Ic ƿat indryhtne
æþelum deorne
giest in geardum,
þam se grimma ne mæg
hungor sceððan
ne se hata þurst,
yldo ne adle.
Gif him arlice
esne þenað,
se þe agan sceal
on þam siðfate,
hy gesunde æt ham
findað ƿitode him
ƿiste ond blisse,
cnosles unrim,
care, gif se esne
his hlaforde
hyreð yfle,
frean on fore.
Ne ƿile forht ƿesan
broþor oþrum.
Him þæt bam sceðeð,
þonne hy from bearme
begen hƿeorfað
anre magan
ellorfuse,
moddor ond sƿeostor.
Mon, se þe ƿille,
cyþe cyneƿordum
hu se cuma hatte,
eðþa se esne,
þe ic her ymb sprice.
ƿrætlic hongað
bi ƿeres þeo,
frean under sceate.
Foran is þyrel.
Bið stiþ ond heard,
stede hafað godne;
þonne se esne
his agen hrægl
ofer cneo hefeð,
ƿile þæt cuþe hol
mid his hangellan
heafde gretan
þæt he efenlang ær
oft gefylde.
Ic on ƿincle gefrægn
ƿeaxan nathƿæt,
þindan ond þunian,
þecene hebban;
on þæt banlease
bryd grapode,
hygeƿlonc hondum,
hrægle þeahte
þrindende þing
þeodnes dohtor.
ƿer sæt æt ƿīne
mid his ƿīfum tƿām
ond his tƿēgen suno
ond his tƿā dohtor,
sƿāse gesƿeostor,
ond hyra suno tƿēgen,
frēolico frumbearn,
fæder ƿæs þǣr inne
þāra æþelinga
ǣghƿæðres mid,
ēam ond nefa.
Ealra ƿǣron fīfe
eorla ond idesa
insittendra.
Moððe ƿord fræt--
me þæt þuhte
ƿrætlicu ƿyrd
þa ic þæt ƿundor gefrægn,
þæt se ƿyrm forsƿealg
ƿera gied sumes,
þeof in þystro,
þrymfæstne cƿide
ond þæs strangan staþol.
Stælgiest ne ƿæs
ƿihte þy gleaƿra,
þe he þam ƿordum sƿealg.
Ic gefrægn for hæleþum
hring gyddian,
torhtne butan tungan,
tila þeah he hlude
stefne ne cirmde,
strongum ƿordum.
Sinc for secgum
sƿigende cƿæð:
"Gehæle mec,
helpend gæsta."
Ryne ongietan
readan goldes
guman galdorcƿide,
gleaƿe beþencan
hyra hælo to Gode,
sƿa se hring gecƿæð.
Ic ƿat eardfæstne
anne standan,
deafne, dumban,
se oft dæges sƿilgeð
þurh gopes hond
gifrum lacum.
Hƿilum on þam ƿicum
se ƿonna þegn,
sƿeart ond saloneb,
sendeð oþre
under goman him
golde dyrran,
þa æþelingas
oft ƿilniað,
cyningas ond cƿene.
Ic þæt cyn nu gen
nemnan ne ƿille,
þe him to nytte sƿa
ond to dugþum doþ
þæt se dumba her,
eorp unƿita,
ær forsƿilgeð.
ƿiga is on eorþan
ƿundrum acenned
dryhtum to nytte,
of dumbum tƿam
torht atyhted,
þone on teon ƿigeð
feond his feonde.
Forstrangne oft
ƿif hine ƿrið.
He him ƿel hereð,
þeoƿaþ him geþƿære,
gif him þegniað
mægeð ond mæcgas
mid gemete ryhte,
fedað hine fægre;
he him fremum stepeð
life on lissum.
Leanað grimme
þam þe hine ƿloncne
ƿeorþan læteð.
Ic seah ƿrætlice
ƿuhte feoƿer
samed siþian;
sƿearte ƿæran lastas,
sƿaþu sƿiþe blacu.
Sƿift ƿæs on fore,
fuglum framra;
fleag on lyfte,
deaf under yþe.
Dreag unstille
ƿinnende ƿiga
se him ƿegas tæcneþ
ofer fæted gold
feoƿer eallum.
Ic seah ræpingas
in ræced fergan
under hrof sales
hearde tƿegen,
þa ƿæron genamnan,
nearƿum bendum
gefeterade
fæste togædre.
þara oþrum ƿæs
an getenge
ƿonfah ƿale,
seo ƿeold hyra
bega siþe
bendum fæstra.