Sektor di Kuido ta eksigi kambio i inovashon kontínuo.
Pa algun ana kaba Sektor di Kuido, mundialmente, ta enkontra problemanan ku ta pone ku e kaminda di kambio i inovashon ta trese desequilibrio.

Na Korsou Sektor di Kuido ta turbulento i ta sufri un golpi feurte.
Ora nos ta papia di turbulensia den Sektor di Kuido, ta tur trahado, profeshonalnan, dirigentenan ku ta responsabel pa maneho di kuido, e pashent i su famia ta sufri di un maneho menos positivo.
Konsekuensianan ta; ku kambio i inovashon nesesario ta keda eksklui.

Nos ta konsiente ku ta diferente plan di maneho a keda propone sin resultado.
I no pasombra nos no tin e deseo pa mehora nos Sektor di Kuido of pa motibu di skarsedat di personanan kapasitá pa hiba e proseso di kambio.

Tur e diferente aktornan tin nan rol spesifiko. Pero kon e kontribushon di enfermeronan ta i kon determinante e ta?

Mi ta referi na enfermeranan profeshonal den maneho di diferente instituto. Profeshonalnan gradua den kuido general i esnan spesialisá.
Personanan ku ta duna e pashent konfiansa, kurashi i guia durante su malesa.
Den un enkuesta hasi na Inglatera ana pasa, enfermeria a sali komo E profeshon di Konfiansa.
Durante e trinta ana ku mi tin den e ramo di kuido, mi no konose ningun hende ku un nesesidat diferente ora e ta malu.

Enfermera i enfermeronan ta priveligia pa sostené e pashent na momentu ku e toka kualkier porta pa kuido, durante tratamentu, durante rekuperashon, i si no tin speransa mas pa rekupera, ta e mesun profeshonalnan aki ta guia e persona, suavisa dolo i pena di dje i di su famia pa e por despedi konforme su deseo.
Ta desaroyo di e abilidatnan aki ta pone ku enfermeronan ta kapas pa karga kualkier inkonvenensia ku presenta pa e pashent durante su tratamentu.
Ta desaroyo di e abilidatnan aki ta pone ku enfermeronan ta kapas pa dirigi maneho den kuido.

Den nos komunidat tur hende tin un opinion tokante salu, kuido of salubridat en general.
No tin duda ku netamente e opinion aki ta ser adaptá, ta bira mas skerpi ora un persona of un hende hopi jega tin nesesidat di kuido temporal of kuido permanente.
Tesaki ta e momentu ku e pashent ta husga su kuido.

Nos komo profeshonal lo sigi apoyá e derecho aki. E ta juda nos evalua nos abilidatnan, pa optimalisa e kuido ku nos ta duna, hopi biaha bou di sirkumstansianan sumamente difisil.

Bo por imaginabo ku enfermeria no tin e atenshon nesesario?
Anto bo por imaginabo ku enfermeranan no tin bos den e maneho di Salubridat ainda?

Nos ta di akeurdo ku teknologia mediko ta desaroyá rapidamente.
Pa e motibu aki efisiensia ta indespensabel den e maneho ku dirigentenan den Salubridat ta hiba awor pa nos futuro.
E ora a yega pa enfermeronan optene un luga strategiko i juda kristalisa desaroyo di kambio i inovashon.

Kambio i inovashon den kuido ta trese desequilibrio, pero ta desequilibrio ku profeshonalnan por kombati pa mantene kalidat.

Internashonalmente tin mas ku 120 Organisashon di Enfermeronan ku ta representa miles di enfermero. ODEAN tambe ta miembro di e federashon aki.
I nos a akorda pa traha duru riba strategianan ku ta sigura kalidat di kuido.
Nos a akorda pa antisipa na tempu riba kambio i inovashon den kuido.
Nurses Week ta duna nos e oportunidat pa responsabilisa e mishon aki den komunidat.
No laga e informashon di e Siman di Enfermeria tokabo komo deseo, ta ku vishon i kreatividat e informashon balioso por kristalisa den bo trabou diario.Esaki ta loke mi ta propone pa e Siman aki na tur presente. (Louise M. Elstak, President ODEAN)                                  ©hsws™