Ƿēlund him be ƿurma
ƿrāeces cunnade
anhýdiȝ eorl,
earfoþa drēaȝ,
hæfde him tō ȝesīþþe
sorȝe ond lonȝaþ,
ƿintercealde ƿræce,
ƿēan oft onfond
siþþan hine Nīðhād on
nēde leȝde
sƿoncre seonobende
on syllan monn.
þæs oferēode,
ðisses sƿā mæȝ.
Beadohilde ne ƿæs
hyre brōþra dēaþ
on sefan sƿā sār
sƿā hyre sylfre þinȝ,
þæt hēo ȝearolīce
onȝieten hæfde
þæt hēo ēacen ƿæs;
āefre ne meahte
rīste ȝeþencan
hū ymb þæt sceolde.
þæs oferēode,
ðisses sƿā mæȝ.
Ƿē þæt Māeðhilde
monȝe ȝefruȝnon
ƿurdon ȝrundlēase
Ȝēates frīȝe,
þæt him sēo sorȝlufu
slāep ealle binōm.
þæs oferēode,
ðisses sƿā mæȝ.
ðēodrīc āhte
þrītiȝ ƿintra
Māerinȝa burȝ;
þæt ƿæs monȝeȝum cūþ.
þæs oferēode,
ðisses sƿā mæȝ.
Ƿē ȝeāscodan
Eormanrīces
ƿylfenne ȝeþōht;
āhte ƿīde folc
Ȝotena rīces.
þæt ƿæs ȝrim cyninȝ.
Sæt secȝ moniȝ
sorȝum ȝebunden
ƿēan on ƿēnan,
ƿýscte ȝeneahhe
þæt þæs cynerīces
ofercumen ƿāere.
þæs oferēode,
ðisses sƿā mæȝ.
Siteð sorȝceariȝ
sāelum bidāeled,
on sefan sƿeorceð,
sylfum þinceð
þæt s� endelēas
earfoða dæl.
Mæȝ þonne ȝeþencan
þæt ȝeond þās ƿoruld
ƿītiȝ dryhten
ƿendeþ ȝeneahhe,
eorle moneȝum
āre ȝescēaƿað
ƿislīcne blāed,
sumum ƿēana dāel.
þæt ic bī mē sylfum
secȝan ƿille
þæt ic hƿīle ƿæs
Heodeninȝa scop
dryhtne dýre.
Mē ƿæs Dēor noma;
āhte ic fela ƿintra
folȝað tilne,
holdne hlāford
oþ þæt Heorrenda nū
lēoðcræftiȝ monn
londryht ȝeþāh
þæt mē eorla hlēo
āer ȝesealde.
þæs oferēode,
ðisses sƿā mæȝ.