1 Korinthiërs 13

NOU wys ek julle 'n weg wat nog die allerbeste is:

Al praat ek die tale van mense en engele,

maar ek het geen liefde nie,

het ek 'n stuk klinkende metaal

en 'n galmende simbaal geword.

Al het ek die gawe van profesie

en ken ek al die geheimenisse,

en besit ek al die kennis,

en al het ek die geloof om berge te versit,

maar ek het geen liefde nie,

dan is ek niks.

Al deel ek al wat ek het aan ander uit,

en al gee ek my liggaam prys,

om my daarop te kan beroem,

maar ek het geen liefde nie,

baat dit my niks.

Die liefde is geduldig

die liefde is vriendelik

dit is nie afgunstig nie

dit is nie grootpraterig nie

dit is nie verwaand nie.

Dit handel nie onwelvoeglik nie

dit soek nie sy eie belang nie

dit is nie liggeraak nie

dit hou nie boek van die kwaad nie.

Dit verbly hom nie oor onreg nie,

maar verheug hom oor die waarheid!

Die liefde bedek alles,

Glo alles

Hoop alles

Verdra alles

Die liefde vergaan nooit nie,

Maar profetiese gawes raak uitgedien

Tale sal ophou

Kennis sal uitgedien raak.

Want ons ken maar gedeeltelik

en ons profeteer maar gedeeltelik

maar wanneer die volledige kom

sal wat gedeeltelik is uitgedien wees

Toe ek ‘n kind was

het ek gepraat soos ‘n kind,

gedink soos ‘n kind,

geredeneer soos ‘n kind.

maar noudat ek groot is,

Is ek klaar met die dinge van ‘n kind

Nou kyk ons nog in ‘n dowwe spieël

en sien ‘n raaiselagtige beeld,

maar eendag sal ons alles sien,

soos wat dit werklik is.

Nou ken ek nog gedeeltelik,

maar eendag sal ek ten volle ken,

soos God my ten volle ken.

En nou bly

Geloof, Hoop en Liefde –

hierdie drie.

En die grootste hiervan,

is die (Agapé) Liefde!

Ns

Al onderhou ek al die wette van die Ou Testament

en ek het nie die liefde nie,

kan ek ook nie 70 maal 7 keer vergewe nie.

Dit beteken nie dat al die genoemde gawes minderwaardig

of uitgedien is nie, maar al sou mens al die gawes hê en jy

openbaar nie Goddelike (Agapé) liefde nie, het jy beslis net

‘n galmende simbaal geword.