E pareha Janzen tin 3 yu homber di kua dos yu ta biba na Hulanda.
Sra. Janzen a konta e oudiensia ku e tin 13 aña ta kuida su kasa na kas.
"Mi kasa a sufri un atake serebral 13 aña pasa. E no por papia pero nos ta komuniká ku otro ku señal. Mi kasa ta paralisá na un banda di su kurpa".

"Mi kasa a dunami di konosé for di prinsipio ku e no ke bai den un instituto anto ku e kier ser kuida na su mes kas. Ami mes no kier a hiba ningun instituto pasobra semper ela tratami hopi bon. I mi a opta pa keda kuidé na kas. Awe mi por bisa ku mi no a repentí ni un dia ku mi ta kuida mi kasa na kas. Mi kasa ta un persona grandi I ku hopi peso. E ta ser kuida na kama pero tur dia e ta sinta den su stul. Serka e wijkzuster mi a siña baha mi kasa den stul usando un aparato ku ta fasilitami".

Sra. Janzen a sigi konta ku su kasa ta un persona ku gusta hasi prèt.
"Mi tin un bon koperashon ku e zùsternan di wijk. Mi a siña hopi kos durante e añanan ku a pasa. Pero e trabou di kuida bo famia na kas ta hopi pisa.
Por ehempel mi a siña duna "sondevoeding" i saka mi kasa for di kama ku e aparato. Mi ta konsiderá mi mes un zuster kalifiká sin papel.
Mi ta kontentu ku mi mes por stür auto, pasobra un dunadó di kuido na kas tin hopi tarea pa kumpli kuné tur dia.

Algun di tareanan ta:

• Buska resèpt na dokter di kas;
• Laga stèmpel tur petishon di artíkulonan di kuido na BZV;
• Bai botika bai buska Ensure, pamper etc etc.;
• Hinka tur kos den auto e baha na kas atrobe;
• Chèk si tin sufisiente remedi I produktonan di kuido;
• Wak si tur kos na òrdu pa e zùsternan por traha kuné.

Sra. Janzen a sigi konta ku tin dia ku e ta hopi kansa.
Sra. Janzen ta bisa ku e ta mentalmente kansa, e kier sa ku su edat (60+) tambe ta hunga un rol awor. E ta bisa ku de bes en kuando e ta lubidá sierto kos.
Na e momentu aki e tin e responsabilidat di kuido di su ruman tambe ku a sufri un atake serebral.

Sra. Janzen ta agradesido ku e por hiba su kasa Betèsda ora e ta bai ku vakantie. Esaki ta e kaso un bes pa aña.
Sra. Janzen tin un deseo grandi pa topa otro dunadó di kuido no profeshonal pa por kompartí ideanan ku otro. E ta apoyá e sugerensha ku kisas lo lanta un plataforma kaminda dunadonan di kuido di famia pa famia por topa otro struktural.

[Sra. E. Janzen]