Klopjag - Die Kind
------------------

Verse: G D C D 
Bridge: Em C D x2

Die kind is nie dood nie
die kind lig sy vuiste teen sy moeder
wat Afrika skreeu  skreeu die geur
van vryheid en heide
in die lokasies van die omsingelde hart

Die kind lig sy vuiste teen sy vader
in die optog van die generasies
wat Afrika skreeu  skreeu die geur
van geregtigheid en bloed
in die strate van sy gewapende trots

Die kind is nie dood nie
nog by Langa nog by Nyanga
nog by Orlando nog by Sharpeville
nog by die polisiestasie in Phillipi
waar hy lê met 'n koeël deur sy kop

Die kind is die skaduwee van die soldate
op wag met gewere sarasene en knuppels
die kind is teenwoordig op al die vergaderings en wetgewings
die kind loer deur die vensters van huise en in die harte
   van moeders
die kind wat net wou speel in die son by Nyanga is orals
die kind wat 'n man geword het trek deur die ganse Afrika
die kind wat 'n reus geword het reis deur die hele wêreld

Sonder 'n pas


Woorde: Ingrid Jonker - Versamelde Werke, 1994 Derde hersiene uitgawe - Human & Rousseau
Musiek: Dawie de Jager
www.klopjag.co.za

Baie dankie aan Klopjag vir die bydrae van hierdie tab.
Besoek www.geocities.com/kitaarmykruis vir meer Afrikaanse tabs.
jaspervanzyl@mailbox.co.za