PAUCA DE ME





Salve, lector benevole!    Nomen mihi est Marcus Nux (quod italice Marco Noce sonat).
Natus sum Augustae Taurinorum vicesimo tertio die mensis Augusti anno 1962 p.Ch.n., id est ante diem X Kalendas Septembres anno MMDCCXV a.u.c.  Inter 1976 et 1981 in Lyceo Classico "Istituto Sociale", a patribus Societatis Iesu recto, didici.   Litteras deinde Graecas et Latinas in Universitate Studiorum Taurinensi studui, ubi anno 1986 doctoris gradum adeptus sum, thesi perscripta, cui erat inscriptio De verbo Kosmos et verbis a Kosmos derivatis in poematis epicis Graecis antiquis.
Inter annum 1985 et 1992 particeps fui officinae librariae et societatis poeticae Taurinensis "L'Arzanà": duo etiam volumina poetica italice scripsi et vulgavi, quorum alterum Dissimulati affetti (Dissimulati affectus) alterum Sott'altra luce (Alia sub luce) inscribitur.
Post lauream doctoratum apud Universitates Studiorum Taurinensem et Genuensem adivi, in quo cognationi Italicorum poetarum saeculi XV cum Latinis auctoribus studui.   Inter 1987 et 1993 nonnullis academicis seminariis de Litteris Italicis interfui breviaque scripta critica exaravi; praeterea opus latinum Francisci Petrarca quod De Vita Solitaria inscribitur in Italicum sermonem verti et explanavi.
Eodem tempore, examinibus superatis, litterarum classicarum et Italicarum magister factus sum: ab anno 1986 in nonnullis Lyceis et privatis et publicis provinciae Taurinensis linguam Latinam Graecamque docui.
Vixi vero quinque annos in vico alpino hodie Oulx vocato, qui autem olim Mansio Ad (fanum) Martis fuit, septima statio in via qua ad Galliam ibatur: magister beatus ibi fui in parvo sed optimo Lyceo et in otio clavichordista in scholae "rock" globo. Postea, anno 1998, Saraievum, Bosniae caput, abii, ut lector Italicam linguam apud Universitatem docerem et legatus culturae litteras artesque Italicas in regione illa, a bello terribili nuper devastata, diffunderem.
Nunc autem, post reditum in Italiam, in Lyceo Classico Europaeo apud ephebeum publicum Taurinense, cui est nomen Convitto Nazionale Umberto I, occupatus sum.
Scriptor etiam sum, una cum Elisabeta Valfrè di Bonzo, optima latinae linguae magistra, cuiusdam libelli ad usum scholarum quo discipulis explanantur poemata epica et cuiusdam collectionis exercitationum Latinarum.  Praeterea commentarium didacticum de lingua latina publicavimus, grammaticam exercitationesque continentem, cui est inscriptio Lingua madre.
Uxorem habeo Lauram Ugoccioni, causidicam, et liberos tres: Beatricem, Mariaclaram, Iacobum.





BACK TO HOME PAGE

Hosted by www.Geocities.ws

1