Mo’ ‘o rompo chistu specchio
‘stu specchio impertinente
ca da ‘nu poco ‘e tiempe
me ‘nzurta ogni mumento.

Ogni vota me trova
difette in quantità
e nun parlammo po’
d’‘e smorfie ca me fa.

Me metto ‘nu vestito,
c’a mme me piace assaie,                 
nè isso nun me dice:                            
« Chiste te sta ‘nu guaie! ».

Provo ‘nu pare ‘e scarpe
appena strette e corte,
e chille: «lievatèlle,
te fanno ‘e gambe storte! ».

‘Nu iuorno aveva ascì
per un appuntamento,
che cosa nun dicette
‘stu specchio indisponente.

Nun c’iaggio visto cchiù
pe’ nierve e p’amarezza,
piglio ‘stu ‘nfame ‘e specchio
e ‘o faccio mille piezze.

Afferro ‘na burzetta
‘a copp’‘o  tavulino,
senz’‘e me pettinà,
me metto ‘o cappellino.

P’‘a strada dubitosa
me fermo a ‘nu puntone:
« chissà si ‘o cappellino
 ‘ncapo me starrà buone? ».

Me guardo allora attuorno
 e trovo ‘na vetrina,
‘nu poco frasturnata,
 a essa m’avvicino.

Subito sento ‘a voce
‘a stessa, tale e quale:
 « Lievete ‘stu cappiello,            
  ca pare ‘nu rinàle! ».