Buod ng Meteor Garden 1

Itinuturing ang Meteor Garden bilang isang modernong kwento ni Cinderella. Iyon nga lamang, sa istorya ay wala ang kontrabidang madrasta at mga anak nito. Sa halip, ang meron dito ay ang komplikado at nakalilitong ugnayan ng bidang babae at ng mga pangunahing bidang lalaki.

Ang pangunahing karakter na si Shan Cai ay isang matapang at mapagbigay na babae at malimit na nakikipaglaban para sa kanyang mga kaibigan. Gayunman, nang pumasok siya sa Ying De University, huminahon siya ng kaunti at sinubukang kumilos ng payak. Ito ay dahil sa Ying De, naroon ang apat na kilalang grupong tinatawag na F4. Kasama sa F4 ang pilyo at tila walang pakialam na si Dao Ming Si, ang tahimik at kakaibang si Hua Ze Lei, ang babaerong si Xi Men, at ang masayahin at tapat na si Mei Zuo. Nagbababala sila sa mga tao sa pamamagitan ng pagbibigay ng 'red card' na may nakasulat na, 'You'll Be Dead.' Bukod dito, sila ay nagmula sa mga pinakamayayaman at mga pinakakinikilalang mga pamilya. Kaya nilang magpatalsik ng sinuman sa paaralan, maging mga guro man.

Nagkaroon ng sandaling nagtagpu-tagpu ang landas nina Shan Cai at iba pang miyembro ng F4. Ang oras na ito ang naging daan tungo sa isang masalimuot na ugnayan. Sa simula, nabuo ang pagtingin ni Shan Cai kay Hua Ze Lei dahilan sa pag-aakalang kaiba ito sa tatlo. Tahimik nga si Lei at walang pakialam sa iba. Gayunman, nang magkaharap na sila ni Dao Ming Si, siya naman ang napagtuunan ng kakaibang pag-ibig nito. Dahilan din kay Shan Cai, nagkaroon ng di magandang pagkakaunawaan ang F4 sa kauna-unahang pagkakataon.

Bagaman may nararamdaman si Shan Cai kay Hua Ze Lei, hindi naman siya maikukumpara sa unang inibig ng binata, si Teng Tang Jing. Taglay ni Jing ang katalinuhan at kagandahan na batid din naman ni Shan Cai na hindi niya mapapantayan. Ito naman ang naging dahilan upang pilitin niya si Lei na sundan si Jing ng magpasya itong bumalik sa France upang tapusin ang kanyang mamuhay sa sarili at paunlarin pa ang napiling karera.

Sinubukan ni Dao Ming Si na ligawan si Shan Cai subalit ayaw nga talaga ng dalaga rito. Nang mga panahong nasa France si Lei kasama ni Jing, inanyayahan ni Dao Ming Si si Shan Cai na lumabas. Pumayag si Shan Cai bagaman ayaw nga niya kay Dao Ming Si. Ang pagpayag namang ito ni Shan Cai ay inakala ni Dao Ming Si na katumbas ng pagpayag nitong maging girlfriend niya. Samantala, nang mga sandaling iyon ay si Lei pa rin ang laman ng isip ni Shan Cai.

Nagbalik si Lei at mas naging magulo ang ugnayan nina Shan Cai at Dao Ming Si. Muli, nagkaroon ng di pagkakaunawaan sina Dao Ming Si at Lei. Ito ay matapos na mahuli silang dalawa ng Ah Si na naghahalikan sa kanilang bakasyon sa Okinawa.

Sinubukuan ni Dao Ming Si na ipaalis sina Shan Cai at Lei sa Ying De at pinilit niya ang prinsipal ukol dito. Ang kapatid niyang babae na si Dao Ming Zhuang ay inisip na talagang naloloko na ang kanyang kapatid sa hakbang na iyon. Umisip siya ng paraan para maayos ang lahat. Nagpasya siyang magsagawa ng isang basketball. Inilagay niya sa isang grupo sina Dao Ming Si, Xi Men at Mei Zuo, samantalang sa isa namang grupo sina Shan Cai, Lei at Qing He (kaibigan ni Shan Cai). Sa laro, nagselos si Dao Ming Si sapagkat laging tinutulungan ni Lei si Shan Cai. Napansin ito ni Lei kung kaya kinuha niya ang lahat ng pagkakataon upang maka-iskor nang maka-iskor sa laro. Lalo pang pinagbutihan ni Lei ang pagtrato kay Shan Cai na tuluyang nagpasira sa konsentrasyon ni Dao Ming Si. Sa huling segundo ng laro, tumigil si Dao Ming Si at sinabi sa lahat na kalokohan lamang na ayusin ang problema.

Nagpasya si Dao Ming Si na magpunta sa New York upang mag-aral sa pag-aakalang may unawaan na sina Shan Cai at Lei. Nang malaman ni Shan Cai ang tungkol sa pag-alis ni Dao Ming Si, hindi niya ito nagustuhan sa hindi maipaliwanag na dahilan. Bago tuluyang sumakay sa eroplano si Dao Ming Si, sinabi ni Lei sa kanyang siya (Dao Ming Si) talaga ang gusto ni Shan Cai. Habang umaandar ang eroplano, paulit-ulit na naiisip ni Dao Ming Si ang sinabi ni Lei at sa huli ay nabuo ang loob na huwag ng tumigil sa New York.

Lumapag ang eroplano sa New York at muli naman siyang sumakay sa sumunod na lipad ng eroplano pabalik ng Taiwan. Nang pauwi na si Shan Cai mula sa pinagtratrabahuhang bakery, nadatnan niya si Dao Ming Si na nakatayo sa may kanilang bahay. Sinabi nitong bumalik siya dahil mahal niya ang Taiwan, pero sa totoo lang, ayaw niyang iwan si Shan Cai. Nakita sila ng nakatutuwang nanay ni Shan Cai at niyakag sila sa loob ng bahay upang magpahinga. Ang bawat sumunod na tagpo ay nagpatibay sa mga nararamdaman nina Shan Cai at Ah Si para sa isa't isa.

Samantala, dumating naman ang nanay ni Dao Ming Si na si Dao Ming Feng. Ayaw nito kay Shan Cai sapagkat alam niyang napakahirap lamang nito. Ipinagkasundo niyang ipakasal ang anak sa mayamang dalaga na si Xiao Zi. Naging mabuting magkaibigan sina Shan Cai at Xiao Zi. Dahilan sa ayaw talaga ni Dao Ming Feng kay Shan Cai, nagpasya itong ipaubaya na lamang si Dao Ming Si. Nahulog nang tuluyan si Xiao Zi kay Dao Ming Si subalit alam niyang si Shan Cai talaga ang gusto nito kung kaya hindi na siya pumayag sa kasal. Naging mabuting kaibigan na lamang ni Xiao Zi sina Dao Ming Si at Shan Cai.

Pagkatapos ng insidenteng iyon, nagtungo si Dao Ming Feng sa London para sa isang pulong na may kaugnayan sa negosyo. Naiwanan namang mag-isa sa bahay si Shan Cai dahilan sa lumipat ang mga magulang niya sa isang tabing dagat. Pinilit ni Dao Ming Si na tumigil si Shan Cai sa kanilang mansyon. Nang inuwi ni Dao Ming Si si Shan Cai, si Auntie Jade na matagal ng katiwala sa bahay ay naroon. Pinagtrabaho niya si Shan Cai kapalit ng pagtigil nito. Di nagtagal, nakita ng matandang mabuting bata si Shan Cai at malayo ito sa mga sinasabi ni Dao Ming Feng.

Isang gabi, dinala ni Dao Ming Si si Shan Cai sa kanilang balkonahe, gamit ang isang telescope, nanood sila ng meteor rain. Binigyan niya ng isang napakagandang kwintas si Shan Cai at humingi ng isa pang pagkakataon. Bagaman kapwa nawiwirduhan sa kanilang kondisyon, nagkasundo silang ititigil ang relasyon matapos ang dalawang buwan kung walang mangyayari.

Samantala, nagbalik ang ina ni Dao Ming Si. Galit na galit ito nang malamang nasa mansyon nila si Shan Cai. Nagalit din siya nang malamang gusto na ni Auntie Jade si Shan Cai. Ginamit niya ang kapangyarihan at nawalan ng trabaho ang mga ama nina Qing He at Xiao You (mga kaibigan ni Shan Cai). Ang tanging paraan lamang upang matulungan ang mga ito ay ang iwan ni Shan Cai si Dao Ming Si. Kaya naman, isang gabing maulan, nakipag-break si Shan Cai kay Dao Ming Si at hindi man iyon ang sinasabi ng puso, sinabi ng kanyang bibig na hindi na niya mahal si Dao Ming Si. Labis na nasaktan ang binata dahilan upang magbalik ang dating ugali, ang pagiging loko.

Hinanap ni Shan Cai ang kanyang mga magulang sa tabing dagat. Doon, nakilala niya si Ah Song. Naging magkaibigan silang dalawa. Ang kanilang kani-kanyang istorya sa pag-ibig ang nagpalakas ng kani-kanilang loob upang harapin ang mga pagsubok sa buhay. Ilang araw, natagpuan nina Lei at Qing He kung nasaan si Shan Cai. Pinilit nilang bumalik ito. Sa pagbalik ni Shan Cai, pilit itong umiiwas sa tuwing makikita si Dao Ming Si. Samantala, napagtanto niyang walang mangyayari kung patuloy siyang lalayo. Kaya naman hinarap niya si Dao Ming Si at isinauli ang kwintas. Ngunit itinapon ito ni Dao Ming Si sa isang fountain. Pagkaalis ni Dao Ming Si, nagpatulong siya kay Lei upang maibalik ang kwintas. Gumawa ng paraan si Lei para maayos ang lahat. Sinubukan niyang pagselosin si Dao Ming Si pero hindi ito umubra. Subalit sa loob ni Dao Ming Si ay nagseselos ito. Sa pag-uwi ni Shan Cai sa bahay na tinutuluyan, nakita nila ni Lei ang mga ilaw na nakahugis kagaya ng kwintas na ibinigay sa kanya ni Dao Ming Si. Labis siyang naantig. Di nagtagal, kinailangan ni Lei na magtungo sa Japan upang tulungan ang ama sa isang negosyo.

Dinala ni Xiao Zi si Shan Cai sa isang blind date. Isa sa naroon ay si Qing Yong na ang bawat galaw ay nagpapaalala sa kanya ng mga gawi ni Dao Ming Si. Sinabi ni Qing Yong na pinsan niya si Dao Ming Si gayong ang totoo ay binayaran lamang siya ni Dao Ming Feng upang magkahiwalay sina Dao Ming Si at Shan Cai. Sa pagdating ni Qing Yong, na sa tunay ay nagngangalang Ya Men, lalo lamang naunawaan ni Shan Cai kung gaano niya kamahal si Dao Ming Si. Nagbalikan sila at masayang nagsimula muli.

Nang mga panahong iyon, ang matalik na kaibigan naman ni Shan Cai na si Xiao You ay dumaranas ng mga pasakit. Labis itong umiibig kay Xi Men mula nang siya ay tulungan nito laban sa rati niyang boyfriend na walang kwenta. Nang mga sumunod na tagpo ay hindi naging maganda ang pakikitungo sa kanya ni Xi Men. Matapos gugulin ni Xiao You ang isang gabi sa piling ni Xi Men, umalis siya kasama ang buong pamilya na maninirahan na sa Canada.

Isang gabi, matapos ihatid si Shan Cai, kinidnap siya ng mga tauhan ng ina. Ikinulong siya sa kanyang kwarto at itinakdang makasal kay Xiao Zi. Sinubukan ng mga kaibigan (Lei, Xi Men, Mei Zuo) na iligtas si Dao Ming Si subalit sila ay nabigo. 

Nagtungo si Xiao Zi kay Shan Cai at sinabing ipaubaya na si Dao Ming Si. Sinabi rin niyang ayaw kumain at uminom ni Dao Ming Si. Nakadepende na lamang ito sa medikasyon. 

Nagpasya si Shan Cai na kausapin si Dao Ming Si. Pumayag si Dao Ming Feng subalit sila ay nag-usap nang hindi nagkakakitaan. Nasa kwarto si Ah Si, samantalang nasa labas, sa may pinto si Shan Cai.

Tinanong ni Shan Cai kung dapat na ba nilang itigil ang pagkakaunawaan. Sinabi ni Dao Ming Si na kung ayaw na niya, dapat ay sa simula pa nang magka-break sila ay hindi na sana siya nagpilit ayusin ang lahat. Dahilan dito, nabuo ang loob ni Shan Cai na harapin ang problema. Kung ayaw kumain ni Dao Ming Si, hindi rin siya kakain. Sa pangyayaring ito, nabwisit lamang si Dao Ming Feng. Sa labas, nagtigil sa kalye kinagabihan si Shan Cai sa kabila ng matinding buhos ng ulan. Nakita ito ni Dao Ming Feng at sinubukan lamang kung hanggang saan ang itatagal ni Shan Cai. Dumating si Dao Ming Zhuang at pinagsabihan ang ina na si Shan Cai ang pinakamabuting taong nakilala niya. Sinabi rin niya na mabuti pang pabayaan na lamang ng ina si Dao Ming Si sa gusto nito. Ayaw kasi niyang humantong ang nakababatang kapatid sa kanyang kinasapitan, ang pagpapakasal sa itinakda ng magulang. Pagkaalis ni Dao Ming Zhuang, pinag-isipan ng ina ang mga sinabi ng anak at nagdesisyong bumalik na lamang sa New York. Subalit bago siya umalis, nabuo sa isip niya ang mga ideyang maidudulot ng mahaba pang panahon.

Kinaumagahan, masayang ibinalita ni Auntie Jade kay Shan Cai na umalis na si Dao Ming Feng. Nagpunta kaagad si Shan Cai sa kinaroroonang silid ni Dao Ming Si. Nawalan siya ng malay sa mga bisig nito at nanumbalik ang mga sandaling sila ay magkasama.