Kum 2004-05 chhunga kan class in thiltih pawimawh tak tak kan neih te repawrt na hun i lo hmang ang u.
** Kan zirtirtu pakhat Miss Mill-i te inneih naah kal vek turin kan in ruahman a. Tawlh zer zer thei thawh tur te pawh kan awm a, amaherawhchu, kan chuan peih loh avangin kan tawlh zer zer ta lova. Suit te nen Tanhril thleng kan in chhir thla ta a. Lehlamah a nuam angreng viau. Haw lamah sam sei ho an bengchheng hle a, Lalduhsakhi pawh kan ngai bik lo. (chanchin kimchang....)
** TK-a leh a gang te'n an salloon Sammy's-ah paratha leh thingpui an dawm thap zel a. A hlimawm ang reng viau thin. Pawisa pe lova chhuah ruk dan formula lah Jam-a'n a lo hmuchhuak khanglang a, an apply nasa thei khawp mai. A formula chu a hnuaia mi ang hi a ni:
Pe tawh melh a melh + Pawisa an pek buai laia zawi te te a chhuah ruk + Tlan thut + Bih ruk = FREE.
Hmanni chu TK-a nen kan inhmu a, Sammy's-ah a chawlh thu leh a lung a len thu min hrilh a. Engmah ngaihtuah lova, hlim tak maia thingpui leh paratha kan dawm ho thap thap zel lai te kha ka ngaihtuah a, lung a leng duh khawp mai a ti. Sammy's a thawk hote pawhin khawnge i thiante min ti a, kei chuan hostel-ah ka awm daiha an awmna ka hre lo, ka ti a. Thil ei tui pawh a har khawp mai a ti. Kan in exam zawh ni 18.3.2005 khan Kei, Michael, OP-a, BZ-a, Remsanga leh Remruata te kan chawl leh a, a khawharthlak khawp mai. Rinzama, TK-a, Arun-a te ho an awm lova, an ni ho hian a hma lamin an in exam zo tawh a ni. TK-a hi chu a inkhelh duh vang a ni e.
** Chaw ei khawm paha picnic neih tum anih angin thahnem ngai zual tlemte te chu Uari te Inah an kal khawm a. Heta member kalte hi President : Zawsef, Vice-President : TiiKee-a, Secretary : Diiinpuia, Treasurer : Nancee leh Singer : Bena te an ni. Lawibual picnic spot-ah te kalin, hun hlimawm ang reng ve tak an hmang a. Heta an chetsualna zawng zawng hi chu sawi lo mai teh ang. Chaw an heh hlawm hle tih erawh sawi hmaih phal chi a ni lo.
** Class chhunga kan zai rual thup thup thin te kha a lo nuam thin khawp mai. Hla chi hrang hrang a bik takin '4 Days Late' phei chu Tv. Fela in hmuhchhuahna hla anih avangin kan sa uar thei hle. Heng te nakinah chuan 'Hmanlai' tih emaw 'Kan High School Kal Ve Lai Chuan' tih an chang zo dawn ta si.
Tluang takin kan kal ho zel anga, re-union te pawh kan nei lovang tih tunge sawi thei??!! A dam hi han hauh phawt mai ila.
-Ed