Ic seah turf tredan--
ten ƿæron ealra,
six gebroþor
ond hyra sƿeostor mid;
hæfdon feorg cƿico.
Fell hongedon
sƿeotol ond gesyne
on seles ƿæge
anra gehƿylces.
Ne ƿæs hyra ængum þy ƿyrs,
ne siðe þy sarre,
þeah hy sƿa sceoldon
reafe birofene,
rodra ƿeardes
meahtum aƿeahte,
muþum slitan
hasƿe blede.
Hrægl bið geniƿad
þam þe ær forðcymene
frætƿe leton
licgan on laste,
geƿitan lond tredan.
Ic ƿæs ƿæpenƿiga.
Nu mec ƿlonc þeceð
geong hagostealdmon
golde ond sylfore,
ƿoum ƿirbogum;
hƿilum ƿeras cyssað.
Hƿilum ic to hilde
hleoþre bonne
ƿilgehleþan;
hƿilum ƿycg byreþ
mec ofer mearce;
hƿilum merehengest
fereð ofer flodas
frætƿum beorhtne,
hƿilum mægða sum
minne gefylleð
bosm beaghroden;
hƿilum ic bordum sceal,
heard, heafodleas,
behlyþed licgan,
hƿilum hongige
hyrstum frætƿed,
ƿlitig on ƿage,
þær ƿeras drincað,
freolic fyrdsceorp.
Hƿilum folcƿigan
on ƿicge ƿegað,
þonne ic ƿinde sceal
sincfag sƿelgan
of sumes bosme;
hƿilum ic gereordum
rincas laðige
ƿlonce to ƿine;
hƿilum ƿraþum sceal
stefne minre
forstolen hreddan,
flyman feondsceaþan.
Frige hƿæt ic hatte.
Hals is min hƿit
ond heafod fealo,
sidan sƿa some.
Sƿift ic eom on feþe,
beadoƿæpen bere.
Me on bæce standað
her sƿylce sƿe on hleorum.
Hlifiað tu
earan ofer eagum.
Ordum ic steppe
in grene græs.
Me bið gyrn ƿitod,
gif mec onhæle
an onfindeð
ƿælgrim ƿiga,
þær ic ƿic buge,
bold mid bearnum,
ond ic bide þær
mid geoguðcnosle.
Hƿonne gæst cume
to durum minum,
him biþ deað ƿitod;
forþon ic sceal of eðle
eaforan mine
forhtmod fergan,
fleame nergan.
Gif he me æfterƿeard
ealles ƿeorþeð--
hine breost berað--
ic his bidan ne dear,
reþes on geruman--
(nele þæt ræd teale)--
ac ic sceal fromlice
feþemundum
þurh steapne beorg
stræte ƿyrcan.
Eaþe ic mæg freora
feorh genergan,
gif ic mægburge mot
mine gelædan
on degolne ƿeg
þurh duneþyrel
sƿæse ond gesibbe;
ic me siþþan ne þearf
ƿælhƿelpes ƿig
ƿiht onsittan.
gif se niðsceaþa
nearƿe stige
me on sƿaþe seceþ,
ne tosæleþ him
on þam gegnpaþe
guþgemotes,
siþþan ic þurh hylles
hrof geræce,
ond þurh hest hrino
hildepilum
laðgeƿinnum,
þam þe ic longe fleah.
Oft ic sceal ƿiþ ƿæge ƿinnan
ond ƿiþ ƿinde feohtan,
somod ƿið þam sæcce,
þonne ic secan geƿite
eorþan yþum þeaht;
me biþ se eþel fremde.
Ic beom strong þæs geƿinnes,
gif ic stille ƿeorþe;
gif me þæs tosæleð,
hi beoð sƿiþran þonne ic,
ond mec slitende
sona flymað,
ƿillað oþfergan
þæt ic friþian sceal.
Ic him þæt forstonde,
gif min steort þolað
ond mec stiþne ƿiþ
stanas moton
fæste gehabban.
Frige hƿæt ic hatte.
Ic eom mundbora
minre heorde,
eodorƿirum fæst,
innan gefylled
dryhtgestreona.
Dægtidum oft
spæte sperebrogan;
sped biþ þy mare
fylle minre.
Freo þæt bihealdeð,
hu me of hrife fleogað
hyldepilas.
Hƿilum ic sƿeartum
sƿelgan onginne
brunum beadoƿæpnum,
bitrum ordum,
eglum attorsperum.
Is min innað til,
ƿombhord ƿlitig,
ƿloncum deore;
men gemunan
þæt me þurh muþ fareð.
Ic eom ƿunderlicu ƿiht;
ne mæg ƿord sprecan,
mældan for monnum,
þeah ic muþ hæbbe,
ƿide ƿombe
—
Ic ƿæs on ceole
ond mines cnosles ma.
Ic on siþe seah
E S R O
H, hygeƿloncne,
heafodbeorhtne,
sƿiftne ofer sælƿong
sƿiþe þrægan.
Hæfde him on hrycge
hildeþryþe
N A M
nægledne rad
A G E ƿ.
ƿidlast ferede
rynestrong on rade
rofne C O
F O A H.
For ƿæs þy beorhtre,
sƿylcra siþfæt.
Saga hƿæt ic hatte.
Ic eom ƿunderlicu ƿiht,
on geƿin sceapen,
frean minum leof,
fægre gegyrƿed.
Byrne is min bleofag;
sƿylce beorht seomað
ƿir ymb þone ƿælgim
þe me ƿaldend geaf,
se me ƿidgalum
ƿisað hƿilum
sylfum to sace.
þonne ic sinc ƿege
þurh hlutterne dæg,
hondƿeorc smiþa,
gold ofer geardas.
Oft ic gæstberend
cƿelle compƿæpnum.
Cyning mec gyrƿeð
since ond seolfre
ond mec on sele ƿeorþað;
ne ƿyrneð ƿordlofes,
ƿisan mæneð
mine for mengo,
þær hy meodu drincað,
healdeð mec on heaþore,
hƿilum læteð eft
radƿerigne
on gerum sceacan,
orlegfromne.
Oft ic oþrum scod
frecne æt his freonde,
Fah eom ic ƿide,
ƿæpnum aƿyrged.
Ic me ƿenan ne þearf
þæt me bearn ƿræce
on bonan feore,
gif me gromra hƿylc
guþe genægeð;
ne ƿeorþeð sio mægburg
gemicledu
eaforan minum
þe ic æfter ƿoc,
nymþe ic hlafordleas
hƿeorfan mote
from þam healdende
þe me hringas geaf.
Me bið forð ƿitod,
gif ic frean hyre,
guþe fremme,
sƿa ic gien dyde
minum þeodne on þonc,
þæt ic þolian sceal
bearngestreona.
Ic ƿiþ bryde ne mot
hæmed habban,
ac me þæs hyhtplegan
geno ƿyrneð
se mec geara on
bende legde;
forþon ic brucan sceal
on hagostealde
hæleþa gestreona.
Oft ic ƿirum dol
ƿife abelge,
ƿonie hyre ƿillan;
heo me ƿom spreceð,
floceð hyre folmum,
firenaþ mec ƿordum,
ungod gæleð.
Ic ne gyme þæs
compes
—
Neb is min niþerƿeard;
neol ic fere
ond be grunde græfe,
geonge sƿa me ƿisað
har holtes feond,
ond hlaford min
ƿoh færeð,
ƿeard æt steorte,
ƿrigaþ on ƿonge,
ƿegeð mec ond þyð,
saƿeþ on sƿæð min.
Ic snyþigeforð,
brungen of bearƿe,
bunden cræfte,
ƿegen on ƿægne--
hæbbe ƿundra fela.
Me biþ gongendre
grene on healfe
ond min sƿæð sƿeotol
sƿeart on oþre.
Me þurh hrycg ƿrecen,
hongaþ under
an orþoncpil,
oþer on heafde,
fæst ond forðƿeard.
Fealleþ on sidan
þæt ic toþum tere,
gif me teala þenaþ
hindeƿeardre
þæt biþ hlaford min.
ætsomne cƿom
sixtig monna
to ƿægstæþe
ƿicgum ridan;
hæfdon endleofan
eoredmæcgas
fridhengestas,
feoƿer sceamas.
Ne meahton magorincas
ofer mere feolan,
sƿa hi fundedon,
ac ƿæs flod to deop,
atol yþa geþræc,
ofras hea,
streamas stronge.
Ongunnon stigan þa
on ƿægn ƿeras
ond hyra ƿicg somod
hlodan under hrunge;
þa þa hors oðbær
eh ond eorlas,
æscum dealle,
ofer ƿætres byht
ƿægn to lande--
sƿa hine oxa ne teah,
ne esna mægen
ne fæthengest,
ne on flode sƿom,
ne be grunde ƿod
gestum under,
ne lagu drefde,
ne on lyfte fleag,
ne under bæc cyrde;
brohte hƿæþre
beornas ofer burnan
ond hyra bloncan mid
from stæðe heaum,
þæt hy stopan up
on oþerne,
ellenrofe,
ƿeras of ƿæge,
ond hyra ƿicg gesund.