KANAAN LEH GOSHEN
Malaysia a om teeltuam Zomi sanggam a kua ma ciat a manpha mahmah ih ToPa Zeisu Khazih min siangtho tawh kong hopih masa hi. Hih gam ah tawlkhat ih om sung i lungngaih khop dingin, KANAAN LEH GOSHEN cih thu hong gelh ka hi hi.
KANAAN
Kanaan gam I cih pen PaSian in Israel minamte luah dingin a piak ngiat leitangh a hi hi. PaSian in Abraham tungah pia (iacil 12:6-7); Isaak tungah pia (Piancil 12:1-6); Jacob tungah pia hi (Piancil 28:10-15). PaSian in Israel te Kanaan a piak bang mah in, I pu I pate lutang phum nasa a hi, I Zogam zong eite luah ngiat dingin hong piak a hi hi.
GOSHEN
Goshen leitangh I cih pen lzipt gamsung panin lonona leitangh hoih pen na mum a hi hi. Kanaan gam pen kialpi hong tungin, leitangh hong keu ciangin Jacob innkuan (Israel) te Izipt ah an taw dingin paisuk a, tualai ah PaSian in thupha pia in leitangh ii thau ne sak hi (Piancil 45:18; 46:3-4; 47:5-6). Tua mah bangin ei Zomite zong thupha ngah minam ki hi napi in, I Kawlgam leitangh ngiat in, thupha ngah nailo a hih manin nuntak hamsatna tawh an tawh an taw ding leh PaSian thupha lo dingin hih gamah a paikhia i hi hi.
Topa mangngilh kei ni
Israel mite in Goshen leitangah nuamsa in kawhsa kham piikpeek in hong om ciangin, ToPa hong mangngilh ta uh hi. Tuaciangin Iziptte sila in hong om ta uh a, gentheih, bawlsiatna leh thahna ciang dong hong thuak uh hi. Ei zong hih leitangh pan ih thalawhsa khamin ei le ei ki hihsakna tawh Topa I mangngilh kha thei ding hi. Mite kiangah gen gam ding a hilo ih nuntak ziate leh ih ki pathiat dante phawk kik ni. Leivui pan leh ninphual pan a hong laamto pilna siamna neilo Zomite hih leitangh pan thupha tampi I lawh theihna pen ih Topa hong hehpihna hang bek hi cih mangngilh lo ding hi hang.
ZAWTAH BANGIN
Jacob innkuan nuntak na dingin PaSian in Zawtah pen Izipt gam ah na ma puakin a niam pen sila panin ki pan a, gentheih haksatna, ze-etna tampi hong thuak to hi. Ei zong I sanggam I nu leh I pate nuntakna dingin ToPa in haksatna leh lauhuaina tampi hong nawk pih in hih leitang ah hong pauk a hi hi. Tua a hih nanin ei leh ei ki neu sak kei ni. Mite’n bang mah in hong sim kei zongin I nu leh I pa, I innkuanpihte tungah thupha luanna naak in ToPa’n hong bawl a hih manin ToPa tungah lungdam ko tawntung ni. I ngah thuphate zong Zawtah bang mahin meet bawl ni. Sap tuakte samin, laptoh ding a kulte zong lamto ding hi hang.
LUAH DING A PASIAN HONG PIAK LEITANGH THUPI HI
Israel (Jacob) a sih ding hun a nai ciangin a mahin a tapa Joseph (Zawtah) samin a ma kiangah, "Izipt ah kei hong vui kei in la, ka pa te tawh hong sial khawm in. Izipt panin kei hong pua khia in la, a mau ki vuina ah kei hong vui in", ci hi (Piancil 47:29-30). Jacob pen lono na Goshen leitangah nuntak nuam a sak hangin hong sih kuan ciangin, keu thilthial mah tase leh lah dinga PaSian in a piak Kanaan gam pen hong lungulh teutau mawk hi. Ei zong a keu thilthial I Zongam leh I nu I pa, I u I naute in pumpi cidam tak leh lawh cing takin, I ciah kik ding hong lam en mahmah in, hong ngak ngiungeu in pumpi cidam tak leh lawh cing takin, I ciah kik ding hong lam en mahmah in, hong ngak ngingeu hi. Tua ahih manin Zo momno te in I pumpi I lungstimte kem siam in, I thuphate zangh siam mah mah ciat ni.Eite a dingin Goshen leitangh a hi Malaysia a om Zomi a kua mah ciat leitung thupha leh vantung thuphate tawh I Kanaan a hi I Zogam leitangh ah a zuan kik thei ciat dingin ToPa’n thupha hong pia ta hen!
Zeisu itna sungah, Jacob
