ore ake peyie ajing nikinukaa.

Neiteru entito nabo ajing engumoto. Nejoki inkulie, "Keitingo?" nejo ninye "Eitu," "Keitingo?" Nejo "Eitu" "Keitingo" nejo, "Eitu". "Keitiningo?" nejo "Ee". Nejokini tushukunye. Neiko neijia inkulie toyie pokira are. Nejing enaduo tito nadanya enkongu. Ore eikilikuanishore inkulie, neyao ake osoit sapuk, neibelelengoki enkutuk engumoto; neitoki aanukaa tenterit. Nejo ade enaduo tito tupuku tiatua engumoto nelau eneimu. Neshir tiatua engumoto nedoru nkonyek, nenya esumash oleng.

Neton tiatua engumoto neaku ilkarash lenyena enya aitaa endaa. Ore peyie eshuko intoye ang Neikilikuane enetii, nejo imikiyiolo. Neingoruni ometalai enetii neji inkukuni nainosa.

Neata menye ena tito nadanya enkongu olkiteng sapuk oibor loltuala. Naa keji enkarna ele kiteng Parkusi. Nenyor apa ena tito ele kiteng oleng. Nenyorru sii ninye ele kiteng ena tito oleng. Ore nabo olong, nelo ele kiteng akur enkop tenkutuk enapa gumoto natii entito. Nening entito

olkiteng lenye eipur neyiolou. Nejo "Parkusi, le papa taboluoki, Parkusi le papa taboluoki." Nening olkiteng oltoilo tiatua engumoto, neyiolou ajo olenapa tito enye. Nekur olkiteng enkop, nekur, niar too mouarak omeinepu osoit. Ore enoshi kata peyie eoshi inkishu, neji kiboinaa olkiteng niany elo. Kelo ake penyo neshukunye akur enaduo ueji. Neingasia iltungana ore peyie ebaikini ine, neningi, oltoilo le ntito ejo; "Parkusi, le papa taboluoki, Parkusi le papa taboluoki". Neibelelengoo ilpayiani osoit otii enkutuk engumoto. Neitayuni entito etaa keya olameyu, neinosa apa inkilani nemut. Neriki ang, neishiraki ngotonye oleng. Neidongi inapa toyie naashomo anukaa tengumoto.

Olkurto oe Nkitejo

Netii apa, Netii Olkurto oe Nkitejo, naa inchorueti apa oleng. Ore nabo along nejo, maitobiru inkajijik peyie kinguraa esidani.

Neitobiru inkajijik pokira sidan oleng. Ore ake peyie eidip, nejo maape aashil peyie kiyiolou esidai aisul. Neiteri enkaji Olkurto neshil ake nedol aajo aisidai. Nepuku nepuo aashil. Nedol ene Nkitejo. Nedol Olkurto ajo aisidai enkaji e Nkitejo oleng alang enenye. Nejing Olkurto enkaji Enkitejo niany eipangu, nejo kemany aitaa enenye. Negoro Enkitejo oleng, kake eturia aipangunyie Olkurto tenkaji enye. Nelo aishiru inkulie nguesi.

Nelotu Olngatuny nejo "Kainyoo natii enkaji e ntitio

eyieyio nado kiyiaa emanyata. Nejo Olkurto

"Naanu olkinosinosi le nkang ole Kiondo, niyiolo Ole

Nkaina eneba napupu aitaa emodiei" Ore ake peyie ening Olouaru ina, neisik aio. Nelo Enkitejo aipotu inguesi pooki; Eipotuo Emuny, Olkanchaoi, Olmeut, Osirua, enkoilii, Olbitir, Oloitiko oe Mbarie. Neureyu pooki aipangunyie Olkurto tenkaji Enkitejo. Neishir Enkitejo oleng. Nelo aipotu enkalaoni nelotu nejo; "Kainyoo natii enkaji entito e yieyio nado kiyiaa e manyatta," Nejo Olkurto "Naanu olkinosinosi le nkang ole Kiondo, niyiolo Olenkaina eneba napupu aita emodiei".

Nejo Enkalaoni, eji ngae? Neigil Olkurto ajo enaduo ake.

Neipidoki ake Enkalaoni neony! Nejo Olkurto "Oi nanu Kurto nanyore nkik! Oi nanu Kurto nanyore nkik!" Neipangu aingua enkaji e Nkitejo.

Oingojine o Sikiria

Netii apa, neidurri te nkang, neinguare osikira moruo tolmuate lemeekure eidimari. Ore tara nelotu Oingojine, neinepu ele sikiria te mbata e kishomi. Nekuet aman olmuate ekueni, nemanaa a meeu enaauo kishomi. Neinepu oladuo sikiria ake, neiken ajo oare. Neitoki amanaa aigil, neinepu oladuo sikiria ake, neiken ajo okuni. Neman olmuate aigil katitin isiet, nejo kenoto isirkon isiet. Nejo aime taa doi oshi kamunyak, enkeju imaitagol.

Nekuet ailepaki enchumata olosho aipotisho, Nejo, "Uuu! Uuu! Otii ngumot! Otii ildoinyio! Eishunye! Nena endaa nainosa ongata. Nekuetu iingojinia pooki tenebo o Mbariak.

Nejoki oLngojine ilkulikae anoto isirkon isiet tolmuate. Nerik enetii oladuo sikiria obo. Neinosi ilo eitu ninye ebaiki toki. Nejokini koree duo ilkulikae sirkon? Nejoki, emataman olmuate amu ebore. Nemane olmuate nelai. Neshukokino iingojinia oladuo ngojine oteleja neinosi aamut.

Ntuli Isiet

Netii apa, netii entasat naji Nyuli Isiet, nemeidimari teneidurri. Ore nabo olong, neji keidurri aapuo enkae ang. Nejo kaji taa nanu aikunari nemaidimari. Nejokini totona peyie kimooki inkera aayaki kole.

Nepuo ilkulikae tungana aaidur neinguare aa ninye ake tolmuate. Ore peyie ekenyu, neponu inkera entito enye aayake kole. Nerany aajo;

"Yieyio ]ai Ntuli Isiet,

Nemeidimari teneidurri;

Yieyio lai tabolu iyiook." Nejo entasat;

"Kuum enemandirridir,

Kuum enemandirridir,

Nkera enkerai ai,

Eton apake aishu".

Nebolu inkera, nejing inkera aji, neisho kole neoroki enkaji. Ore peyie eidip nepuo enkang enye. Neaku keponu ake inkera anaake aayaki koko enye kole. Ore nabo olong, neirrash enkukuu ena tasat. Nelotu aitaakuno anaa inoshi kera naayaki kole. Kake eitu ebolu entasat amu aisapuk olgos lenye imetiu anaa iloonkera. Ore peyie ekenyu, neponu Inkera. Nejoki entasat eeuo duo enkukuu ajo anya. Neisho inkera kole neoroki enkaji, neshuko aapuo ang. Ore apake peyie elaikino ena kukuu ainosa ena tasat, nelo oloiboni. "Nejoki oloiboni, inchoo enkolong nilo aingoru ena tasat anya, niminya ake ilmoilak, amu ninche oshi likirrid ilgoso. Nias enkukuu anaa enatiaka oloiboni. Nelo olmuate otii entasat nejo,

"Yieyio lai Ntuli Isiet,

Nemeidimari teneidurri,

Yieyio lai tabolu iyiook". Nejo entasat;

"Kuum enemandirridir,

Kuum enemandirridir,

Nkera enkerai ai,

Eton apake aishu."

Nebol kutukaji. Nengamaa enkukuu anya. Nejo inkera kiponu, neinepu koko enye einosa enkukuu. Nepuo aalikioo tiang aajo etua.

lit--- AIL

 

AI,

Olmurrani Olkiteng Loloiboni

Netii apa, netii ele murrani, nelo apurru inkishu naayieng. Naa ninye ake openy tolpul. Nelo ayieng ilmongi tenkapune sapuk oleng natii atua entim. Nenya apa ele murrani inkiri nepushuo oleng. Ore olkekun oyingisho, nengarie inkiri iingojinia olmotonyi. Nemoku iingojinia olmotonyi niaku imelamari teine. Neingorune apa ele

murrani te manyata nelai enkop natii, amu imeata apa oltungani otolikio enelo.

Ore nabo olong, nelo ele murrani empurrorre. Neinepu inkishu oloiboni, netii olkiteng arus opir oleng, laa ninye oisul inkishu pooki tempiron o te sapuko. Nemishira ematua e tatene oe ne kiedianye. Neboinaa olmurrani ele kiteng ometerewa enkapune enye. Nenangaa ayieng, neponu ilngojiniaa olmotonyi arreshu inkiri enye. Ore ake peyie eidip olmurrani ateyianga olkiteng nenangaki iingojinia olmotonyi inkiri. Nemokuno apa kuna nguesi o ele murrani oleng. Niaku tenedol nemeipirri, nemiar sii ninye ele murrani ninche.'

Ore ina olong napurroo ele kiteng lo loiboni, nepuo ilchekuti olkiyioi, aajo etupurroyioki olkiteng. Nejoki oloiboni iltungana meshomo aasuj. Nepuo iltungana ometijinga entim naasur oleng. Ore ake peyie ebaiki embata e nkapune, nedolu ilmotonyi iltungana, neoshiosh inaipuko too Ikeek paa kejo; "Keerr! Keerr! Keerr!" Nening olmurrani etii enkapune paa keipangu nejo;

"Kainyoo naiseyie llkurragoso lainei layiangaki isakito oo lairakuj emuto. Naa Ololoiboni ele kiteng, Nesira enchoto ekedianye, Naa neijia etiu enetatene. Nikira ilainosak lele kiteng Okuni, nanu, oe Nkeiwua 0 Samolilo enkeju netayoo duo lelo sanagi

Naa nele nanu sarge ongu otii oloikar"

Ore ake peyie eining iltungana olmurrani ejo neijia, neureyu ebaiki neshuko. Nepuo aishiru ilmurran. Nening ake sii ninche ilmurran ele tungani ejo neijia, neureyu ebaiki. Neshuko sii ninche aapuo ang.

Neingoru oloiboni Intoyie are sidan oleng naisul enkop. Nejoki enchom engurai ele murrani. Nekusi ake inaduo toyie paa keriki enetii ele murrani. Ore ake peyie ebaiki embata enkapune neoshiosh ilmotonyi inaipuko neipangu olmurrani te nkapune. Nerany oloshiake sinkolio lenye. Kake eitu ening intoyie, nepuo ake ometabaiki enkapune. Nejo ake olmurrani tamaniki Intoyie, nerua. Nengamaa intoyie aibung enkoriong. Ore ake peyie eishunye empushuna, nerik intoyie enkapune aisho inkiri. Netoni tolpul o metumuta inkiri. Neriku intoyie olmurrani emanyata, nelaakini oloiboni olkiteng lenye.

1 W

I All,

Entasat Olkiteng Lenye

Netii apa, Netii ena tasat modooni. Neata olkiteng opir oleng, nenyor ele kiteng lenye oleng. Neingoru enkeene naado, neeniki emurt olkiteng nelotu aeniki enkeju enye, ejo peyie tenelaari neiyolou.

Ore nabo olong neponu ilmurran aapurroo ele kiteng. Nedungu enkobei sapuk, neeniki enkeene, nereo olteng. Neitu esioki entasat ayiolou ajo etupurroyioki olkiteng, teipa ade etayiolo pee eliki inkera aajoki enkobei naenikino enkeju.

Neipot entasat entitio enye nejoki, "imbungaki entirma matusuj olkiteng lai." Neibung orrekie lo lkiteng, nedol entito imodiok nejoki, "noona imodiok olkiteng lang." Neisho

entasat meibunga. Nejoki entasat maape. Nepuo ake ometodua entito inkulak olkiteng. Neliki entasat, neisho meibunga. Nejoki entasat maape. Nepuo ake omeineipu eneteyiengieki olkiteng neliki entito entasat, neisho imoyok meibunga. Nejoki entasat, maape, Nepuo ake ometodua entitio ilmurran. Nejoki entasat, "noolo ilmurran oo waita olkiteng lang." Nejoki entasat matinyikaki.

Nedolu ilmurran entasat elotu, nejokini metotona. Neton ake, nenangaki ilmurran enkaya. Nerany nejo;

"Kiti mayieu enkiringo oo ntasati, alda siyiayio hoo hoo Murgut ena Kiti nayieu ae! Alda siyiayio hoo hoo!

Nenangakini iloilelek; nejo mayieu eneroyie lmongi enkop alda siyiayio hoo! hoo! Murgut ena kiti nayieu ae alda siyayio hoo! hoo!

Neishori inkiri pooki nemut ake murgut nayieu ae. Nejoki ilmurran, kainyoo doi eton iyieu? Nerany nejo;

"Ayieu olbarrikoi le polos alda siyiayio hoo! hoo! Onare osiririm empolos, alda siyiayio hoo! hoo! Nenare olosinko tenedung, alda siyiayio hoo! hoo! Nenare osinkolio tenerany alda siyiayio, hoo! hoo!

Ore ake peyie ening olmurrani entasat ejo neijia, neipangu ake, nengor teremet niar metua. Nerik ilmurran entito ang.

Entito Olmangati

Netii apa, netii ena tito, neimaa ilmurran enkang enye. Neisho ilmurran kole, ore pee eidip ilmurran kole, nerik entito aitarioo.

Nepuo ake, nejoki ilmurran entito tushukoyu, nejoki entito ilmurran, ashuko aa inkirragat oo nkishu ang kuna. Neitoki aapuo, enelakua oleng, nejokini natito tushukoyu, Nejo ashuko aa ildonyio le nkop ang lekua. Nepuo ake, nepuo ake, ometaa melio ildoinyio lenkop enye. Neshuko entito.

Ore enoshi kata peyie eitorit eneingua oe nkang enye, nenangare ilmangati. Nejoki ilmangati, natito kaji inguaa? Nejoki enkitario oo Imurran. Ore duo peyie eshuko entito nesuju olmurrani obo tesiadi ejo peyie tenetum enyamali tenkoitoi nemitu. Kake eitu eitodol kewan entito.

Nejoki ilmangati entito kerik enkop enye. Nejoki entito imesuj. Negoro ilmangati neibung entito ayiataa. Neyietu entito aishir. Ore enoshi kata eishirita, nebao oladuo morrani osujita. Nejoki ilmangati entapal entito entaaraki nanu. Nejoki ilmangati, ira iyie inyoo nairish iyiook?

Ore ake enoshi kata peye edol entito olmurrani nerrep nejo;

"Meekure engarrisho

Hoye hoo yiayio

Olkidali le longo,

Osira ena longo isiet,

llenkomom oonguan

Iloltesat oare

Ilenegum oare" Nejo olmurrani;

"Tito kiti Yampaine

Hoye Hoo yiayio,

Inyio ngura enaikuna

Aruk inkung teremet

Neton aruk kulekae"

Niar olmurrani iloduo mangati pooki nemut. Nerik entito enkang enye. Ore ake peyie eitabaya neshukunye ninye asujaa ilkulikae murran.

Enkatini e Impiti

Netii apa, netii ena kukuu nanya inkera naji Mpiti. Ore nabo olong nepuo intoyie aadungu ilkeek toerata oasur oleng. Neipangaki enkukuu intoyie, neibung pokira are. Nejoki kanya intae anaa kaitaa inkera? Nejoki intoyie intaa iyiook inkera. Neliki intoyie enkukuu inkarn enye, nejoki keji Siloon neji enkae Kaampalei.

Nerik enkukuu intoyie enkapune enye namisimis atua. Ore boo enaduo apune nebore iloik loo. ltungana ootumuta apa ena kukuu. Neisho intoyie inkiri oo ltungana neany, nelo apurroki olker opir oleng. Ore ake peyie ebaiki embata enkapune neipotisho ajo;

"Oo Siloon. Oo Kaampalei,

Siloon ai enkirotet too nkulie Nejo Siloon;

"Oo nene ]ai,

Nanya enaidima Shoo

Nenya enkumok nkelani

Sirkon olmeregeshi,

Nene lai."

Nengas Mpiti aingongu enkop ainguraa tenaa ketii iltungana oetuo enkapune enye. Neyiangaki intoyie enyena nepiru oleng. Ore nabo olong, nerem Siloon toltidu ainguraa tenaa ketopiro, oleng. Nejoki Siloon oi kitaremo toltidu. Nejoki Mptiti, eitu aotiki enkarai ai. Nedol enkukuu ajo etopiro intoyie oleng amu etaa eilata naimu.

Ore nabo olong metii enkukuu neponu ilmurran dama,. neinepu intoyie te nkapune. Netii olalashe kuna toyie. Nejoki

maapeiti ang. Nejoki intoyie, ore amu etaa kelotu Mpiti, entushukoto peyie iponunu aarik iyook metabaiki. Nepuo ilmurran, nebao Mpiti aa enapuoyie. Neinguaya olngusil lenye nedol iroruat. Nejoki Siloon kainyoo ele ngusil naa kenenyoo kuna roruat? Nejoki Siloon, iyiook duo naashomo

aiguran te boo nikidungu esonkoyo. Negira Mpiti.

Ore peyie ekenyu, nelo Mpiti aipotu inkukuuni enkop pooki, pee eponu aanya intoyie. Neponu sii ninche ilmurran tadekenya, nerik intoyie. Ore pee aaku kemutu, neisampashu inkukuuni te ntim ekueni te nchipai. Nejoki enkukuu enkae, imira kuna toyie e Mpiti nikipuo ade inkukuuni ena kop pooki aapukorie.

Nebao ake Mpiti embata e nkapune enye neipotisho;

"Oo Siloon, oo Kaampalei,

Siloon ai enkirotet too nkulie"

Nelau entoki nangamaa. Neigil aipotisho te kutuk aji. Nelau entoki nangamaa. Neyiolou ajo eisika duo intoyie, nejo, "Oi atayiolo oshi ake" Nelo aisudori. Nianyu inkulie kukuuni te boo nelau. Nejingaki tiatua enkapune, eisudori. Nejokini kainyoo duo peyie iteleja iyiook? Neibung inkukuuni Mpiti nenya metua.

Entito Nalo Olpul

Netii apa, nereo ilmurran olkiteng olpul. Nelotu olmurrani arik entito olpul, neinepu elepisho. Nejoki natito maape olpul. nejoki entito enchom peyie asuju intae metabaiki. Neliki olmurrani entito eueji neimu tenesuju olpul.

Ore tadekenya peyie eidipi eramatare, nedumunye entito aio asujaa ilmurran. Nelo ake, ometalanga olkeju oruko neilepaki oldoinyio. Ore enoshikata eloito, neipangaki enkukuu neibung nejoki; "Kaanya, kaanya" Neirut entito oleng nejoki, Oi mikinya Siake. Nejoki enkukuu

kaanya tenakata. Nerany entito osinkolio nejoki;

"Mikinya iyie ntueishi ai, Maape embata enkare. Maape Ketumpeine enchumata Peyie tenilo nikinya Nikinya niokisho Oo lelongo ]ai a kaji duo."

Ore taa Ketumpeine naa oldoinyio oshomo ilmurran aayiengishore. Niaku ena shorro naoku ilmurran ninye ejoki ena tito enkukuu pee epuo, ejo peyie ening ilmurran neponu aar ena kukuu. Ore ake peyie ebaiki embata enchorro, nejoki enkukuu

entito kitabaikitia embata enkare, Kaanya! Kaanya! Nejoki entito mikinya siake, maape embata enkare. Nepuo ake ore peyie eaku kebaiki embata enchorro, neibung enkukuu entito ekurrake nejoki kaanya! kaanya! Nerany entito osinkolio lenye nebuak toltoilo sapuk

oleng ejo peyie ening ilmurran nejo.

"Mikinya iye ntuaishi aishi ai, Maape embata enkare. Maape Ketumpeine enchumata Peyie tenilo nikinya Nikinya niokisho. Oo lelongo ]ai aa kaji duo."

Nening ilmurran entito erany, etii ninche olpul. Nekuetu

neinepu enkukuu etaa kejo peyie enya entito, neare metua.

Oil

Enkukuu oo Lukuny Isiet

Netii apa, nelotu olameyu sapuk oleng. Netii entim nasur oleng, naa sapuk olari tena tim. Kake imeitieu iltungana ainosie inkishu amu ketii enkukuu oo lukuny isiet naidakie apa olorere pooki.

Ore nabo olong, nejo olmurrani obo kalo ainosie inkishu ena tim. Nedumu olmurrani eremet olalem neosh inkishu. Neponu olorere aasai nejoki mireo ake inkishu ina

tim. Nejo olmurrani areo ake. Neosh inkishu tadekenya oleng. Nebaiki inkishu entim eton aa tadekenya, nenya ake inkujit, ore enoshi kata eitumurrutua, neipangaki enkukuu oo lukuny isiet, nejo.

"Kainyoo natii ena tim ai e Likia? Naisiriri ilkeek medungi" Nejoki olmurrani "Nanu Oloikirikirai empere le Tonou, Migiru nkayaitie."

Nejoki Enkukuu, Agiru, negiru. Neshutu olmurrani olalem neosh elukunya nabo nedungoo. Neisik enkukuu arem entim. Nenya inkishu inkujit nepuo ang e- taraposhote. Ore pee ekenyu, neitoki olmurrani areo inkishu entim. Neitoki enkukuu alotu, niar olmurrani nedungoo enkae lukunya. Nereo inkishu anaake ena tim. Nedung apake ilukuny lena kukuu ometaara metua. Ore ake peyie eye ena kukuu nereo iltungana pooki inkishu ainosie enapa tim ometaba anaa nesha.

Emotonyi Olmurrani

Netti apa, Netii ele murrani opi negol oleng. Neibayu ilmurran le sirit enye amu tenepuo enjore neya inkishu pooki aishaa. Ore nabo olong nepuo ilmurran enjore, netir ilmurran enkure. Netii ele moti olo olodo lenkop, nejo matook enkare telemoti. Neiter ele murrani adoiki atua olmoti, nejo ilkulikae matusulaki atua peyie kinguaa.

Nesulakini nejo aarare ailepu nelaikino.

Nepuo ilkulikae ainguaa, niarare ninye ajo ailepu

nelaikino katukul. Ore peyie eshuko ilapa murran te njore nejoki menye olapa murrani etaara apa ilmangati. Neton olmurrani tiatua olmoti, neaku ore ake pee ejo ilmotonyi kiponu aok enkare nemitiki. Nejoki pooki ake emotonyi naok enkare enaalo ake alikoo. Neponu imotonyi kumok oleng aok enkare, nelej olmurrani kake imetii aikata enashomo alikioo.

Ore nabo olong nelotu Enkolikolo, nejoki inchooki matooko enkare peyie aalo alikioo. Nejoki olmurrani ilo ajo aa? Nejo kalo ajo.

"Olmurrani loo lmongi pusi Etii olmoti le Kerikere, Inkeenta isiet, iltargeta isiet."

Nejoki olmurrani metooko enkare. Ore ake pee eidip atooko nelo enkang olmurrani. Neitashe to loip otii intasati, nerany oladuo sinkolio otolikio olmurrani Ore ake pee ening intasati, nenang emotonyi too lboro. Nelo aitashe te kishomi arany. Nening menye olmurrani, nenang olpayian neipid aio. Ore pee ekenyo, nelotu aitashe te kishomi arany.

"Olmurrani loo lmongi pusi, Etii olmoti le Kerikere, Inkeenta isiet, Iltargeta isiet"

Nelo menye ilo murrani, aingoru inkeenta isiet oltargeta isiet. Nesuj emotonyi ometabaiki olmoti. Neinepuni olmurrani etii atua enkare. Neidikidiki inkeenta oltargeta, neitadoikini atua olmoti, nejokini olmurrani metangamu aibung paa keyietuni ailepunye. Nengamaa menye angutut neishiraki. Nerik ang, nelo ayiangaki intare.

H

Enkatini e Ntemelua

Netii apa, neisho enkitok, neyiangaki olpayian lenye olkiteng opir oleng aitaki enkerai eilata. Ore teipa neyieru enkitok eilata. Ore pee ebao inkishu, neingua emoti oo ronkena eyiara nelo alepisho. Nedou enaduo kerai kiti natoiuoki aetu ironkena te moti. Nejo, "moti tinyikinyiku, aet napik imboro" Nejingu ngotonye aji neinepu enkerai eetita emoti neingasia nelo aliki olpayian lenye. Niany olpayian enyorraa, nejoki enkitok, shomo aji ingurai. Nelo olpayian ainguraa neinepu eetita emoti neingasia sii ninye. Nejoki enkitok enye peyie eidur kewarie neingua ena kerai o ntokitin enyena pooki.

Ore pee ekenyu, neinyototo Ntemelua, amu neijia eji

ena kerai. Nedumu enkukuri enye neosh, nejo enkukuri puu!

Nejoki oo pee ijo puu, nimijo Ntemelua inyio amu

kitungayioki. Neinepu enkine neosh, nejo enkine mee!

Nejoki oo pee ijo mee nimijo Ntemelua inyio amu

kitungayioki. Niar intokitin pooki, nejing enkiteng enkoshoke,

nereo aibungie enkoitoi. 1

Nenangare ilmurran nejo nena enkiteng ang, nereo olpul aayieng. Nebuluni Ntemelua tiatua enkoshoke enkiteng, neidaki olmurrani enkoriong. Neji kiosh, nemanaa aio enkoshoke, neoshi olmurrani. Nedou te nkoshoke olmurrani neisik aio, neinepu olpayian Otii shoo. Nejoki Ntemelua olpayian, papaai intaake enkerai, nejoki olpayian ayia. Nejoki olpayian, terewa ena kiteng nasaisai ang. Nereo ake, ore peyie eitabaya, nejoki intasati, etejo duo olpayian ore ake pee eiu enkiteng olashe oibor niari metua.

Ore teipa, niekilikuanu olpayian olashe le nkiteng. Nejokini anaijo duo itiaka Ntemelua teneiu enkiteng olashe oibor niariyara metua. Nejo olpayian eitu, negoro oleng. Neingoru Ntemelua ajo aar neisik aio enkop nemeyioloi.

Enkatini e Njore

Netii apa, nepuo ilmurran enjore, nedungo olmurrani enamuke. Nejo olmurrani entaanyuaki, nejoki inchoo kianyu ilesiadi. Nejoki ilmurran pooki neijia, ore pee elotu olobayie nejoki, inchoo ake pee ilotu ainepu enkoitoi natii embeneyioi niimu amu ninye eima enjore.

Neitobir olmurrani enamuke ore ake pee idip nelo asujaa ilmurran. Nebaiki eneorore inkoitoi, neinepu eewa embeneyioi asiuo, neim enkoitoi e tatene, nelo ake o meimina enkoitoi. Niaku kewarie neirrag ongata. Ore pee ekenyu, neiposha aingoru ilmurran nelau. Neiposha too loshon o meitingo osiligi.

Ore nabo olong tara, etonita tentonata olchani, nening enkitok eipot enkiteng ejo, Ou kiti Mugie, Kiti Mugie. Neinyiototo olmurrani nelo embata e auluo, neitoki enkitok aipot enkiteng. Nejo olmurrani

Aturukurukoyie apake nanu Iltaleta olmurrani lenkila oe nkopiro, 0 meau aning Kiti Mugie ai eipoti. Oi kiti Mugie Ai natii olashe olale."

Nening enkitok olmurrani eranyita, nelo aliki olpayian lenye. Nejoki olpayian, ketaa tenining imotonyi ena kop erany nijo iltungana, shomo talepisho. Nelo enkitok alepisho, neitoki aipot enkiteng. Neirukoo olmurrani tiauluo. Nelo aipot olpayian ]enye ajoki ou toningo. Neipangu olpayian, neipot enkiteng, neirukoo olmurrani tiauluo.

Nelo olpayian anapa, nedumu inareta enyena neishop enkila narok. Neipot olkiteng lenye oarisho. Nelo aitashe tembata e kishomi nejo, Kainyoo natii auluo? Nejoki olmurran, kaji naisur naimu? Nejoki olpayian:

"Tapaasha enolerai naperik, iimu eno lkinyei nalala Naa ena natarreshie ilmongi mouarak ometabaiki olelerue le kine."

Neosh olmurrani esita, nengor olpayian te remet niar metua. Neitayu enkila narok naishopito aishop. Neirrag enkag, ore pee ekenyu neosh inkishu o ntare, nerik inkituak o nkera enkop enye.

'I

Entito o Lainyamok

Netii apa, netii ena tito o lalashe lenye. Naa ninche ake eata menye o ngotonye, naa moruak oleng intoiuo, neaku ena tito nalo shoo oele murrani.

Ore nabo olong negelu ilmurran ilmongi ooreo ilpuli ejo peyie teneidip aainosa inkiri nepuo enjore. Negelu sii ninye ele murrani olkiteng opir oleng areo olpul, nelo airiamariye ilkulikae murran olpul. Neaku ena tito ake natii ang aret ngotonye nelo shoo. Neaku imeyengiyanga ena tito hoo ninye enkolong nabo.

Ore nabo olong etii shoo, neipangaki ilainyamok. Nepurroo inkishu o ntare pooki. Netii enkiteng nasaisai naji

Nkayos. Naa ninye naata kule aisul inkishu pooki. Nekuet entito omeshomo olkeju otii ilpuli loo ilmurran aingoru olalashe Nelo olpul le dukuya nejo.

"Oyie kulo lolopuru,

Koree Sekenkei orinka,

Amu etarayioki neyena,

Nerei esaisai Nkayos

Nkayos ai naiputa kole olturoto"

Nejoki ilmurran imetii ele pul. Nerukoo entito ilpuli pooki omenoto olotii olalashe lenye.

Ore ake pee ening olmurrani enkanashe eranyita, nejoki osuuji lenye iau elongo. Nejoki osuuji imaidimu, nejoki imperiperu, neiperiperu. Nejoki iyao eremet. Nejoki osuuji inaidimu, nejoki imperiperu. Neiperiperu. Neiriamari osuuji lenye aasuj inkishu. Nesuji ake a meinepu kole e Nakyos etii olturoto, nejoki olmurrani osuuji, inchamishama. Neishamisham nejoki olmurrani inetenakata. Nesuj ake, nesuj ake o meinepu ilainyiamok eibokito inkishu. Niar olmurrani ilainyamok pooki nemut. Neshuk inkishu enyena areo ang. Neshipa enkanashe oleng pee edol inkishu enye.

Oingojine o Enkitejo o Louaru

Netii apa, Netii ele ouaru, neata enkapune enye. Naa teneyieu nebol nejo. "Soit oolo" nebolo, ore pee eyeiu neiken nejo. "Soit ripa" neikeno. Naa ore ake pee ear ele ouaru intare, neyao aisudoo tiatua ena apune. Ore nabo

olong nening Enkitejo olouaru ebolito enkapune enye.

Nedol pee eitoki aiken. Nelo nabo olong metii Olouaru nejo, katem siiyie abol ena apune Olouaru. Nejo, "Soit bolo" nebolo. Nejing atua, neinepu inkiri naapir oleng, nenya ake

ometaraposhayu. Neipangu aio nejo, "Soit ripa" neripa.

Nenangare tenkoitoi Oingojine neingor ake Oingojine Enkitejo nejoki, kainyoo duo inosa amu aikinyil enkutuk niponga sii oleng. Neliki Enkitejo. Neyooki Enkitejo arik Oingojine enkapone Olouaru. Nejo "Soit bolo" nebolo nejo "Soit ripa" neripa. Nedol Oingojine inkiri kumok oleng, neiteru anya iloik, Nenya ninye Enkitejo inkiri, ore ake pee eraposho, nejoki Oingojine maape amu etaa kelotu Olouaru. Nejo Oingojine intasho penyo, matangasa agueny ele oito. Nianyu Enkitejo, neitoki Oingojine aitumurraki iloik, nejo Enkitejo. "Soit Bolo" nebolo, neingua Oingojine tiatua enkapune, nejo "Soit ripa" neripa, nelo ninye.

Neingua Oingojine, niarare abol enkapune nerikino duo enaji. Neton tiatua o meeu Olouaru ainepu. Nejoki Olouaru ae iyie oshi olotu anya inkiri ainei? Nejoki Oingojine, ime nanu. Enkitejo duo naatorikuo. Neipangie ake Olouaru, neeniki entanata olchani, niarr ake, niarr ake omeponga. Neingua einnikino olchani. Neponu kulikae ngojinia neinepu olekae eena to lchani. Nejoki, kanaijo tolchani eana? Nejoki, eilata duo natii olojongani atanya. Nejoki olngojine obo. "teenaki nanu peyie anya ina ilata". Nelaku ake neenike olekae, neisik ninye. Nelotu Olngatuny neidong oladuo ngojine, nejoki, oi inchooki nanu eilata natii olojangani. Kake eitu ening Olouaru, niarr ake Oingojine o metua.

Enkatini Olmurran oe Njore

Netii apa, nepuo ilmurran enjore. Nepuo ake, nepuo

ake ometabaiki enkop apa naar enjore. Neyiengi inkishu apa pooki nainosaa enjore nemut. Ore ake pee engou enkijiape e nkakenya, nerasaki enjore ilmangati. Niare ilmangati nereoni inkishu o ntare, kake eitu etumi inkishu kumok. Ilkuti murran ake oo notito. Netum kulikae intare.

Netii ele murrani obo, neingat ninye inkishu, nejo imareu intare emanyata. Neiposha aingoru inkishu nelau. Nejo imeshuko emanyata ometaba anaa netum inkishu. Ore enoshi kata pee esoto enjore, nejoki ilmurran imeakure eshuko aio, emanyata. Nerany nejo.

"Oloolo lai le Nkai otamoo inkejek enyena enkuatata,

Shomo iroroki yieyio lai nabaiki surri enkop eitashe,

Nyaaki roroki Enkurrukure yieyio nabaiki enkurriny enkop eitashe.

Niroroki papa lai loigisoi onyokie.

Niyiolou ajo mpetunot emperie ai napulel eturto.

Nyaake, roroke Sekerot enkeri nanyokie,

tiaki shomo Olosinko le mongi,

pee kigil ilmongi olpirankash pee mikiya tekutukaji lajuongok."

Neman enjore pooki ejo neijia nejoki ilmurran maape

pee kidungoki iyie inkishu. Nedungokini inkishu, neishore entito nabo naawa, neshuko aio emanyata airiamariye enjore.

Olasurai Oltungani Olkarbobo

Oloikuma

Netii apa, Netii kuna nguesi onguan, Olasurai, Oltungani, Olkarbobo oloikuma, naa kenyorra pooki oleng. Ore nabo olong nejo pooki maape enjore aareo inkishu. Kaae nedumunye pooki nepuo. Niaru inkishu kumok oleng. Nereo ake omeirragie olkirragarie le dukuya. Neinoki inkimaitie aitaman inkishu peyie etumoki aatorrip.

Ore tempolos e nkewarie, neinyototo Karbobo, nelo

inkima Olasurai, nejoki, "Shomo toonyo Oltungani metua

amu ninye osapuk aisul iyiook, naa ore kenya tenikior inkishu

neya inkumok amu ninye ogol aisul iyiook. Nedol Olasurai

ajo kesipa, nelo aony Olutngani. Ore pee ekenyu, nedoli

Oltungani etua, neji matungai olmenengani. Nepuoi

neirragari olikae kirragarie liare. Neinoki inkimaitie, ore ake

pee eaku empolos e nkewarie neinyototo Karbobo, nelo enkima natii Oloikuma nejoki, "shomo turrumoki Olasurai enkima meinosa amu ninye oado aisul iyiook, naa tenelo kenya nikior kuna kishu neikonyarie iyiook. Nedol Oloikuma ajo kesipa, nelo arrumoki Olasurai enkima, nenya enkima neye. Ore peyie ekenyu nedoli Olasurai etua, neinguare.

Neaku Oloikuma ake o Karbobo, nepuo olkirragarie obayie, nejoki Karbobo Oloikuma ore amu kelakua enkare tena kop, naa nanu ogol teyie kalo nanu aingoru enkare te lekua oshon oolakua oleng. Nejoki Oloikuma shomo. Nejoki sii ninye Karbobo, kaagelaki inkishu moruak amu imeidim aashom enelakua naa iyie oshal tereu maakutiti. Nejoki inchoo ake peyie kilau te kuldo oshon nijo "Uuu! Uuu! Uuu!" ekaaning nalotu. Nereo Karbobo inkishu naagol neitadooyo too loshon kumok oleng. Nelotu Oloikuma nelau, eshomo duo enelakua nejo "Uuu! Uuu! Uuu! kake eitu ening Karbobo. Ina oshi ake pee eton ejo Oloikuma neijia.

Irorei Ngejuko

enaisho oo Lotorok

olkenkei entoki namelok naitayu ilotorok

osimeendua entim nasurr oleng

enepapit inguesi naata ilpapit

eniopir imotonyi naata inkopir

emus inguesi kumok naasoto tenebo-intokitin kumok

naasoto tenebo

oerata olkeju lemeata imartin

ilamuriak ilnganayio oonyae

isanagi olturrur loo Ikeek orrida

isikira intikiya

olpaashe esita enkang

olmuate enkang naidurrieki

moruo entoki musana

enaidurra teneinguare eueji nepuoi enkae ueji

arrid ilgoso oltungani lemeiro aitobiraki

enkapune elutoto oo soito sapuki

esakit enkurriny

oloikar olpul

entirma engudi sapuk naibung intasati moruak

enkobei endungoti olchata

osiririm isaen loo muanin ooruki neenikini empolos

olosinko emporos enkang

iltaleta iloshon

olelerue engues arake inkera kutete

esaisai entoki nataa keisho

olturoto eueji negum neshumare enkare tenesha

napulel entoki naibor

eturto ainkishu naaramati, nelepi

olpirankash erubata enkaina, erishata oloidolol o rony olkarbobo enkiti ngues tempolos eneitorit olmenengani oltungani otua