Kuido di famia pa famia ta meskos ku hiba un kòpi sòpi pa un bisiña malu of e ta mas bien e kuido ku bo ta duna 24 ora pa bo kasa malu? E kontesta ta ku den tur dos situashon aki por papia di un kuido di famia pa famia. Ora un persona, pa motibu ku e ta malu, ela bira grandi of e tin un hèndikèp, tin mester kuido, den varios okashon ta esnan ku ta mas serka di dje ta esnan ku ta tuma e kuido riba nan. Den mayoria kaso esaki no ta eskoho konsiente, pero bo ta hasi loke ta nesesario na e momentu ei.

Di unda e palabra "mantelzorg" ta bini. Podisé di e proverbio na ulandes: Bedekken met de mantel der liefde, tapa ku e mantel di amor?

Of for di e leyenda di St. Maarten kende ta topa un persona pober I den nesesidat riba su kaminda? St. Maarten a parti tur su pertinensianan kaba. Pues e ta kita su mantel, korte na dos I duna e pobersitu moribundo un di e mitarnan!

Si kuido di un otro ta bira intensivo I esun ku ta pidi e kuido no por mas sin bo ayudo, e ora ei tambe e ta un kuido di famia pa famia of un persona ku ta duna kuido na su famia of un dunamentu di kuido no profeshonal.

Duna kuido na un otro ta ser mira komo algu normal. Pero e kuido aki por tin komo konsekuensha ku bo mes bida ta bira otro di lokual e tabata anterior.

Bo no por sali ora bo ke.

• Ta difísil pa kombiná bo mes bida familiar I of bo trabou ku e kuido pa e kliente;
• Bo ta haña e sintimentu ku bo mester tene kuenta semper ku e kliente ku bo ta kuida;
• Bo ta sinti ku bo ta para boso;
• Bo no sa unda bo mester yega ku bo kuenta I preguntanan;
• Ta di mes ku bo mester duna tur e kuido bo mes;
• Esun ku bo ta kuida kier pa abo sigui ku so kuido.

Pa algun persona ku ta duna kuido na su famia e kuido pa e kliente ta un peso grandi. E ora ei ta bira importante pa, banda di e kuido di e kliente, para ketu na bo mes preguntanan, sintimentu of insiguridatnan I kompartí esakinan ku otronan. Tin biaha, haña e informashon korekto, ta sufisiente pa yuda bo riba e kaminda.
Nationale Raad voor de Volksgezondheid (NVR) a definí kuido di famia pa famia lo siguiente:
"Mantelzorg" ta e kuido di famia pa famia ta e kuido ku no ta ser duna den e kuadro di profeshon di kuido, I ta ser duna dor di un of mas miembro di e kliente su besindario direkto, kaminda ku e kuido a sali for di un relashon soshal. E kuido por varia di hasi un rospondi of kuido un biaha pa siman, of un kuido di 24 ora.

Hopi biaha ta neglishá e persona ku ta duna kuido na su famia, e kuidadó sentral of e figura prinsipal kende al final de la kuenta ta garantisá kontinuidat di e kuido. Asina ta ku e persona ku ta duna kuido na su famia ta un pila riba kual situashon di kuido na kas kompliká I intensivo ta ser pone.

Posishon di e persona ku ta duna kuido na su famia

E outoridat médiko por ehempel di un dokter di kas of speshalista, pero tambe un guia personal of un mèntòr, lo por disidí pa medio di kriterio, si un persona por bini na remarka pa e mantelzorger.

Kriterionan pa un bon persona ku ta duna kuido na su famia

• E persona ku ta duna kuido na su famia mester tin bon relashon ku e kliente;
• E mester ta dispuesto pa karga e kuido den su totalidat;
• E mester por konosé e malesa di e kliente;
• E mester ta na altura di e "netwerk" di e kliente;
• E mester por ta un bon mediador.

Desaroyo di ekspertonan di kuido profeshonal

Dor di supstitishon di intra- pa ekstamural no mester boga pa solamente un kuido na midi pa e persona ku ta duna kuido na su famia. P'esei lo ta deseabel pa den kursonan di e diferente disiplinanan , pone atenshon na e problemanan spesífiko den kual un e persona ku ta duna kuido na su famia por hañé kuné. E kliente mester aseptá e persona ku ta duna kuido na su famia komo un partner serio den e kuido, kende mester traha kuné riba un base di rèspèt I igualdat.
Tambe ta di importansha pa e persona ku ta duna kuido na su famia realisa ku e kuido di famia pa famia no ta terminá ora ku e kliente wòrdu interná den un institushon, ya ku e sintimentu di responsabilidat di e persona ku ta duna kuido na su famia ta keda.

Sosten riba e tereno personal

E nifikashon di kuido ta mara mas tantu den kada situashon familiar, e ta un situashon ku ta bini hopi dilanti den nos kultural. (E sintimentu di responsabilidat di kuido, ku un yu tin ku su mayornan, kendenan ta malu). Mester tuma inisiativanan pa desaroyá e kuido na midi e persona ku ta duna kuido na su famia. E kos mas importante aki ta komunikashon. Un "mantel-zorger" ku no ta papia lo resultá den un isolashon.
E komunikashon entre e persona ku ta duna kuido na su famia I e kliente ta bira difísil pa motibu ku por ehempel tin miedu pa ofendé su sintimentunan. Un yu ku ta kuida su mama, por bai tuma e papel di kuido di famia over for di e mama kende ta malu. E mama ta bira manera un yu.
E persona ku ta duna kuido na su famia ta evitá muestra di duda of impotensia dilanti di e kliente, ya ku ta pensa ku mester evitá tur e kosnan aki pa e kliente. Gruponan di kompañero, organisashonnan boluntario I ayudo profeshonal ta opshonan pa apoyá e persona ku ta duna kuido na su famia I mester mustra e persona ku ta duna kuido na su famia riba esakinan preferiblemente den un estado tempran.

For di kombersashon ku "mantelzorgers" tin ku e dunadó di kuido profeshonal, por ripara nan estado emoshonal I físiko for di tempran I aki por tuma medidanan en konekshon ku e kliente I di e peso di kuido. Aki tambe mester pensa riba e apoyo di profeshonal I boluntarionan, na kua manera por evitá ku e persona ku ta duna kuido na su famia ta "burn out".

Pa e persona ku ta duna kuido na su famia ta di suma importansha pa e tin sufisiente espasio pa dibertishon. Si e persona ku ta duna kuido na su famia tuma tempu pa su mes de bes en kuando na un sistema struktura, aunke kortiku, lo e haña forsa pa e por sigui. Mester stimulá aktividatnan soshal pa evitá ku e persona ku ta duna kuido na su famia ta kai den un isolashon soshal, of pa saké for di esaki.

Problemanan di e persona ku ta duna kuido na su famia

Un terser parti te ku 50% di tur persona ku ta duna kuido na su famia tin problemanan ku nan mes salu. Esaki ta manifestá su mes den forma di miedu, no por drumi anochi, depreshon intrankilidat, ta dependé riba medisina, estimulo di balor propio hopi abou, problema ku stoma I tripa, problema ku lomba I garganta, hiperventilashon, e ta ser iritá lihé I doló di kabes.

• Inkredulidat: karakterístikanan di esaki ta entre otro falta di memoria, I no por tuma desishon;
• Ninga: ta ninga realidat, pa motibu ku no ta den e posishon pa aseptá e konsekuenshanan;
• Rabia: esaki ta bini dilanti dor di un sintimentu di impotensia;
• Miedu: e persona ta puntra su mes si e por duna e kuido optimal. Tambe e persona tin miedu pa e konsekuenshanan di e malesa;
• Speransa/sin speransa: tin situashon ku por ser tira entre speransa I sin speransa. Un hende no sa mas kiko pa hasi I ta tene na kualkier kos. Si e periodo aki dura muchu largu, esaki por okashoná serka e persona ku ta duna kuido na su famia un depreshon grandi.

E peso di e kuido di e persona ku ta duna kuido na su famia ta krese segun e gravedat di e malesa di e kliente. Un konsekuensha lógiko di esaki ta ku e kontaktonan soshal di e persona ku ta duna kuido na su famia ta bira menos.

E forsa di e persona ku ta duna kuido na su famia pa karga e peso di kuido, ta debilitá. Esaki ta nifiká, ku tin un gritu pa yudansa, debí ku e peso di kuido ta bira mas pisa. Di e manera aki ta pidi intervenshon mas intensivo di e persona ku ta duna kuido na su famia. E por ta penoso pa esnan envolví pa yega na límitenan di e posibilidatnan. Promé ku yega na e límitenan aki, e persona ku ta duna kuido na su famia mester señalá esaki I reakshoná na un manera adekuá. Ta na e dunadó di kuido profeshonal pa rekonosé señalnan ku ta mustra riba un peso sígiko I físiko.

Den hopi kaso esaki lo por duna problema. Un persona ku ta duna kuido na su famia pa basta tempu, lo no laga ripara lihé ku e no por mas. Riba e pregunta kon ta ku e kliente en kuestion e kontesta "bon" lo ser duna. E dunadó di kuido profeshonal lo mester ser di trein èkstra pa rekonosé problemanan di e dunadó di kuido no profeshonal I pa dunele guia na un manera efisiente.

For di diferente investigashon a sali na kla ku depreshon ta bini dilanti ku frekuensha. For di investigashon pa efektonan di salu ku kuido ta trese kuné serka pashènt ku a sufri di un atake di selebre, a resultá ku e grado di depreshon di e dunadó di kuido no profeshonal,ta en kombinashon ku e situashon sígiko di e pashènt ya menshoná. Si e kliente físikamente tin mester di mas kuido, ta pone mas preshon riba e kuido, kaminda ku e dunadó di kuido no profeshonal ta hañé bou di mas preshon.

Un depreshon no ta algu straño serka un persona ku ta duna kuido na su famia. Si ta papia di un kuido largu, pero tambe na ora di un kuido intensivo korto, e preshon I ansha ta oumentá. Manera a bisa kaba, e bida soshal di e persona ku ta duna kuido na su famia ta bira mas limitá durante e periodo di kuido. Debí na esaki e persona ku ta duna kuido na su famia su bida ta bai drei kompletamente rondó di e kliente. Esaki por tin komo konsekuensha un konflikto entre e dunadó di kuido I e famia, kaminda ku no mester perde e kambionan di personalidat I kondukta serka e kliente of pashènt for di bista.

Konklushon

Kuido di famia na famia ta I ta keda esensial. No ta pone muchu atenshon na kuido na midi pa e persona ku ta duna kuido na su famia, e kuido no profeshonal. Guia di e dunadó di kuido no profeshonal, ta nesesario si nos kier duna e klientenan den futuro, un kuido digno di un humano na kas.
E dunadó di kuido profeshonal mester bai mira e dunadó di kuido no profeshonal komo un partner iqual den kuido, ku tur rèspèt I komprenshon.
Tambe mester mustra riba e papel dualistiko di e mantelzorger, di un banda komo dunadó di kuido I di otro banda e pididó di kuido. Un método pa realisa esaki ta pa pone mas énfasis riba e dunadó di kuido no profeshonal den e diferente kurso, reunionnan, workshops I dianan di informashon.
Riba e tereno soshal a bira tempu pa komunidat mustra mas rèspèt I komprenshon pa e trabounan ku "mantelzorg" ta hasi, ku ta enserá esfuersonan sobre humano I bou di tenshon ku e dunadó di kuido no profeshonal ta duna pa drecha kalidat di kuido.

Relato

E "mantelzorg" na Klínika Capriles, den mayoria kaso ta konsistí di famia di e klientenan. De e kuido di adikshon tin un desepshon grandi di e klientenan aki kendenan ta okashonando hopi daño na nan relashon familiar I konosínan. Esaki ta debí na nan komportashon di uso di droga durante tratamentu. Nan ta gana, ofendé, horta I nan ta primintí sin kumpli. Nan ta trese bergwensa pa nan famianan, nan ta agresivo I sin eskrupulo.

Tin biaha ta kosta hopi di bo parti pa konvensé e famianan pa bolbe purba ku nan hendenan. Nan desepshon pa ku e hendenan aki semper lo keda un problema. Tin algun famia ku ketu bai ta keda kere ku e enfermeronan lo por hasi milager pa saka nan hendenan totalmente for di e gara di adikshon. Den promé instansha famia ta masha motivá, pero despues ku nan bin realisa ku e kliente mes no ta motivá pa stop, nan ta entrega. Tin di nan ku ketu bai ta keda buska solushonnan I ta pasa di klínika pa klínika (afkickcentra) I ta keda purba manda nan famia te den eksterior pa tratamentu. Debí ku e tratamentu pa adikshon mester fokùs bo mes riba resultadonan chiki ku ta basa riba términonan largu di tratamentu. Esaki por pone ku famia nan no ta asina entusiasmá pa ku e kambionan aki. Algun di nan ta keda motivá pa kambio den famia. Loke nan ke mira hopi biaha den un tempu kortiku ta un kambio total di e hende su personalidat, lokual ta sumamente difísil. Otronan si ta keda positivo ounke nan no ta mira resultadonan mesora. Loke si por ser konsiderá ku tin klientenan ku si ta pasa bon dor di e programa I ta dunando bon resultado te ku awe, di kual famianan ta super kontentu ku esaki. Den nos tratamentu di klientenan, kaminda ku a inbolukra e famia desde un prinsipio aktualmente ta dunando resultado. Ku esaki nos por konkluí ku pa e kuido por ta efisiente I dirigí riba resultado, e partisipashon di e dunadó di kuido no profeshonal, den e programa ta esensial.

[Hubert Hoek]