Natuurlik, ons het beslis herlewing nodig!

 

Die vraag word gevra:  Het ons herlewing nodig?

          Luister mooi.  Hoeveel van ons kerke het hulle deure gesluit?  Hoeveel kerke is Sondae half leeg?  Watter menigtes het nog nooit die binnekant van ‘n kerk gesien nie?

          Meer as 34 miljoen mense het in die 2000-sensus gesê hulle is lidmate van ‘n Christenkerk.  As al daardie lidmate elke Sondag in ‘n kerkdiens is en elkeen gee sy tiende en offerande, dan, inderdaad, het ons seker nie ‘n herlewing nodig nie.

          Baie van diegene wat gemeen het dat hulle Christene is, is nie waarlik wedergebore nie.  Ander het hulle eerste Liefde verlaat en verkoel in hul geestelike lewe, meesal weens ‘n gebrek aan kennis.

          As die 34 miljoen Suid-Afrikaners die korrekte lering en ondervinding gehad het oor die krag van gebed, dat sou die bidure beter bygewoon gewees het as die kerkdienste.

          As ons mense hulself waarlik liefgehad het, sou hulle God waarlik liefgehad het, maar die liefde het so sy gees en waarheid verloor, dat ons nie meer onsself liefhet nie.

          Ware gelowiges het die HERE lief met julle hele hart, julle hele verstand en in al hulle krag. 

Daagliks flits die smerigste SMS-boodskappe kruis en dwars deur die land op selfone.  Klink dit na gelowiges wat die HERE liefhet met hulle hele verstand?  Waarvoor word hulle verstand aangewend?

Die HERE vra ook dat ons, ons naaste moet liefhê soos onsself.  Talle maak groot ophef daaroor oor wie nou eintlik ons naaste sou wees, maar al het hulle die antwoorde, kom hulle nog nie die opdrag na van:  Bid vir mekaar, dra mekaar se laste, nie.

Die misdaad in SA vier weliswaar hoogty, maar so ook die sonde.  Die mense wat invul dat hulle Christene is en aan Christenkerke behoort, dit is hulle wat in brassery en dronkenskap verkeer, wat  eerder ‘n smerige grap as ‘n verrykende Bybelteks met ‘n ander deel.

Dis hulle wat die dobbelhole en bordele aan die gang hou, wat owerspel pleeg, nie liefde teenoor hulle kinders openbaar nie, wat die verval van die immoraliteit aanhelp.

Dit is die mense wat nie eers in die klein dingetjies vertrou kan word nie.  Hulle steel maklik die maatskappy se pen, misbruik die maatskappy se motor, raak sonder vrees by bedrog en korrupsie betrokke,  bedrieg die Ontvanger, besteel sy naaste – Ja, ander doen dit, waarom mag jy dit nie doen nie?

Ons besef nie dat wat ons het, het ons uit genade ontvang nie.  Ons leef in die rykste land in Afrika, ryker as menige ander wêreld land – maar watter verskil maak ons aan die land?  Ons is nie hier om toe te kyk hoe die land ondergaan, of om daagliks te kritiseer nie, nee, ons hier om ‘n verskil te maak en ons maak dit deur gebed, deur ons getuienis, deur woord en deur daad.

          Het ons herlewing nodig? Natuurlik, want, hoeveel Christene lewe die lewe van Christus voor hul medemens?  Hoe gelykvormig het ons nie aan die wêreld geword nie?  Hoe min teenstand ondervind ons? Waar is die vervolginge? 

          Jesus sê:  Terwille van my Naam sal julle vervolg word!  Dis nie ‘n waarskuwing nie, maar ‘n belofte.  Daar is egter geen vervolginge nie want ons het gedoen wat ons juis nie durf doen nie, ons het aan die wêreld gelykvormig geword.  Kyk hoe maklik is dit om vandag ‘n Christen te wees.

          Dan is daar die predikante.  Wat het van die treffende geesbelaaide boodskappe geword?  Kom mense nog tot bekering?  Word hulle gered as gevolg van die prediking? 

          Baie van ons is godsdienstig nogal erg bedrywig.  Daar was die vroutjie wat koorleidster in haar gemeente was.  Sy was ook die orreliste, voorsitter van die Vrouevereniging, onderwyseres in die Sondagskool en tesouriere. 

·        Godsdienstig was sy dus baie bedrywig – tot op ‘n dag toe sy skielik die foon optel en skakel.  ‘n Rou kreet volg:  Ek het hulp nodig, ek is sonder God, ek lewe in owerspel.

Iemand baie naby aan haar het agtergekom daar is fout, en in stilte, getrou vir haar gebid en die HERE, wat ‘n waarmaker van sy Woord is, het die gebed verhoor en die Heilige Gees het hierdie pragtige mense nie met rus gelaat nie – en uiteindelik die waarheid en ure later, ware vrede, en Gal. 6:1-4 gaan in vervulling!

Daar is nie oortuiging van sonde vandag nie, want Christene beskinder eerder mekaar as om vir mekaar te bid.  Met die geskinder probeer hulle natuurlik hul eie sondes verdoesel en soek hulle selfregverdiging vir hulle eie sondes.

‘n Meisie, swaar belaai met skuldgevoelens, vra:  Is dit wat ek doen ‘n sonde?  Die antwoord was:  Die HERE sê dat in alles wat jy doen of sê moet jy Hom verheerlik!  Dink jy, jy verheerlik die HERE met dit wat jy doen? 

En sy antwoord:  Nee.

En die prediker antwoord:  Gaan dan heen en sondig nie meer nie.

Waarom sou ons bereid wees om vir onsself te lieg?  Hoe lank gaan ons nog teen die prikkels skop?  Ons weet mos lank reeds dat die Heilige Gees met ons besig is.  Gaan ons die Heilige Gees bedroef?  Dis ‘n uiters gevaarlike spel, want die Bybel sê:  Dis vreeslik om te val in die hande van die Lewende God.

Het ons herlewing nodig, vra jy?  Natuurlik!  Sien jy dan nie self hoe ons mense van God vergeet het nie.  Sonde floreer op elke gebied van die samelewing.  Sogenaamde Christelike koerante weier nie om sedelose advertensies van prostitusie te plaas nie, weier nie om oor sonde te berig nie, maar skop vas wanneer hulle berigte oor Goddelike ingrypings en getuienisse aangebied word.

Wie hou hom nog by die norme, by die morele?

          ‘n Mens sonder beginsels, is ‘n beginsellose mens. ‘n Volk sonder beginsels, is ‘n onbeskaafde volk.

          As ‘n volk sy beginsel vergeet, oorboord begin gooi, dan verval hy in barbarisme.

          As ‘n volk gesonde beginsels verwerp, word hy ‘n dweepsieke volk.

          Die denkende Christen moes 30 jaar gelede sy gesonde beginsels op twee fronte verdedig het.  Toe het dit om sensuur wetgewing gedraai, so asof , wet mense kan help om in die Hemel te kom.

Vandag het hy weer geleentheid om gesonde Christen-norme te verdedig, maar ons verdedig dit juis deur dit uit te leef:

          Die eerste is  teen die verwaarlosing van alle beginsels wat ly tot  sosiale en persoonlike agteruitgang.

          Die ander is die aanname van vals beginsels wat die wêreld in anargie dompel.

          Die gevaar op die oomblik is dat ‘n groot deel van die genoemde 34 miljoen Christene, vergeet het dat ons Christen- en politieke beginsels ooit bestaan.

          Ons moet onsself verdedig deur vernuwing van ons bewuste ware geestelike, morele, politieke en ekonomiese beginsels. Ons moet dit ook onverwyld in elke sektor van ons  volks-, gemeenskaps- en gesinslewe toepas.

          Om dit te kan doen moet ons ten eerste onsself voor God verootmoedig, dan kom die herlewing en dan is ons weer tot alles in staat deur Christus wat ons die krag daartoe gee.

          Die preekstoel het min en feitlik geen uitwerking meer nie.  Die leiers het nie die antwoord nie.  Niemand behalwe God, het die antwoord nie.

          Die antwoord is dat ons die sonde aan bande moet lê deur middel van verootmoediging, ‘n onvoorwaardelik terugkeer na die weë en insettinge van God.

          Die HERE sê:  “Julle ongeregtighede het ‘n skeidsmuur geword tussen julle en julle God, en julle sondes het sy aangesig vir julle verberg, sodat Hy nie hoor nie.” Jes. 59:2).

          Wie wil dit waag om met God te stry?

          Joël sê God verlang om ons te seën, maar sonde weerhou die seën en Hy laat in sy liefde en medelye ‘n verskriklike oordeel oor ons kom.  Die oordeel is byna by die poorte van die stad.

          Ons moenie praat van liefde nie want ons het lankal vergeet wat dit is.  Ons het nie onsself lief nie, ons weet nie wat dit is om ons kinders lief te hê nie en ons weet nie wat dit is om ons vroue te bemin en lief te hê nie.

          Maat let asseblief op hoe groot God se liefde is. Joël 2:12-14 lees: Maar selfs nou nog – hier in die jaar 2003 – spreek die HERE,, bekeer julle tot My met julle hele hart, en met vas en geween en rouklag.

          “En skeur julle hart en nie julle klere nie, en bekeer julle tot die HERE God; want Hy is genadig en barmhartig, lankmoedig en groot van goedertierenheid en Een wat berou het oor die onheil; wie weet of dit Hom nie weer sal berou nie, sodat Hy ‘n seën sal agterlaat?”

          God weet wat jou sonde is, al wil jy dit verdoesel.  Hou maar op met bid as jy nie bereid is om jou sonde te bely en dit te laat staan nie.  God sal jou nie hoor terwyl daar ongeregtigheid in jou hart is nie.

          Lees gerus die hele hoofstuk van Joël. Sien hoe die priesters en die dienaars van God  in die voorportaal ween en sê:  O’ HERE, spaar u volk, en gee u erfdeel nie oor aan smaadheid, dat die nasies hulle spot nie; waarom sou hulle onder die volke sê:  Waar is die 34 miljoen Suid-Afrikaanse Christene se God?

          Bely, bekeer en bid vir jou huis, vir jou straat, vir jou gemeenskap, sodat die Gees van God vaardig kan word.

          Ons het beslis herlewing nodig.  Jy en ek is die sleutelfigure.  Dan gaan God sy “Gees uitgiet op alle vlees en julle seuns en julle dogters sal profeteer, julle oumense sal drome droom, julle jongelinge gesigte sien.

          “En ook op die diensknegte en die diensmaagde sal Ek in dié dae my Gees uitgiet!”

          God wil ons seën.  Hy wag vir ons. Kom, waarom sou ons langer in die onheil, die sonde, die vrees, die bange onsekerheid, die rusteloosheid, voortgaan.

          God wil ons en ons kinders vrymaak van die bandeloosheid, die dwelms, die drank misbruik, die leuentaal, die korrupsie, die bedrog, ja, van alles. Hoekom?

          Omdat Hy ons en ons kinders wil seën en omdat Hy, wanneer hy kom om Sy Bruid te kom haal, dat ek en jy inderdaad, sonder vlek of rimpel sal wees!