Ang mga sumusunod ay pananaw lamang ng MIGRANTE Sectoral Party - Kingdom of Saudi Arabia Chapter [MSP-KSA] at ng Kapatiran sa Gitnang Silangan [KGS]

1. Pinakamahalagang tagumpay ng isinagawang pakikipag-dayalogo sa POLO-OWWA ang pagkakabuhay muli ng Kapatiran ng mga Migranteng Istranded sa Riyadh (KAMI-SR) bilang isang organisasyon at ang pagkakabuo ng mga bagong lider na titindig para sa kapakanan at kagalingan ng migranteng manggagawang Pilipino.

2. Resulta ng pakikipag-usap sa mga kinatawan ng POLO-OWWA, nabuksan ang isang pintuan para sa komunikasyon sa pagitan ng magkabilang panig. Marami - raming mga usapin ang naiharap natin at nagisa ang POLO-OWWA kaugnay ng kanilang kahinaan.

3. Positibo nating tinitingnan ang inisyal na mga plano ng mga katatalaga pa lamang na Labor Attache. Partikular na sinusuportahan ng MSP-KSA at ng KGS ang programang paglabas ng POLO mula sa ‘opisina’ nito at pag-abot / pakikipag-usap sa mga ‘istranded’ saanman sila naroroon.

4. Naisandal din sa pader ang POLO-OWWA kaugnay ng kapabayaan at kalokohan ng mga case officer sa mga kaso ng ‘istranded.’ Ngunit, ang pangunahing dapat pagtuunan ng pansin ay ang kapabayaan ng gobyerno sa migranteng ‘istranded’ pangunahin ang paglilimita ng budget sa repatriyasyon sa ilalim ng OWWA Omnibus Policies; pagpapasa ng kanilang responsibilidad sa repatriyasyon tungo mismong mga ‘istranded’ at sa ahensyang nag-deploy sa kanya; at, sa pag-asa sa gastusin sa tiket sa mga organisasyon sa komunidad. Mapanganib ang paghahabol na mapatalsik ang mga ‘case officer’ dahil pinipilit nating ilimita ang usapin bilang kahinaan ng mga indibidwal imbes na itutok ang lakas sa kapabayaan ng gobyerno, sa pangkalahatan.

5. Mapanganib sa ganitong mga tipo ng pakikipag-dayalogo ang pagkahulog sa mga resolusyong papatse-patse at pagkakapokus ng usapan sa mga paisa-isa at ispesipikong kaso ng mga istranded. Kung haharap sa pakikipag-dayalogo, kinakailangang sumentro sa pinakamahahalagang usapin na sumasaklaw sa kalagayang ng lahat. Dapat na sinundan na lang ang listahan ng kahilingan na inilatag sa Pahayag ng Pagkakaisa para sa mas mahusay ng deliberasyon o talakayan. May malaki pang kakulangan sa pagkabig sa iba pang samahang pangkomunidad. Kailangang maagap na maipaalam, o sa maksimum, mapalahok ang mas maraming bilang ng kinatawan / organisasyon sa mga susunod na pakikipag-usap at pakikipag-dayalogo.