拍 ~ 拖 。。。

拍拖拍拖。。男與女走埋一齊，拍埋那一下尚算撚出火花。但，據字面解，事實其實係註定係要「拖」。。多悲哀。〔哈哈哈！〕

盲年不宜婚嫁，於是，有人漏夜趕科場，趁雞年仍有二個月才到，需要結婚的伴侶便趕著締結婚盟拜堂洞房去也。年紀越大，同屆同期相知相識又有個拍左好幾年拖，拖到無分手又無驚喜都差不多係時候要拋錨泊埋碼頭的人很多。。寒冬未到，紅色雪花經已滿空艷舞，點綴半個維港，比聖誕燈飾還要堅實。。點一下數，看看有幾多枚花瓣擲到埋身要掏幾百幾百咁贖身。悶極無聊，於是跟人講起「如果女朋友個樣絕對唔出得大場面，咁點算？」。

話說有次有位人兄結婚，娶一位佢追左好多年的有錢女。當年佢由香港借錢追到紐西蘭，這幾年拎住朝不保夕的月薪充大頭鬼暗地借落滿街爛數仲要慈母年屈退休之齡硬食一起揹住層三四百萬樓價但佢無得住的單位。條仔為錢係人都知，但條女相貌如何真一直是個謎。。宴席那夜終有幸一睹新娘「芳容」：過份纖體的身材，暴現的腮骨，一副點樣都藏不到似乎隨時彈出的哨牙，矇眼，仲要你一見佢就自自然然諗到用個「殘」字形容的臉色。。嚇得我丫！唔係天資國色都唔好咁「出」丫。。寫到這裡，可能有人皺眉，寸我刻薄。。但這樣的事即使不在婚宴上見到，我不信你平日在街上未曾遇過。「皆大歡喜」的劇情都涉及得多啦！穿上婚紗的女人該是最明艷照人，何況化妝技術可扭轉乾坤，化腐朽為神奇。。可惜，這一夜，真係百聞不如一見。。

或者，愛情真係唔靠外表。。有內在美咪得囉！這件阿嫂，當晚婚宴遊戲中玩得投入得滯，竟然在台上呼喝個台下的新郎哥，嚇到席上個個眼突。。班兄弟仲煞有介事對住支MIC 作全場廣播話這個新郎哥係老婆奴，而新郎哥還是一味傻笑。。唉！男家那邊的人真係畀佢攪到丟哂架。。樣衰到爆。。看來，夫綱振不起。也許，他從來就沒有這樣東西。

「有內在美，賢德咪得囉」這些安慰話，說穿了只不過男人用來安慰自己個心好過一點咋！試問邊個男士想拖件 BJ2 出來，而不想帶件個樣「出得廳堂」的女友見人？〔睇電影睇電視可能見到咁仲笑得出，但瘀皮丟臉的事發生在自己身上就真係笑唔出喇！〕在人家面前嬌俏可人的女人對自己一副小鳥依人狀，體貼護住男友。同男人的朋友又 TALK 得，又講得笑，唔小器，唔扮啞，又識大體，仲一睇就知女人擺明有帶個腦出街，唔係白痴，足可撐得一下個場。。唔好講笑喇，有個咁好條件的女朋友，條仔在人前個頭都抬得高一點。係咪？

話番轉頭，那人講，如果女朋友個樣絕對唔出得大場面，都幾閉翳，因為真係有人會在背後議論紛紛，譏笑一番。不過，自己又好鍾意佢喎，點算？

『咁。。唔好結婚囉！要結都千萬唔好擺酒。。』我說：『最好拖得幾耐就幾耐。』是吧！反正一紙婚書在這個年代根本不能代表什麼，即使擇到一年的最良辰吉日嫁娶都可能會離婚。。那，攪咁多為乜呢！？