NAGSALIMBAYAN
ANG MGA putok at bumuwal ang limang sundalo sa matagumpay na reyd ng Bagong
Hukbong Bayan sa ditatsment ng 226th Philippine National Police sa
Barangay Banca-banca, Nagcarlan Laguna.
Nagmartsa ang kababaihan sa ilang
barangay ng Gen. Luna, Quezon patungo sa munisipyo para tutulan ang pagtitindig
ng kampo ng 42th IB-PA sa lugar.
Sa Calaca, Batangas, tinutulan ng mga mamamayan ang labis na ingay sanhi ng mga operasyon sa loob ng coal-fired
thermal plant. Samantala, dumaraming Caviteno ang lumalahok sa pakikibaka para
ibasura ang land conversion scheme ng rehimeng US-Aquino na nagwawasak ng
kanilang mga bukid at tahanan sa ngalan ng huwad na industriyalisasyon.
Paano ipapalaganap ang mga pangyayaring ito? Paano mauunawaan ng sambayanan ang rebolusyonaryong
mensaheng hatid ng putok at sigaw ng paglaban, upang pagkatapos maunawaan ay
magbuklod sila, sumuporta o lumahok sa pambansang
demokratikong rebolusyon ng bayan?
Sinikap sagutin ang mga tanong sa
itaas ng mga propagandista sa Timog Katagalugan sa konteksto ng kanilang mga
rebolusyonaryong tungkulin. Binalikan nila ang prinsipyong gumagabay sa kanilang gawain: susi ang
propaganda sa pagmumulat, pag-oorganisa at pagpapakilos sa mga mamamayan para
sa pambansang demokratikong rebolusyon ng bayan.
Ang hamon ay nanatiling nakahapag sa
digmaan sa propaganda: kailangang maipalaganap ang rebolusyonaryong mensahe sa pinakamalawak na mamamayan sa pinakakagyat at pinakapopular na paraan.
Bilang tugon sa hamon, binreyktru
ang Radyo Timog Katagalugan (RTK), ang kalatas sa himpapawid ng NDF at iba pang
progresibo at rebolusyonaryong pwersa sa rehiyon. Ang RTK ay myembro ng broadcast network at
Radyo Sierra Madre. Ang mga
pangangailangan sa pinansya at materyal ng RTK ay
magkakatulong na tinutugunan ng NDF, mga rebolusyonaryong organisasyong
masa at mga kaibigan ng rebolusyon.
Matagumpay na nakapagsahimpapawid ng unang regular na
programa ang RTK simula nitong Hulyo 16 [1991] matapos ang matagal-tagal ding
panahon ng paglulunsad ng mga test broadcast.
Ang RTK ay maririnig ng ngayon sa 106.7 Mhz sa
FM band. Sa
simula’y minsan hanggang dalawambeses isang buwan ang pagsasahimpapawid nito;
sa kalauna’y tinatarget ng RTK na makapagbrodkas nang minsan isang linggo.
Ang bawat programa na tumatagal
mula isa hanggang dalawang oras ay nahahati sa apat na bahagi. Una ang balita at
editoryal. Matapos
nito ay ang commentary program.
Dito tinatalakay ang mga pang-araw-araw na
pangyayari at kung ano ang pananaw dito ng rebolusyonaryong kilusan. Susunod ang bahaging features o
documentaries; at ikapat ang programang musikal at kultural. Sa bahaging ito
lumalabas ang kakayanan ng mga kasama sa pag-awit, pagtula at sa dula.
Sa unang
pagsasahimpapawid nito, tinalakay ng RTK ang kahalagahan ng pagsasagawa at
pagtataguyod sa mga proyektong sosyo-ekonomiko ng rebolusyonaryong kilusan.
Sa
pakikipagtalakayan kay Ka Roger, tagapagsalita ng Melito Glor Kumand, sinabi
niya na mahina lang power o watts na kanilang ginagamit kayat ginawa na lang
nito ito ng paraan. Puro improvised ang
gamit, aniya, ngunit ayon sa feedback kayang umabot
ang signal sa buong Timog Katagalugan.
Ang RTK ay sariling inisyatiba ng mga rebolusyonaryong
pwersa sa Timog Katagalugan. Ayon pa rin kay Ka Roger, hindi
rin maisasantabi ang naging tulong ng paghalaw ng mga aral mula sa mga
karanasan ng pambansang radyo, ang Radyo Sierra Madre (RSM). Ang mga panimulang
karanasan at ang encouragement mula sa mga kasama sa
RSM ay ilan sa mga malalaking salik na nakapagbigay ng lakas-loob sa mga kasama
sa rehiyon na ilunsad ang Radyo Timog Katagalugan. Naitayo rin ang RTK sa tulong ng mga kaibigan at mga kasamang may kaalamang
teknikal, aniya. May mga teknikal at pinansyal na problema pa ring kinakaharap
sa kasalukuyan ang RTK, subalit pinagsisikapan nang makakuha ng mas malakas na
transmitter para mapalakas pa ang dating ng brodkas at maabot ang iba
pang malalayong prubinsya at lugar.
Sa
kasalukuyan, ang RTK ay sinusubaybayan na ng mga naninirahan sa Timog Quezon
matapos ang unang pagsasahimpapawid nito.
Sa pagtatayo
ng radyong gerilya sa Timog Katagalugan, ani Ka Roger, lalong mapapalakas ang
rebolusyonaryong propaganda kasabay ng mga gawain sa pulitika at militar. Manunyutralisa lalo ang mga kasinungalingan ng rehimeng
US-Aquino.
Sa anumang
labanan, maging ito’y labanang pampulitika, ang propaganda o pagbibigay
impormasyon ay napakahalagang sandata.
Ang marinig ng mamamayan ng Timog Katagalugan ang katotohanan ay isa na mismong malaking tagumpay ng rebolusyonaryong kilusan.