「此碟適合有意尋根人士購買。」
Mesmerised係挪威Gothic樂隊Atrox第一隻碟，不過我係最後先買。第一眼見到盒面咁正常，再擰轉盒底睇到間廠係Head Not Found唔 同跟住兩隻已經覺得唔對路，買左之後一聽．．．真係唔多對路喎！只係一隻傳統Gothic Metal大碟！可能因為係第一隻碟佢地仲摸緊條路啦。 呢隻碟係有男聲，但係佢個接近清聲之死腔表現唔太突出，而女主音Monika唱腔亦冇好似跟住兩隻碟咁多變化，想聽佢表演的話可能會失望。 兩位主音除左最後幾首歌差唔多完全冇合唱或者對唱，大部份時間都只係輪流唱較為單調；歌曲都較行，整體上唔係差，但係如果你同我一樣 鍾意聽較有特色之音樂的話，呢隻碟對你黎講可能會冇乜大驚喜。全碟較特別歌曲有加入電子元素、偏向Atmospheric之"A Minds Escape"同編曲 上較前衛之"The Air Shed Tears"。
同Therion舊作品一樣，呢隻碟適合有興趣認識早期Atrox人士購買。如果你未聽過Atrox又想試下的話，直接買Contentum或者Terrestrials啦。
否則一係嚇死，一係俾家長鬧死：「阿仔你做乜夜媽媽聽埋晒ｄ女人Ｖ嘩鬼叫！」呢隻挪威Gothic樂隊Atrox第二隻碟同上一隻相比改變好大， 最明顯就係冇左男聲，而第一首歌"Sultry Air"就話你知Contentum = Monika Edvardsen's show time（可能就係因為Monika想自己玩晒所以 踢左個男主音走）。有人形容Atrox為Extreme界Cranberries，聽完呢首歌你就知點解：唱唱下突然間拔個超高音、中段古典花腔式"solo"、女高音式鬼叫，嘩聽到我好涷呀！第三首"Lizard Dance"中段歇斯底里式癲婆狂叫，我試過夜晚兩點幾做功課時聽聽到毛管豎！第六首 "Letters to Earth"唱唱下變左細路女式獨白，仲有咩好講？Monika唱功之高係唔需要懷疑。但係可能樂隊太過以Monika為中心，音樂都淪為陪襯 搞到較為平淡。當幾乎每一分每一秒都充斥住Monika把聲，連ｄsolo都可以俾佢搶埋黎玩，你覺得其他 成員仲有幾多機會表演？好在仲有首較行好似Power Metal之"Ignoramus"，而之後幾首風格較接近佢地上一隻碟Mesmerised音樂比重 高番ｄ，如果唔係就算Monika唱得點勁點正大家都會悶死。歌詞都係敘事、講古仔之類較為抽象，但係睇唔睇得明仲有關係咩？你都冇預過聽得明 Monika唱乜架啦？
如果你想嘗試較偏重主音之Gothic Metal，又或者想聽較突出女聲表現，Contentum會適合你。
挪威Gothic樂隊Atrox第三張碟。同Contentum一樣封面都係出自Monika手仍然係咁怪異，但係音樂風格就有ｄ唔同喇。睇黎Season of Mist都 好支持Atrox俾左好大創作自由佢地，Atrox真係要多謝呢位好老細。
如果你嫌Mesmerisedｄ音樂太普通、Contentum又唔夠行的話，Terrestrials可以一次過滿足你兩個願望，因為今隻碟ｄ 音樂都較為重型，編曲非常Progressive，鼓之編排更係非常出色。Monika當然冇欺場仍然係唱到好似揩左野噉（呢ｄ「野」包括迷幻藥、興奮劑 、春藥．．．），而且好多時都同音樂相配合，呢樣野係過度偏重於主音表現之Contentum所忽略。歌詞同前作一樣都係咁詭異抽象，不過 明唔明仲有關係咩？鍾意Monika把聲但係嫌Contentum女聲氾濫同埋想聽較特別Gothic音樂之人應該會鍾意Terrestrials。
係Season of Mist出左兩隻碟之後，Atrox又簽左俾Code666，下一隻碟風格會偏向歌劇形式。希望佢地可以再為我地帶黎驚喜。