Mæġ iċ be me sylfum
soðġied ƿrecan,
siþas secġan,
hu iċ ġesƿincdagum
earfoðhƿile
oft þroƿade,
bitre breostceare
ġebiden hæbbe,
ġecunnad in ċeole
cearselda fela,
atol yþa ġeƿealc,
þær meċ oft biġeat
nearo nihtƿaco
æt nacan stefnan,
þonne he be clifum cnossað.
Calde ġeþrungen
ƿæron mine fet,
forste ġebunden,
caldum clommum,
þær þa ceare seofedun
hat ymb heortan;
hungor innan slat
mereƿerges mod.
þæt se mon ne ƿat
þe him on foldan
fægrost limpeð,
hu iċ earmceariġ
iscealdne sæ
ƿinter ƿunade
ƿræccan lastum,
ƿinemægum bidroren,
bihongen hrimgiċelum;
hæġl scurum fleag.
þær iċ ne ġehyrde
butan hlimman sæ,
iscaldne ƿæġ.
Hƿilum ylfete song
dyde iċ me to gomene,
ganetes hleoþor
ond huilpan sƿeg
fore hleahtor ƿera,
mæƿ singende
fore medodrince.
Stormas þær stanclifu beotan,
þær him stearn oncƿæð
isiġfeþera;
ful oft þæt earn biġeal,
uriġfeþra;
ne æniġ hleomæga
feasceaftiġ ferð
frefran meahte.
Forþon him ġelyfeð lyt,
se þe ah lifes ƿyn
ġebiden in burgum,
bealosiþa hƿon,
ƿlonc ond ƿingal,
hu iċ ƿeriġ oft
in brimlade
bidan sceolde.
Nap nihtscua,
norþan sniƿde,
hrim hrusan bond,
hæġl feol on eorþan,
corna caldast.
Forþon cnyssað nu
heortan ġeþohtas,
þæt iċ hean streamas,
sealtyþa ġelac
sylf cunnige;
monað modes lust
mæla ġehƿylce
ferð to feran,
þæt iċ feor heonan
elþeodigra
eard ġesece.
Forþon nis þæs modƿlonc
mon ofer eorþan,
ne his gifena þæs god,
ne in ġeoguþe to þæs hƿæt,
ne in his dædum to þæs deor,
ne him his dryhten to þæs hold,
þæt he a his sæfore
sorge næbbe,
to hƿon hine dryhten
ġedon ƿille.
Ne biþ him to hearpan hyge
ne to hringþege,
ne to ƿife ƿyn
ne to ƿorulde hyht,
ne ymbe oƿiht elles,
nefne ymb yða ġeƿealc,
ac a hafað longunge
se þe on lagu fundað.
Bearƿas blostmum nimað,
byrig fægriað,
ƿongas ƿlitigað,
ƿoruld onetteð;
ealle þa ġemoniað
modes fusne
sefan to siþe,
þam þe sƿa þenceð
on flodƿegas
feor ġeƿitan.
Sƿylċe ġeac monað
ġeomran reorde,
singeð sumeres ƿeard,
sorge beodeð
bitter in breosthord.
þæt se beorn ne ƿat,
esteadiġ secg,
hƿæt þa sume dreogað
þe þa ƿræclastas
ƿidost lecgað.
Forþon nu min hyge hƿeorfeð
ofer hreþerlocan,
min modsefa
mid mereflode
ofer hƿæles eþel
hƿeorfeð ƿide,
eorþan sceatas,
cymeð eft to me
gifre ond grædiġ,
ġielleð anfloga,
hƿeteð on hƿælƿeġ
hreþer unƿearnum
ofer holma ġelagu.
Forþon me hatran sind
dryhtnes dreamas
þonne þis deade lif,
læne on londe.
Iċ ġelyfe no
þæt him eorðƿelan
eċe stondað.
Simle þreora sum
þinga ġehƿylċe,
ær his tid aga,
to tƿeon ƿeorþeð;
adl oþþe yldo
oþþe ecghete
fægum fromƿeardum
feorh oðþringeð.
Forþon þæt bið eorla ġehƿam
æfter cƿeþendra
lof lifgendra
lastƿorda betst,
þæt he ġeƿyrċe,
ær he on ƿeġ scyle,
fremum on foldan
ƿið feonda niþ,
deorum dædum
deofle togeanes,
þæt hine ælda bearn
æfter hergen,
ond his lof siþþan
lifge mid englum
aƿa to ealdre,
ecan lifes blæd,
dream mid dugeþum.
Dagas sind ġeƿitene,
ealle onmedlan
eorþan riċes;
næron nu cyningas
ne caseras
ne goldġiefan
sƿylċe iu ƿæron,
þonne hi mæst mid him
mærþa ġefremedon
ond on dryhtlicestum
dome lifdon.
Ġedroren is þeos duguð eal,
dreamas sind ġeƿitene,
ƿuniað þa ƿacran
ond þas ƿoruld healdaþ,
brucað þurh bisgo.
Blæd is ġehnæged,
eorþan indryhto
ealdað ond searað,
sƿa nu monna ġehƿylċ
ġeond middanġeard.
Yldo him on fareð,
onsyn blacað,
gomelfeax gnornað,
ƿat his iuƿine,
æþelinga bearn,
eorþan forġiefene.
Ne mæġ him þonne se flæschoma,
þonne him þæt feorg losað,
ne sƿete forsƿelgan
ne sar ġefelan,
ne hond onhreran
ne mid hyge þencan.
þeah þe græf ƿille
golde stregan
broþor his ġeborenum,
byrgan be deadum,
maþmum mislicum
þæt hine mid ƿille,
ne mæġ þære saƿle
þe biþ synna ful
gold to ġeoċe
for godes egsan,
þonne he hit ær hydeð
þenden he her leofað.
Miċel biþ se meotudes egsa,
forþon hi seo molde oncyrreð;
se gestaþelade
stiþe grundas,
eorþan sceatas
ond uprodor.
Dol biþ se þe him his dryhten ne ondrædeþ;
cymeð him se deað unþinged.
Eadiġ bið se þe eaþmod leofaþ;
cymeð him seo ar of heofonum,
meotod him þæt mod ġestaþelað,
forþon he in his meahte ġelyfeð.
Stieran mon sceal strongum mode,
ond þæt on staþelum healdan,
ond ġeƿis ƿerum,
ƿisum clæne,
scyle monna ġehƿylċ
mid ġemete healdan
ƿiþ leofne ond ƿið laþne
bealo,
þeah þe he hine ƿille fyres
fulne
oþþe on bæle
forbærnedne
his ġeƿorhtne ƿine.
ƿyrd biþ sƿiþre,
meotud meahtigra
þonne ænges monnes ġehygd.
Uton ƿe hycgan
hƿær ƿe ham agen,
ond þonne ġeþencan
hu ƿe þider cumen,
ond ƿe þonne eaċ tilien,
þæt ƿe to moten
in þa ecan
eadiġnesse,
þær is lif ġelong
in lufan dryhtnes,
hyht in heofonum.
þæs sy þam halgan þonc,
þæt he usic ġeƿeorþade,
ƿuldres ealdor,
eċe dryhten,
in ealle tid.
Amen.