Bon nochi i bon bini na ODEAN, apertura di Nurses’ Week.

Despues di Nurses week di aña pasa, mi a midi tur e deseonan di ‘Forsa,.... pa sigui ku boso meta!’
 

Keremi e peso tabata haltu. Nos a deliberá tur siman riba nos tarea pa adelantá enfermeria speshalmente den un periodo ku bastante desaroyo. Kada dia e informashon prekario di nos isla ta alkansá nos. Nos no a pone nos meta ningun momentu den kashi. Ademas e’n ta pas den kashi.
 

Un enfermera o enfermero en bèrdat a skohe pa traha komo profeshonal. E no ta e persona pa lamentá situashon. E aktividatnan primordial di kada dia ta guia e ser humano ku tin nesesidat di kuido profeshonal, duné kurashi i sòru pa e konfiansa keda e fundeshi pa su rekuperashon.
 

Den kasonan ku no tin siguridat pa rekuperashon, e enfermera tin e deber di duna un kuido di kompashon ku esfuerso máksimo pa e enfermo, famia i e personanan ku ta yegá na dje no sufri.
 

Mi opinion i mi datosnan ta korekto.
Pero ta kiko ta e pensamentu ku e mésun enfermera tin, ora e ta aserka su sitio di trabou diariamente.
Ela drecha su unifòrm i ela drecha su tas manera kualkier otro profeshonal.
Su abilidatnan profeshonal ku por sierto a bira un parti di su aktuashon personal mester ta semper bai huntu kuné.
 

Transportashon tin retraso, mashin a kai afó, tin kolega malu, e dòkter ta lat, e material nesesario no ta den stòk i mester notifiká e pashènt ku ta un tèst nobo ta bai tuma lugá, mas lat ku tabata plania.
 

Esakinan ta informashon ku mester duna e pashènt i ku alaves por influenshá e relashon profeshonal entre e enfermera i e pashènt.
 

Tur zùster i bruder ta haña téknikanan di komunikashon pa apliká den tur sorto di sirkunstansia.
 

Aki mi ta referí na téknikanan di komunikashon den kaso ku mester duna informashon ménos plasentero pero nesesario.
 

Ta esaki ta un di e motibunan ku ODEAN ta organisá Nurses Week. Henter aña nos ta ehekutá nos deber di organisashon pa fasilitá miembronan i studiantenan en partikular pa haña informashon resien tokante kuido i dialogá ku otro profeshonalnan.
 

Nurses Week 2001 su meta ta pa profundisá riba sisteman di duna informashon ku ta benefisiá e enfermo i su famia.
 

Mi ta konvensí ku sirkunstansianan ku enfermera i enfermeronan mester duna kuido optimal, por hunga un ròl bastante klave den e forma ku informashon ta ser transmití.
 

Aunke ku nan ta bon kapasitá teorétikamente.
 

Na nòmber di tur mi koleganan mi ta hasi un apelashon na boso i na komunidat pa mantené e diálogo ku e enfermera, pa‘siña informashon nesesario keda e parti importante den bo kuido.
 

Un biaha mas, bon bini na Nurses’ Week.