Agob is min noma
eft onhƿyrfed;
ic eom ƿrætlic ƿiht
on geƿin sceapen.
þonne ic onbuge,
ond me of bosme fareð
ætren onga,
ic beom eallgearo
þæt ic me þæt feorhbealo
feor asƿape.
Siþþan me se ƿaldend,
se me þæt ƿite gescop,
leoþo forlæteð,
ic beo lengre þonne ær,
oþþæt ic spæte,
spilde geblonden,
ealfelo attor
þæt ic ær geap.
Ne togongeð þæs
gumena hƿylcum,
ænigum eaþe
þæt ic þær ymb sprice,
gif hine hrineð
þæt me of hrife fleogeð,
þæt þone mandrinc
mægne geceapaþ,
fullƿered fæste
feore sine.
Nelle ic unbunden
ænigum hyran
nymþe searosæled.
Saga hƿæt ic hatte.
Ic eom ƿunderlicu ƿiht--
ƿræsne mine stefne,
hƿilum beorce sƿa hund,
hƿilum blæte sƿa gat,
hƿilum græde sƿa gos,
hƿilum gielle sƿa hafoc,
hƿilum ic onhyrge
þone hasƿan earn,
guðfugles hleoþor,
hƿilum glidan reorde
muþe gemæne,
hƿilum mæƿes song,
þær ic glado sitte.
G mec nemnað,
sƿylce æ
ond R O fullesteð,
H ond I.
Nu ic haten eom
sƿa þa siex stafas
sƿeotule becnaþ.
Ic eom ƿunderlicu ƿiht,
ƿifum on hyhte,
neahbuendum nyt.
Nængum sceþþe
burgsittendra
nymþe bonan anum.
Staþol min is steapheah;
stonde ic on bedde,
neoþan ruh nathƿær.
Neþeð hƿilum
ful cyrtenu
ceorles dohtor,
modƿlonc meoƿle,
þæt heo on mec gripeð,
ræseð mec on reodne,
reafað min heafod,
fegeð mec on fæsten.
Feleþ sona
mines gemotes
seo þe mec nearƿað,
ƿif ƿundenlocc--
ƿæt bið þæt eage.
Mec feonda sum
feore besnyþede,
ƿoruldstrenga binom,
ƿætte siþþan,
dyfde on ƿætre,
dyde eft þonan,
sette on sunnan
þær ic sƿiþe beleas
herum þam þe ic hæfde.
Heard mec siþþan
snað seaxses ecg,
sindrum begrunden;
fingras feoldan,
ond mec fugles ƿyn
geond speddropum
spyrede geneahhe,
ofer brunne brerd,
beamtelge sƿealg,
streames dæle,
stop eft on mec,
siþade sƿeartlast.
Mec siþþan ƿrah
hæleð hleobordum,
hyde beþenede,
gierede mec mid golde;
forþon me gliƿedon
ƿrætlic ƿeorc smiþa,
ƿire bifongen.
Nu þa gereno
ond se reada telg
ond þa ƿuldorgesteald
ƿide mære
dryhtfolca helm--
nales dol ƿite.
Fif min bearn ƿera
brucan ƿillað,
hy beoð þy gesundran
ond þy sigefæstran,
heortum þy hƿætran
ond þy hygebliþran,
ferþe þy frodran,
habbaþ freonda þy ma,
sƿæsra ond gesibbra,
soþra ond godra,
tilra ond getreoƿra,
þa hyra tyr ond ead
estum ycað
ond hy arstafum
lissum bilecgað
ond hi lufan fæþmum
fæste clyppað.
Frige hƿæt ic hatte,
niþum to nytte.
Nama min is mære,
hæleþum gifre
ond halig sylf.
Ic eom ƿeorð ƿerum,
ƿide funden,
brungen of bearƿum
ond of burghleoþum,
of denum ond of dunum.
Dæges mec ƿægun
feþre on lifte,
feredon mid liste
under hrofes hleo.
Hæleð mec siþþan
baþedan in bydene.
Nu ic eom bindere
ond sƿingere,
sona ƿeorpe
esne to eorþan,
hƿilum ealdne ceorl.
Sona þæt onfindeð,
se þe mec fehð ongean,
ond ƿið mægenþisan
minre genæsteð,
þæt he hrycge sceal
hrusan secan,
gif he unrædes
ær ne gesƿiceð,
strengo bistolen,
strong on spræce,
mægene binumen--
nah his modes geƿeald,
fota ne folma.
Frige hƿæt ic hatte,
ðe on eorþan sƿa
esnas binde,
dole æfter dyntum
be dæges leohte.
Biþ foldan dæl
fægre gegierƿed
mid þy heardestan
ond mid þy scearpestan
ond mid þy grymmestan
gumena gestreona--
corfen, sƿorfen,
cyrred, þyrred,
bunden, ƿunden,
blæced, ƿæced,
frætƿed, geatƿed,
feorran læded
to durum dryhta.
Dream bið in innan
cƿicra ƿihta,
clengeð, lengeð,
þara þe ær lifgende
longe hƿile
ƿilna bruceð
ond no ƿið spriceð,
ond þonne æfter deaþe
deman onginneð,
meldan mislice.
Micel is to hycganne
ƿisfæstum menn,
hƿæt seo ƿiht sy.
Ic ƿiht geseah
ƿundorlice
hornum bitƿeonum
huþe lædan,
lyftfæt leohtlic,
listum gegierƿed,
huþe to þam ham
of þam heresiþe;
ƿalde hyre on þære byrig
bur atimbran,
searƿum asettan,
gif hit sƿa meahte.
ða cƿom ƿundorlicu ƿiht
ofer ƿealles hrof,
seo is eallum cuð
eorðbuendum,
ahredde þa þa huþe
ond to ham bedraf
ƿreccan ofer ƿillan--
geƿat hyre ƿest þonan
fæhþum feran,
forð onette.
Dust stonc to heofonum,
deaƿ feol on eorþan,
niht forð geƿat.
Nænig siþþan
ƿera geƿiste
þære ƿihte sið.
Ic eom legbysig,
lace mid ƿinde,
beƿunden mid ƿuldre,
ƿedre gesomnad,
fus forðƿeges,
byrnende gled.
Ful oft mec gesiþas
sendað æfter hondum,
þæt mec ƿeras ond ƿif
ƿlonce cyssað.
þonne ic mec onhæbbe,
ond hi onhnigaþ to me
monige mid miltse,
þær ic monnum sceal
ycan upcyme
eadignesse.
Is þes middangeard
missenlicum
ƿisum geƿlitegad,
ƿrættum gefrætƿad.
Ic seah sellic þing
singan on ræcede;
sio hæfde ƿæstum
ƿundorlicran.
Niþerƿeard onhƿyrfed
ƿæs neb hyre,
fet ond folme
fugele gelice;
no hƿæþre fleogan mæg
ne fela gongan,
hƿæþre feþegeorn
fremman onginneð,
gecoren cræftum,
cyrreð geneahhe
oft ond gelome
eorlum on gemonge,
siteð æt symble,
sæles bideþ,
hƿonne ær heo cræft hyre
cyþan mote
ƿerum on ƿonge.
Ne heo þær ƿiht þigeð
þæs þe him æt blisse
beornas habbað.
Deor domes georn,
hio dumb ƿunað;
hƿæþre hyre is on fote
faegre hleoþor ƿinlicu
ƿoðgiefu.
ƿrætlic me þinceð,
hu seo ƿiht mæge
ƿordum lacan
þurh fot neoþan.
Frætƿed hyrstum,
hafað hyre on halse,
þonne hio hord ƿarað,
baru, beagum deall,
broþor sine--,
mæg mid mægne.
Micel is to hycgenne
ƿisum ƿoðboran,
hƿæt sio ƿiht sie.
Is þes middangeard
missenlicum
ƿisum geƿlitegad,
ƿrættum gefrætƿad.
Siþum sellic
ic seah searo hƿeorfan,
grindan ƿið greote,
giellende faran.
Næfde sellicu ƿiht
syne ne folme,
exle ne earmas;
sceal on anum fet
searoceap sƿifan,
sƿiþe feran,
faran ofer feldas.
Hæfde fela ribba;
muð ƿæs on middan.
Moncynne nyt,
fereð foddurƿelan,
folcscipe dreogeð,
ƿist in ƿigeð,
ond ƿerum gieldeð
gaful geara gehƿam
þæs þe guman brucað,
rice ond heane.
Rece, gif þu cunne,
ƿis ƿorda gleaƿ,
hƿæt sio ƿiht sie.