-Composed by xoXef & TK-a
Mim ang kan lo piang ve na a,
Chun leh zua lu kan ti hai thlawn;
Hriatthiam har ka ti thin mange,
Chung Khuanu Leng min duan dan hi.
Ka phal thei lo kei a riang hi,
Khawvel mawina tlan thei lova;
Ka lei taksa rualbanlo hi,
Piallei thuahriat hnuaia zal tur.
Mahse, min hnemtu khawihah nge?
Hringmit in ka thlir reng thin che;
Mahse tunah ka tawng ta che,
Min thlamuantu i lo ni e.
Mahte a awmhar chang ni hian,
Ka insit thin ka lei taksa hi;
Mahse, min hmangaihtu chuanin,
A rawngbawl turin min duh si.
Ka theihnate tlem hle mahse,
Ka Lalpan min hmang duh asin;
Ka van hmun tur thlir chung zelin,
I hming ropui nan ka thawk ang.
Note: He hla hi Rualbanlo te Ni 2004 kuma hman hnu lawk khan class-ah xoXef-a leh TK-a te phuah a ni. He hla an phuahna chhan ber chu Rualbanlo te an khawngaih leh lainat vang ni berin a lang a, pianphunga rual ban lo ni mahse, A rawngbawl tur hian Lalpa hian thliar bik a nei lo tih an puanchhuah duh vang ni berin a lang. He hla hi tu tan pawh sak an phal a, a thluk chu mahni duh dan dana siam mai tur a ni.