|
ZingSol Website
|
|
Malaysia Zingsol khol ( 2 ), Hawm 13, 14, 15, 16, 17, 18, 19, 20, 21, 22, 23, 24, HAWM (8) NA. ZEISU SUAH LUNGDAMNA“Lau
kei un,mi khempeuh ading alian mahmah lungdamna thu note kong puak hi.Tu ni –in
David khaupiah note ading honpa khat suak khin zo hi;amah Topa khrist ahi hi.”(ZIV
Luka 2:10-11)
I nuntak hun sungah i nunglam panin sihna in hong phak dongin hong delh
den a,i mai ah zong phak zawh lohin hun leh ni te’n hong pai san den hi.Tuamah
bangin tu in December kha hong tung kik zelin A.D 2001kum abei ding hi ta a,A.D
2002 kum zong amuak thei ding ihi ta hi.Hih hun hong tun simin leitung mun
tuamtuam-ah thu um mi(Christian) te in lungdam kipaakin hong suak naungek Topa
Zeisu muak in lungdam pawi (Christmas) ki bawl ziahziah hi. Mi bang a hong suak Pasian(Mate
1:22-23) Christmas ni pen mi kimkhat in Topa
Zeisu pian ni ci-in ngaihsun kha thei a, ahi zong in Topa Zeisu pen lei pian ma
pek a, a na om khin Pasian ahi hi.(Late 90:3) Adam mawhna hangin mi khempeuh
mawhnei mi suakin asi ding vive ihi hi.(Zawmah 5:12) Tua sihna pan mihingte a
hon khiazo ding kuamah leitungah om lo hi.Tua ahih manin mawhna amuhdah hang
mawhneite a it Pasian in i mawhnate hangin sihna pan hon khia dingin amah mah
leitungah mi bangin hong suak hi. Pasian pen vanglian in asiangtho Pasian,
Khasiangtho Pasian ahih manin mihing te’n ki mu thei lo hi.Mi te’n amit tawh
amuh theih na dingin mi bangin leitungah hong suak ahi hi.(Luka 2:32-32) “Nungak
khat gai-in tapa khat nei ding a, amin dingin Emmanuel ki phuak ding hi, ci hi.
Emmanuel akhiatna in eite tawh Pasian hong om khawm hi; acih na ahi
hi.(Mate1:23) Hong suah
zia leh a hun (Luka 2:1-7) Bethlehem khua-ah Zeisu hong suah lai-in
Zudah gam khua tuamtuam pan’ mi kisimna(census) bawl dingin mi tampi hong ki
kai khawm uh hi.Tua mite lakah Zawtah leh nau suah hun a cingta Mazih zong ki
hel hi.Zin tun nading mun mu zo lo ahih manun bawngbuk sungah hong suak in,
bawngan kuang sungah naungek sial
uh hi.Midangte amau vai ciat tawh buai uh ahih manin tua naungek thudon kha
loin, zong bia kha lo uh hi.Tua ahih manin Topa Zeisu suahni pen kua mah in
ciamteh khalo hi. Tua hun lai-in Herod in
kumpi asep laitak hi a, B.C(4) kum pawl hi dingin ki ngaihsun hi. Zawmah kumpi
Constantine hun A.D 325 kum pan in December kha
(25)ni pen Christmas ni ci-in ki ciamteh a, tu ni ciangdong ki zang hi. Bawl
ding ki lawm Christmas
A hun leh ani a ki tel loh hangin Topa Zeisu hong suak takpi cih ki tel
sinsen a, tua in Pasian geelna a thuk zia a kilatna khat ahi hi.Bang hang hiam
cihleh suahni sang in asuakpa biak ding,theih ding, neih ding leh lungdam ding a
thupi zawkna Pasian in hong deih zaw ahi hi.Suahni pawi bawl ding thu
Laisiangtho in hong lak lo ban ah Topa Zeisu mahmah asuahni pawi khatvei zong
bawl ngei loin,sawltak te’n zong Christmas pawi bawl ngei lo uh hi.Ahi zongin
tua suahni in leitung mite honkhia ding hong suak Zeisu pen leitung bup
pawlpi tuamtuam in phawk khawm a, aki bang a lungdam pawi bawl ding ki lawm sa
in na ciamteh uh hi.Mi khempeuh in tua suahni tungtawnin Pasian vangliatna leh a
hoihnate aki lat khiat theih na dingin khiatna nei tak a bawl ding ahi hi.Pasian
ngiimna bulpi gupkhiatna thu pen suahna tawh hong ki pan khia in singlamteh
tungah sihna thuak a, thawhkikna tawh hong gualzo hi.Suahna om loin sihna leh
thawhkikna om thei lo ahih manin Christmas pawi lawp tak a bawl ding a ki lawm
ni ahi hi. Christmas
muak zia pawlkhat (Jeremiah10:2-3)
Tu hun ciangin khiatna nei leh man nei tak a ki bawl suahni lungdam pawi
om nawn lo phial ta hi.Ngeina pawi bawl bangin ki ngaihsun ta in zu leh sa
neekna dawnna,laamna, sumzonna cih te leh stageshow bawlna te tawh ki muak ta
hi.Thu umlo mite gamtat zia tawh ki lamdang nawnlo zah in ki kalsuan ta hi.Hong
suak pa sangin hong suahna pawi thu ah ahi zongin,Pasian ngiimna bulpi suahna ii
deihna sangin suahna pawi thu ah ki lawp ngaihsut zaw ta hi.Tua ahih manin tu ni-
in suahna pawi muak loin a suakpa muak in, i lungdam theih ding thu pi pen hi. A ki cing
lungnopna (Luka 2:10) Mawhna sungah awkcip a ,agammang
i kha in suahtakna a ngah ciang bek in nakpi lungdamna leh aki cing lungnopna ki
ngah thei bek hi.Tun na ding mun a thei tel lo te a gammang hi a, na nuntak lai
tu ni-in khensat a, na theih tel nai kei leh agam mang mah na hi lai hi. Mi khem peuh in
lung nopna ngah
nuam ciat a, pilna siamna leh sumleh paiite tawh lei ding a sawm zong om
hi.Tuate tawh zon theih lungnopna te akingah hangin tomno sung bek ki mangin kha
suahtakna pia zolo ahih manin phattuamna om lo hi. (Mate 16: 26) Topa sung bek
ah lung nop na ki cing a, ama hong hehpihna letsong umin, i san ciang ki ngah
thei bek hi.Bethlehem khua-ah Zeisu hongsuah lai-in tuu cing te leh mipilte in
tua naungek a muak uh ciangin nakpi lungdam uh a, a na biak masak bangin ei zong
tua naungek(Zeisu) i san ciang lungdam thei in suakta takin i nungta thei ding
hi.Tua lungdamna thu in ei te sihna tawh hong ki pelh sak bek hi loin aki
dim nuntakna pia dingin hong pai ahi hi.(Zawhang 10:10) Hehpihna pan hong
luanng lungdamna thu pen upna bek tawh ki ngah thei in thalawh kul lo ahih manin
up ding bek mah ki sam hi.(Ephet 2:8) Ka
hehpihna thupha nang ading in ki cing hi. (2Korin 12:9) Nuntak
pih ding (1Zawhang 5:12,
Ephet 3:17) A
beisa kum 2000 val lai-in Bethlehem khua-ah hong suak Emmanuel Pasian in tu ni-in
zong nang leh kei tawh za ni tu ni a tawntung ki khel lo in hong ompih lai hi.
Bethlehem khua bawng an kuang sungah hong
suak kik nawn lo ding a, nang leh kei lungtang sungah hong suak nuam in hong
zong zong hi. Zintun na ding mun mu zo lo in a niamna mun leilak bawng ankuang
sungah hong suah mah bangin nang leh kei zong ei hih zawhnate tung ki nga kha lo
a, lungsim ki niamkhiatna tawh muak dingin i ki phal leh aman hong mu ding hi. I
lungtang sungah huhpa Khasiangtho in hong luahin Pasian deihna bangin i nungta
ding hi. December kha (25) ni bek hi lo in ni sim nuntakna-ah Christmas pawi man
neitak leh khiatna nei takin a bawl den ihi ding hi. Suah kum, ni leh khate
thupi masa lo in sihna pan nuntakna
sungah hong hon khia pa lungsimbup tawh um a, san ding a thupi pen ahi hi. Tua
in Pasian deihna bulpi leh mi khempeuh ading alian mahmah lung damna thu hi a, i nuntak pih ding ahi hi. Zeisu hong suahni lungdam
in i muak ziahziah mah bangin mi
siangte la ding hong pai kik ciangin zong lungdam ki paak takin a muak thei
dingin mimal kim ki ging sa-in om ciat ni.(Maku 13:33)
Khazih sungah, Thang Gin Mang.
|