Oft him anhaga
are gebideð,
metudes miltse,
þeah þe he modcearig
geond lagulade
longe sceolde
hreran mid hondum
hrimcealde sæ
ƿadan ƿræclastas.
ƿyrd bið ful aræd!
Sƿa cƿæð eardstapa,
earfeþa gemyndig,
ƿraþra ƿælsleahta,
ƿinemæga hryre:
Oft ic sceolde ana
uhtna gehƿylce
mine ceare cƿiþan.
Nis nu cƿicra nan
þe ic him modsefan
minne durre
sƿeotule asecgan.
Ic to soþe ƿat
þæt biþ in eorle
indryhten þeaƿ,
þæt he his ferðlocan
fæste binde,
healde his hordcofan,
hycge sƿa he ƿille.
Ne mæg ƿerig mod
ƿyrde ƿiðstondan,
ne se hreo hyge
helpe gefremman.
Forðon domgeorne
dreorigne oft
in hyra breostcofan
bindað fæste;
sƿa ic modsefan
minne sceolde,
oft earmcearig,
eðle bidæled,
freomægum feor
feterum sælan,
siþþan geara iu
goldƿine minne
hrusan heolstre biƿrah,
ond ic hean þonan
ƿod ƿintercearig
ofer ƿaþema gebind,
sohte seledreorig
sinces bryttan,
hƿær ic feor oþþe neah
findan meahte
þone þe in meoduhealle
mine ƿisse,
oþþe mec freondleasne
frefran ƿolde,
ƿenian mid ƿynnum.
ƿat se þe cunnað
hu sliþen bið
sorg to geferan
þam þe him lyt hafað
leofra geholena:
ƿarað hine ƿræclast,
nales ƿunden gold,
ferðloca freorig,
nalæs foldan blæd.
Gemon he selesecgas
ond sincþege,
hu hine on geoguðe
his goldƿine
ƿenede to ƿiste.
ƿyn eal gedreas!
Forþon ƿat se þe sceal
his ƿinedryhtnes
leofes larcƿidum
longe forþolian:
ðonne sorg ond slæð
somod ætgædre
earmne anhogan
oft gebindað.
þinceð him on mode
þæt he his mondryhten
clyppe ond cysse,
ond on cneo lecge
honda ond heafod,
sƿa he hƿilum ær
in geardagum
giefstolas breac.
ðonne onƿæcneð eft
ƿineleas guma,
gesihð him biforan
fealƿe ƿegas,
baþian brimfuglas,
brædan feþra,
hreosan hrim ond snaƿ
hagle gemenged.
þonne beoð þy hefigran
heortan benne,
sare æfter sƿæsne.
Sorg bið geniƿad
þonne maga gemynd
mod geondhƿeorfeð;
greteð gliƿstafum,
georne geondsceaƿað
secga geseldan;
sƿimmað oft on ƿeg
fleotendra ferð
no þær fela bringeð
cuðra cƿidegiedda.
Cearo bið geniƿad
þam þe sendan sceal
sƿiþe geneahhe
ofer ƿaþema gebind
ƿerigne sefan.
Forþon ic geþencan ne mæg
geond þas ƿoruld
for hƿan modsefa
min ne gesƿeorce
þonne ic eorla lif
eal geondþence,
hu hi færlice
flet ofgeafon,
modge maguþegnas.
Sƿa þes middangeard
ealra dogra gehƿam
dreoseð ond fealleð;
forþon ne mæg ƿeorþan ƿis
ƿer, ær he age
ƿintra dæl in ƿoruldrice.
ƿita sceal geþyldig,
ne sceal no to hatheort
ne to hrædƿyrde,
ne to ƿac ƿiga
ne to ƿanhydig,
ne to forht ne to fægen,
ne to feohgifre
ne næfre gielpes to georn,
ær he geare cunne.
Beorn sceal gebidan,
þonne he beot spriceð,
oþþæt collenferð
cunne gearƿe
hƿider hreþra gehygd
hƿeorfan ƿille.
Ongietan sceal gleaƿ hæle
hu gæstlic bið,
þonne ealre þisse ƿorulde ƿela
ƿeste stondeð,
sƿa nu missenlice
geond þisne middangeard
ƿinde biƿaune
ƿeallas stondaþ,
hrime bihrorene,
hryðge þa ederas.
ƿoriað þa ƿinsalo,
ƿaldend licgað
dreame bidrorene,
duguþ eal gecrong,
ƿlonc bi ƿealle.
Sume ƿig fornom,
ferede in forðƿege,
sumne fugel oþbær
ofer heanne holm,
sumne se hara ƿulf
deaðe gedælde,
sumne dreorighleor
in eorðscræfe
eorl gehydde.
Yþde sƿa þisne eardgeard
ælda scyppend
oþþæt burgƿara
breahtma lease
eald enta geƿeorc
idlu stodon.
Se þonne þisne ƿealsteal
ƿise geþohte
ond þis deorce lif
deope geondþenceð,
frod in ferðe,
feor oft gemon
ƿælsleahta ƿorn,
ond þas ƿord acƿið:
Hƿær cƿom mearg? Hƿær cƿom mago?
Hƿær cƿom maþþumgyfa?
Hƿær cƿom symbla gesetu?
Hƿær sindon seledreamas?
Eala beorht bune!
Eala byrnƿiga!
Eala þeodnes þrym!
Hu seo þrag geƿat,
genap under nihthelm,
sƿa heo no ƿære.
Stondeð nu on laste
leofre duguþe
ƿeal ƿundrum heah,
ƿyrmlicum fah.
Eorlas fornoman
asca þryþe,
ƿæpen ƿælgifru,
ƿyrd seo mære,
ond þas stanhleoþu
stormas cnyssað,
hrið hreosende
hrusan bindeð,
ƿintres ƿoma,
þonne ƿon cymeð,
nipeð nihtscua,
norþan onsendeð
hreo hæglfare
hæleþum on andan.
Eall is earfoðlic
eorþan rice,
onƿendeð ƿyrda gesceaft
ƿeoruld under heofonum.
Her bið feoh læne,
her bið freond læne,
her bið mon læne,
her bið mæg læne,
eal þis eorþan gesteal
idel ƿeorþeð!
Sƿa cƿæð snottor on mode,
gesæt him sundor æt rune.
Til biþ se þe his treoƿe gehealdeþ,
ne sceal næfre his torn to rycene
beorn of his breostum acyþan,
nemþe he ær þa bote cunne,
eorl mid elne gefremman.
ƿel bið þam þe him are seceð,
frofre to Fæder on heofonum,
þær us eal seo fæstnung stondeð.