Dint’a ‘na casarella scarrupata
ce sta ‘na vicchiarella sola sola,
ca tutt’’e figlie l’hanno abbandunata,
pe’ ghì tanto luntano a faticà.

Dint’o paese sulo quatte gatte,
stanno assettate ‘ncopp’a ‘nu murillo,
pe’ piglià sulo chello ch’è rimasto,
‘o sole, sulo ‘o sole e niente cchiù.

Sta vicchiarella sempe addenucchiata
prega ‘a madonna pecchè ‘a fa campà,
sulo pe’ ‘na speranza, una sola:
ca nata vota ‘e figlie pò vasà.

Tiempe è passato ‘e figlie so’ turnate
pe’ s’abbraccià sta mamma puverella
ma chiste troppo tardi so’ arrivate:
ce sta sulo ‘na casa scarrupata
e quatto gatte ‘ncopp’a ‘nu murillo,
‘ncopp’a ‘na strada ianca e assulata.