ƿiht cƿom æfter ƿege
ƿrætlicu liþan;
cymlic from ceole
cleopode to londe,
hlinsade hlude--
hleahtor ƿæs gryrelic,
egesful on earde
Ecge ƿæron scearpe.
ƿæs hio hetegrim,
hilde to sæne,
biter beadoƿeorca
Bordƿeallas grof,
heardhiþende.
Heterune bond!
sægde searocræftig
ymb hyre sylfre gesceaft:
"Is min modor
mægða cynnes
þæs deorestan,
þæt is dohtor min
eacen uploden,
sƿa þæt is ældum cuþ,
firum on folce,
þæt seo on foldan sceal
on ealra londa gehƿam
lissum stondan."
Ic ƿiht geseah
in ƿera burgum,
seo þæt feoh fedeð.
Hafað fela toþa;
nebb biþ hyre æt nytte,
niþerƿeard gongeð,
hiþeð holdlice
ond to ham tyhð,
ƿæþeð geond ƿeallas,
ƿyrte seceð;
Aa heo þa findeð,
þa þe fæst ne biþ;
læteð hio þa ƿlitigan,
ƿyrtum fæste,
stille stondan
on staþolƿonge,
beorhte blican,
bloƿan ond groƿan.
Mec se ƿæta ƿong,
ƿundrum freorig,
of his innaþe
ærist cende.
Ne ƿat ic mec beƿorhtne
ƿulle flysum,
hærum þurh heahcræft,
hygeþoncum min:
ƿundene me ne beoð ƿefle,
ne ic ƿearp hafu,
ne þurh þreata geþræcu
þræd me ne hlimmeð,
ne æt me hrutende
hrisil scriþeð,
ne mec ohƿonan
sceal am cnyssan.
ƿyrmas mec ne aƿæfan
ƿyrda cræftum,
þa þe geolo godƿebb
geatƿum frætƿað.
ƿile mec mon hƿæþre seþeah
ƿide ofer eorþan
hatan for hæleþum
hyhtlic geƿæde.
Saga soðcƿidum,
searoþoncum gleaƿ,
ƿordum ƿisfæst,
hƿæt þis geƿæde sy.
Ic ƿiht geseah
on ƿege feran,
seo ƿæs ƿrætlice
ƿundrum gegierƿed:
hæfde feoƿere
fet under ƿombe
hæfde tu fiþru
ond tƿelf eagan
ond siex heafdu.
Saga hƿæt hio ƿære.
For flodƿegas;
ne ƿæs þæt na fugul ana,
ac þær ƿæs æghƿylces
anra gelicnes
horses ond monnes,
hundes ond fugles,
ond eac ƿifes ƿlite.
þu ƿast, gif þu const,
to gesecganne,
þæt ƿe soð ƿitan--
hu þære ƿihte
ƿise gonge.
Ic þa ƿihte geseah--
ƿomb ƿæs on hindan
þriþum aþrunten.
þegn folgade,
mægenrofa man,
ond micel hæfde
gefered þæt hit felde,
fleah þurh his eage.
Ne sƿylteð he symle,
þonne syllan sceal
innað þam oþrum,
ac him eft cymeð
bot in bosme,
blæd biþ aræred;
He sunu ƿyrceð,
bið him sylfa fæder.
Ic þa ƿiht geseah
ƿæpnedcynnes,
geoguðmyrþe grædig;
him on gafol forlet
ferðfriþende
feoƿer ƿellan
scire sceotan
on gesceap þeotan.
Mon maþelade,
se þe me gesægde:
"Seo ƿiht, gif hio gedygeð,
duna briceð;
gif he tobirsteð,
bindeð cƿice."
Geƿritu secgað
þæt seo ƿiht sy
mid moncynne
miclum tidum
sƿeotol ond gesyne.
Sundorcræft hafað
maran micle,
þonne hit men ƿiten.
Heo ƿile gesecan
sundor æghƿylcne
feorhberendra,
geƿiteð eft feran on ƿeg.
Ne bið hio næfre
niht þær oþre,
ac hio sceal ƿideferh
ƿreccan laste
hamleas hƿeorfan;
no þy heanre biþ.
Ne hafað hio fot ne folme,
ne æfre foldan hran,
ne eagena
ægþer tƿega,
ne muð hafaþ,
ne ƿiþ monnum spræc,
ne geƿit hafað,
ac geƿritu secgað
þæt seo sy earmost
ealra ƿihta,
þara þe æfter gecyndum
cenned ƿære.
Ne hafað hio saƿle ne feorh,
ac hio siþas sceal
geond þas ƿundorƿoruld
ƿide dreogan.
Ne hafaþ hio blod ne ban,
hƿæþre bearnum ƿearð
geond þisne middangeard
mongum to frofre.
Næfre hio heofonum hran,
ac hio sceal ƿideferh
ne to helle mot,
ƿuldorcyninges
larum lifgan.
Long is to secganne
hu hyre ealdorgesceaft
æfter gongeð,
ƿoh ƿyrda gesceapu;
þæt is ƿrætlic þing
to gesecganne.
Soð is æghƿylc
þara þe ymb þas ƿiht
ƿordum becneð;
ne hafað heo ænig lim,
leofaþ efne seþeah.
Gif þu mæge reselan
recene gesecgan
soþum ƿordum,
saga hƿæt hio hatte.
Ece is se scyppend,
se þas eorþan nu
ƿreðstuþum ƿealdeð
ond þas ƿorld healdeð.
Rice is se reccend
ond on ryht cyning
ealra anƿalda,
eorþan ond heofones,
healdeð ond ƿealdeð,
sƿa he ymb þas utan hƿeorfeð.
He mec ƿrætlice
ƿorhte æt frymþe,
þa he þisne ymbhƿyrft
ærest sette,
heht mec ƿæccende
ƿunian longe,
þæt ic ne slepe
siþþan æfre,
ond mec semninga
slæp ofergongeþ,
beoð eagan min
ofestum betyned.
þisne middangeard
meahtig dryhten
mid his onƿalde
æghƿær styreð;
sƿa ic mid ƿaldendes
ƿorde ealne
þisne ymbhƿyrft
utan ymbclyppe.
Ic eom to þon bleað,
þæt mec bealdlice mæg
gearu gongende
grima abregan,
ond eofore eom
æghƿær cenra,
þonne he gebolgen
bidsteal giefeð;
ne mæg mec ofersƿiþan
segnberendr
ænig ofer eorþan,
nymþe se ana God
se þisne hean heofon
healdeþ ond ƿealdeþ.
Ic eom on stence
strengre micle
þonne ricels
oþþe rose sy,
—
on eorþan tyrf
ƿynlic ƿeaxeð;
ic eom ƿræstre þonne heo.
þeah þe lilie sy
leof moncynne,
beorht on blostman,
ic eom betre þonne heo;
sƿylce ic nardes stenc
nyde ofersƿiþe
mid minre sƿetnesse
symle æghƿær,
ond ic fulre eom
þonne þis fen sƿearte
þæt her yfle
adelan stinceð.
Eal ic under heofones
hƿearfte recce,
sƿa me leof fæder
lærde æt frymþe,
þæt ic þa mid ryhte
reccan moste
þicce ond þynne;
þinga gehƿylces
onlicnesse
æghƿær healde.
Hyrre ic eom heofone,
hateþ mec heahcyning
his deagol þing
dyre bihealdan;
eac ic under eorþan
al sceaƿige
ƿom ƿraðscrafu
ƿraþra gæsta.
Ic eom micle yldra
þonne ymbhƿyrft þes
oþþe þes middangeard
meahte geƿeorþan,
ond ic giestron ƿæs
geong acenned
mære to monnum
þurh minre modor hrif.
Ic eom fægerre
frætƿum goldes,
þeah hit mon aƿerge
ƿirum utan;
ic eom ƿyrslicre
þonne þes ƿudu fula
oððe þis ƿaroð
þe her aƿorpen ligeð.
Ic eorþan eom
æghƿær brædre,
ond ƿidgielra
þonne þes ƿong grena;
folm mec mæg bifon
ond fingras þry
utan eaþe
ealle ymbclyppan.
Heardra ic eom ond
caldra þonne se hearda forst,
hrim heorugrimma,
þonne he to hrusan cymeð;
ic eom Ulcanus
up irnendan
leohtan leoman
lege hatra.
Ic eom on goman
gena sƿetra
þonne þu beobread
blende mid hunige;
sƿylce ic eom ƿraþre
þonne ƿermod sy
þe her on hyrstum
heaseƿe stondeþ.
Ic mesan mæg
meahtelicor
ond efnetan
ealdum þyrse,
ond ic gesælig mæg
symle lifgan
þeah ic ætes ne sy
æfre to feore.
Ic mæg fromlicor
fleogan þonne pernex
oþþe earn oþþe hafoc
æfre meahte;
nis zefferus,
se sƿifta ƿind,
þæt sƿa fromlice
mæg feran æghƿær;
me is snægl sƿiftra,
snelra regnƿyrm
ond fenyce
fore hreþre;
is þæs gores sunu
gonge hrædra,
þone ƿe ƿifel
ƿordum nemnað.
Hefigere ic eom micle
þonne se hara stan
oþþe unlytel
leades clympre,
leohtre ic eom micle
þonne þes lytla ƿyrm
þe her on flode gæð
fotum dryge.
Flinte ic eom heardre
þe þis fyr drifeþ
of þissum strongan
style heardan,
hnescre ic eom micle
halsrefeþre,
seo her on ƿinde
ƿæƿeð on lyfte.
Ic eorþan eom
æghƿær brædre
ond ƿidgelra
þonne þes ƿong grena;
ic uttor eaþe
eal ymbƿinde,
ƿrætlice geƿefen
ƿundorcræfte.
Nis under me
ænig oþer
ƿiht ƿaldendre
on ƿorldlife;
ic eom ufor
ealra gesceafta,
þara þe ƿorhte
ƿaldend user,
se mec ana mæg
ecan meahtum,
geþeon þrymme,
þæt ic onþunian ne sceal.
Mara ic eom ond strengra
þonne se micla hƿæl,
se þe garsecges
grund bihealdeð
sƿeartan syne--
ic eom sƿiþre þonne he,
sƿylce ic eom on mægene
minum læsse
þonne se hondƿyrm,
se þe hæleþa bearn,
secgas searoþoncle,
seaxe delfað;
Ne hafu ic in heafde
hƿite loccas
ƿræste geƿundne,
ac ic eom ƿide calu;
ne ic breaga ne bruna
brucan moste,
ac mec bescyrede
scyppend eallum.
ne me ƿrætlice
ƿeaxað on heafde
þæt me on gescyldrum
scinan motan
ful ƿrætlice
ƿundne loccas.
Mara ic eom ond fættra
þonne amæsted sƿin,
bearg bellende,
þe on bocƿuda,
ƿon ƿrotende
ƿynnum lifde
þæt he
—
—
edniƿu;
þæt is moddor
monigra cynna,
þæs selestan,
þæs sƿeartestan,
þæs deorestan
þæs þe dryhta bearn
ofer foldan sceat
to gefean agen.
Ne magon ƿe her in eorþan
oƿiht lifgan,
nymðe ƿe brucen
þæs þa bearn doð.
þæt is to geþencanne
þeoda gehƿylcum,
ƿisfæstum ƿerum,
hƿæt seo ƿiht sy.
Ic seah ƿyhte
ƿrætlice tƿa
undearnunga
ute plegan
hæmedlaces;
hƿitloc anfeng
ƿlanc under ƿædum,
gif þæs ƿeorces speoƿ,
fæmne fyllo.
Ic on flette mæg
þurh runstafas
rincum secgan,
þam þe bec ƿitan,
bega ætsomne
naman þara ƿihta.
þær sceal Nyd ƿesan
tƿega oþer
ond se torhta æsc
an an linan,
Acas tƿegen,
Hægelas sƿa some.
Hƿylc þæs hordgates
cægan cræfte
þa clamme onleac
þe þa rædellan
ƿið rynemenn
hygefæste heold
heortan beƿrigene
orþoncbendum?
Nu is undyrne
ƿerum æt ƿine
hu þa ƿihte mid us,
heanmode tƿa,
hatne sindon.