* Ch. Na-i pawh kha vawikhat bazarah motor-in a su a. Mite chu an rawn tlan khawm luai luai a, a na em? a na em? te an rawn ti liam liam a. Ch.Na-i mi polite ngang chuan, na love, na love, enge motor kha a an zawk a? te a ti vel.
* Maikal-a pawh hi Mary Mount-a kan luh laiin, Cl-VI vel kan ni tain ka hria. Miss hnenah toilet a kal a dil a.
Maikal a chu a thutna atangin a tho thut a. Miss awmna lam a pan a. (kun ngul ngul chungin)
Maikal : Miss, may I go to the toilet?
Miss : Why? Is it very urgent?
Maikal : Diarrhoea.
A sawi zawh rual rual chuan a tlan chhuak nghal char char a. Miss pawh a nui ve tawp.
* El-a pawh hi a tet lai atanga cher ngai miah lo a ni a. A dul te hi tunah chuan Maradona ang khan an paih thep tir tawh zawk a nih hi. A tet zual lai chuan a dul te hi a kiar thei mai mai khawp a, chhuatah hian an bawhkhup tir a, an han tuai a, ngeih tawkin a vir char char zel mai mawle. A lu te lah chu an han lian ve tiah tiah asin, a hahchhiau te hian a inbingbilet thuai zel..
* Zaia pawh hi thil uih lampang ngaina tak a ni a. Vawikhat phei kha chu khanghu a eisual nasa lutuk a, a nakah te, a ngumah te, a hnungzangah te a rawn to chhuak vel.
* MS-a pawh hi a tet lai chuan a sam a zuah thin a. A inbual zawh te hi chuan an han khuih mam ve pal zel a. Mahse, reilote hnuah a ri ser ser a, 'pup' a rawn ti a, a puk lehnghal luih zel. Tun hnuah hian a zuah leh duh tawh lo. Zaia'n KG-I vel an nih lai thlalak a rawn keng a, kan en a. MS-a sam chu Jimmy Hendrix-a sam nen inang ka ti ber.
* Thianpa Rinzama pawh kha an phone number a ziah hian, 2346370 (L) ti hian a ziak deuh kher zel a. Engatinge (L) tih hi a dah zel tih kha a sawi duh miah lova. A hnuah an han belhchian nak chuan an phone chu a thi a ni tih an hrechhuak ta a.
* Nancy-i hi engatinge class chhungah hian a mutthluk ziah a? Zanah inleng mawl deuh a nei thin emaw ni chu aw? te kan han ti nak nak thin a. Mahse, kan han belhchian nak chuan an chhungkua hi mut duh tak mai an lo ni a. Zanlai velah hian an chhungkua-in an tho a thin a, tui chawi tur te hian an inzui chhuak thap thap zel a. Chu chu an muttui lai tak a ni.
* Ch.Na-i kha sawi leh lawk teng. A ni hi thau ngai vak lo a ni a. A pian a nalh hmel te pawh in lo ti maithei. Mahse... a damloh-a paracetamol a han ei te hian a nak ruhah hian a zuk insawh thla ri bawp bawp zel. A kalna apiangah hian 'super glue' hi a pai reng a, a chhan chu tliak thut thei dinhmuna a din vang a ni. A khel ruh te hi hmu thiam lo tan chuan pistol a pai ru emaw tih mai tur a nia. Hrethiam mai tawh em, a piannalh dan tur chu!
* TK-a pawh hi tuktin toilet-ah hian rajdoot hi a khalh phurh phurh zel a. Bike te hi toilet-ah a dah thin emaw ni. Nge ni a 'waste material' a ngah lutuk zawk.
* OP-a hian engatinge Computer a siamtir dawn apianga Lalbiakzuala a sawm ziah kan tih chuan. OP-a hi a lo thluak reuh khawp mai a, a duh duha a bawl theih tur hi a sawm a, computer chhia chu BZ-a hi a put tir luk luk zel mawle. Ani sa tha deuh a ti a ni mahna.
* Hman zan Dinpuia leh Remruata lo riak chu an bon dun tiah tiah asin. Kan han mu tan dek dek a, Dinpuia chu a rawn hnar tan nghal a. Bike chu nise a tlan chak viau ang. A lu ka han dahrem sak a, mahse ka mut leh hnu lawk chuan Remruata'n a rawn bei ve leh nghal a. Reilote hnuah Dinpuia'n a rawn zawm ve leh. Zan khua-in an intlansiak dun char char ringawt alawm. Ka mutthilh theih loh phah lehnghal a, khuma thu chungin tunge tlan chak zawk ang aw te ka ti ta vel mai mai a.
* Ramdina pawh hi a tet lai chuan hnap ngah ve thei tak a ni an ti thin a. Ka hmu ve lem hlei lova. Mahse, min hrilh zel dan chuan hnap hi chu a hausak ve na lam tak a ni awm e. Pawisa erawh a 'khotom' ve thei hle a. A nu in cheng nga a pai tir chuan thingpui dawra chawlh hi a rawt char char zel ringawt. Chaw ei na a, artui pumkhat a nu in a han chhum sak te hian a lawm em em a. A ei zawh hi chuan chak ta lua emaw hi a inti a, mite hi inbuan-ah a cho nghal zung zung zel.
* Joseph-a pawh hi zu leh uisa hi a heh lutuk a. A chawhmeh duh ber an han zawh te hian, 'uisa' hi a ti nghal vat a. A dawtah an han ti leh a, 'a thing' tiin a la chhang hram hram zel. Vawikhat pawh mi hnuaiah driver hna a va dil ve a, zu a in ngai leh ngai loh an lo zawt a. Ani pek lah chu a ngawi vung vung a, "Chu, tunah in tur in nei nghal ami?" a han ti mai chu(h). A tling lo chiangkuang kher asin aw!!!
* Amelia-i pawh hi vawikhat tawng upa ah, 'Pizawn' tih hi hrilhfiah turin an ti a. Ani pek lah chuan, "Ka pi an zawn an zawn mai," a han ti ve ringawt a.