Hēr Æðelstān cyning,
eorla drihten,
beorna bēahgifa,
and his brōðor ēac,
ēadmund æðeling,
ealdorlangne tīr
geslōgon æt sæcce
sƿeorda ecgum
ymbe Brunanburh:
bordƿeall clufan,
hēoƿan heaðolinde
hamora lāfum,
eaforan ēadƿeardes,
sƿā him geæðele ƿæs
fram cnēomāgum,
ðæt hī æt campe oft
ƿið laðra gehƿæne
land ealgodon,
hord and hāmas.
Hettend crungon
Scotta lēode
and scipflotan,
faēge fēollan,
feld dennode
secga sƿāte,
siþþan sunne ūpp
on morgentīd,
maēre tungol,
glād ofer grundas,
Godes candel beorht,
ēces Drihtnes,
oð sīo æðele gesceaft
sāh to setle.
ðær læg secg monig
gārum āgēted,
guma Norðerna
ofer scyld scoten,
sƿylce Scyttisc ēac,
ƿērig ƿīges sæd.
ƿesseaxe forð
andlangne dæg
ēorodcystum
on lāst legdon
lāðum ðēodum;
hēoƿan hereflȳman
hindan ðearle
mēcum mylenscearpum.
Myrce ne ƿyrndon
heardes handplegan
hæleða nānum
ðāra ðe mid Anlāfe
ofer ēargebland
on lides bōsme
land gesōhton,
faēge tō gefeohte.
Fīfe lāgon
on ðām campstede
cyningas geonge,
sƿeordum āsƿefede,
sƿylce seofene ēac
eorlas Anlāfes,
unrīm herges,
flotena and Scotta.
ðær geflȳmed ƿearð
Norðmanna brego,
nēade gebaēded,
tō lides stefne
lȳtle ƿeorode:
crēad cnear on flot,
cyning ūt geƿāt
on fealene flōd,
feorh generede.
Sƿylce ðaēr ēac sē frōda
mid flēame cōm
on his cȳþþe norð,
Costantīnus,
hār hilderinc;
hrēman ne ðorfte
mēca gemānan;
hē ƿæs his māga sceard,
frēonda gefylled
on folcstede,
beslægen æt sæcce,
and his sunu forlēt
on ƿælstōƿe
ƿundum forgrunden,
geongne æt gūðe.
Gylpan ne ðorfte
beorn blandenfeax
billgeslihtes,
eald inƿidda,
nē Anlāf ðȳ mā
mid heora herelāfum
hlihhan ne ðorftun
ðæt hī beaduƿeorca
beteran ƿurdon
on campstede
cumbolgehnāstes,
gārmittinge,
gumena gemōtes,
ƿaēpemgeƿrīxles,
ðæs hī on ƿælfelda
ƿið ēadƿeardes
eaforan plegodon.
Geƿiton him þā Norðmenn
nægledcearrum,
drēorig daroða lāf,
on Dinges mere
ofer dēop ƿæter
Dyflin sēcan,
and eft īraland,
aēƿiscmōde.
Sƿylce ðā gebrōðor
bēgen ætsomne,
cyning and æðeling,
cȳþþe sōhton,
ƿesseaxena land,
ƿīges hrēmige.
Lētan him behindan
hrā bryttigan
saloƿigpādan,
ðone sƿeartan hræfn,
hyrnednebban,
and ðone hasopādan,
earn æftan hƿīt,
aēses brūcan,
graēdigne gūðhafoc,
and ðæt graēge dēor,
ƿulf on ƿealda.
Ne ƿearð ƿæl māre
on ðȳs īglande
aēfre gȳta
folces gefylled
beforan ðyssum
sƿeordes ecgum,
ðæs ðe ūs secgað bēc,
ealde ūðƿitan,
siþþan ēastan hider
Engle and Seaxe
ūpp becōmon,
ofer brāde brimu
Brytene sōhton,
ƿlance ƿīgsmiðas,
ƿēalas ofercōmon,
eorlas ārhƿate
eard begēatan.