Index / Back English Version
He Whakaoriori mo Raeroa
Na Taoho
E Rae tangi kino i roto te wharekino,
Me kohanga taua, e i,
Ki te kohanga Taputapuatea,
Hei pa tu hau, e
Hei whakarongo tai e tangi haere ana
I raro Maunganui, e i.
Kia marama te titiro pukohu whenua, e i,
Kia whakarongo ake taaua, e,
Nga patu e taka i te nui Ati-Puhi (Nga Puhi)
Ka kai putunga taaua, e,
Ki te riri.
Kei hea ra, e, a Te Huki,
Te tangata i whakamaua ai, e,
I te waikowhai,
Koko atu a Puriri.
Me aha koe, e tama, e i,
He hurihanga waka taua, e i,
Ko Mahuhu ki te wai?
Pokaia i te tuanui o te whare o Nukutawhiti, e i,
Ka marama te ata
Kei runga Te Koikoi i a Rona, e i,
Kei te marama nui
Kei te marama hua ki te pae ra.
Ehara ko matua hautere tena
Kei te ra e mau ana, e i.
Ko tou mata tena, ko te mata o Tawhaki
I tuhia ai, rapa ana i te rangi
Tukutuku wai karere, e i.
Kia whaia atu to reo kirikiri,
Whakarei te whatu, e,
To tapuae nui ka haruru ki raro ra, na i.
Ko wai rawa he tangata hei noho mo to whenua, e i?
Ko Tuturiwhatu, ko Toorea,
Ko nga manu maatai whanga o te uru, e i.
Me puhata koe te ngaru moana nui,
E ngunguru mai nei.
Me aha, e tama e, he turanga riri,
H turanga pahekeheke;
Ka pa taaua, e i,
Ko te toa whenua i to matua i a Tuoho,
E kore e taea e taaua.
Mahi atu taaua ki te tukou no kai, e,
E nohoia mai ana e te muharu;
Mahi atu taaua ki te tukou no Rongo, e,
E nohoia mai ana e te hotete.
Kahore ia nei, e, ko te tohu o te mate.
Whakapiri noa ake taaua, e,
Nga rakau tuhaahaa i a Karawai ra, e,
Hei hunganga atu mo Reremura
Ki reira nei, na i.
E kore koe e ora, e i,
I nga hau o te tiu e aaia nei
Te puupuutara ki uta, na i.
