妹,

我覺得你係一個懶散ｏ既人，做事得過且過，

當你馬虎ｏ既時候，人地梗係唔收貨啦，

你就會覺得人地針對你，對你諸多挑剔。

但係，你有冇諗過係你自己馬虎在先呢？

我地並唔係對你唔好，亦唔係唔關心你，

你覺得我地認為你所做ｏ既事都係唔ｏ岩既，

呢ｄ只不過係你自己對我地ｏ既錯解。

點解我地每次話你，

你唔會去諗下，係唔係你自己有錯在先呢。

如果你係冇做錯ｏ既，我地又點會去話你呢？

我同媽咪就係太過關心你，

因為你係屋企最細ｏ既，

由細到大，你都唔聽話，又教唔聽，

你細個時候ｏ既事情，我地都冇再提，

因為係已經過去左，

我地唔係想你會有咩大成就，

只求你大過左之後，可以自力更生，可以照顧自己，

將來唔使憂柴憂米，

我地只不過係希望你唔會有好似二叔咁ｏ既下場！

因為你細個時候做ｏ既野，真在令到我同媽咪好擔心你既將來，

所以，你由細到大，我同媽咪都想教好你，

但係，你就忠言逆耳，覺得我地係到雞蛋裡挑骨頭，

而事實上，我地係出自真心咁去對你好。

我地唔錫你？　你知唔知全個關家最幸福ｏ既人，係你呀？！

關祖權有爺爺錫，你麻麻、二叔同媽咪鍚你，

咁我呢，真係冇人鍚我囉，

點解我話媽咪鍚你？　表面上，媽咪好似好鍚我咁，

但係，我知媽咪其實係鍚你多ｄ，

好似中學時，媽咪每星期俾你ｏ既食飯錢都多過我，

媽咪好似驚你唔夠錢食飯咁，

又好似而家咁丫，你冇做野，但係媽咪都會俾錢你，

咁我呢？　我中五畢業後，媽咪都冇話每個星期俾錢我食飯啦！

我ｏ既洗用，都係我去元氣做ｐａｒｔ－ｔｉｍｅ既錢黎架，

果ｄ錢，都唔夠我食，就係因為咁，連由細到大既利是錢就係果陣洗晒啦，

果陣，我真係一蚊都冇問媽咪囉過，呢ｄ你係知架！

我唔想你好似我咁，連利是錢都洗埋，

所以我成日叫你唔好洗埋銀行ｄ錢就係咁解。

唔知點解，我地問你野，無論係問你電視劇情，又或者係一ｄ家庭鎖事，

你講唔夠２句就會話：『唉，唔知唔知呀！　唔好問我呀！』

咁你又有冇諗過我地既感受丫？
我地係唔知你，唔識表達你自己想講ｏ既野定係唔想同我地去講囉。

如果你係唔識表達自己ｏ既話，我地就更加擔心你囉。

我真係唔明，點解你會覺得屋企冇家庭溫暖。

而家我地都算係有一個完整ｏ既家，

媽咪ｏ既思想都俾以前開放左，

媽咪都冇話唔俾你去街玩，

但係，我覺得就唔好去得咁過份囉，

因為你日日都係去玩，（我係講以前）

你夠竟有冇去搵野做呢？
理想還理想，始終現實世界係殘酷ｏ既，

如果你唔搵野做，唔通真係靠媽咪養一世？

如果你真係想証明你已經大過左，

你就要識諗一ｄ，用行動去証明，

唔係一味得個講字，

人唔可以一直生活係夢幻世界。

上帝好公平既，

每一個人都唔會係一個完美ｏ既人，　人人都會有佢ｏ既缺點，

只要努力去做好自己就得啦！

有事，你唔同我地講，就話我地唔關心你，

咁你有冇關心過我地？
你認為我地冇理你感受，你又何嘗理過我地ｏ既感受，

你唔係外人，你係我個妹，係同父同母既姊妹，

我唔關心你，唔通去關心蘇秋明同潘家豪嗎？

2003年6月20日