Hlaupahópur NFR hefur sinn eigin kvennakór, - Kór Átthagafélags Miðbæjarskólans.
Kórinn treður upp við ýmis tækifæri.
Við höldum alltaf okkar árlega þorrablót. Í fyrra var HÁS - hópurinn með okkur og við skemmtum okkur svo vel að við ákváðum að vera saman næsta ár líka.
Í tilefni af því var Pétur HÁSari kjörinn í þorrablótsnefnd næsta árs ásamt nokkrum valinkunnum NFR - félögum
Í hverjum mánuði yfir vetrartímann hittast konurnar í hópnum, - bæði þær sem eru að hlaupa og hinar sem eru ekki að hlaupa jafn mikið lengur og þær eiginkonur hlaupakarla sem vilja halda sambandinu við okkur.
Við saumum mest lítið en borðum meira og semjum stöku texta fyrir kórinn.
Í sumar var tekin upp sú nýbreytni að eftir Mývatnsmaraþon fóru þeir meðlimir hópsins sem vildu og vettlingi gátu valdið saman í vikuferðalag um norðausturhornið.
Við fórum 10 manns + hundur á fjórum bílum austur á Borgarfjörð og þræddum strandlengjuna norðurfyrir með viðkomu í Ásbyrgi þar sem við gengum um svæðið undir leiðsögn Magga Sig..
Ferðin reyndist hin skemmtilegasta og til stendur að endurtaka hana í einhverri mynd.
Hópurinn gerir mikið af því að fara saman í keppnisferðalög, - en eini fasti punkturinn er Mývatnsmaraþon. Hlaupahópur NFR tekur alltaf þátt í Mývatnsmaraþoni.
Auk þess höfum við þetta árið lagt land undir fót og farið á Akranes, í Vatnesskokk, Laugaveginn og Barðsneshlaupið og stefnum á að bæta Brúarhlaupinu á Selfossi í hlaupasafn ársins. Auk þessa reynum við að taka þátt í flestum innansveitarviðburðum höfuðborgarsvæðisins, - ein sér eða í smærri hópum :)
Við erum dugleg við að gefa okkur tíma í ferðalögin, leggjum stundum af stað nokkur saman með nokkrum fyrirvara og skoðum okkur um í leiðinni. Þannig kom t.d. hluti hópsins við á Stöðvarfirði á leið í Barðsneshlaupið og dvaldi þar við náttúruskoðun um hríð.
A.m.k. einu sinni á ári förum við í æfingabúðir á Úlfljótsvatn og tökum fjölskyldurnar með okkur. Þar gistum við í sumarhúsum eina helgi, hlaupum saman, syngjum saman og skemmtum hvert öðru með glensi og gríni.
Að minnsta kosti ein æfing í viku hverri endar á sameiginlegri heitapottsferð og/eða því að hópurinn snæðir saman.
Stundum enda æfingarnar í Nauthólsvíkinni á því að við gerum innrás á Nauthól sem framreiðir bestu súpur sem sum okkar hafa smakkað.
Síðasta vetur skiptumst við á að stjórna laugardagsæfingu frá sundlaug þess hverfis sem stjórnandinn bjó í og enduðu þær æfingar venjulega á því að ráðist var heim til stjórnandans og heimtað eitthvað gott í gogginn (og með því).
Eftir Heiðmerkuræfingarnar förum við iðulega í Breiðholts- eða Árbæjarlaug í pottinn.