12.1. Florentino L. Cuevillas (Ourense, 1886 - 1958) Premio día das letras galegas (1968) arqueólogo e ensaísta que investigou e escribiu sobre a prehistoria galega. Foi integrante da Xeración Nós. Despois da súa morte, publicouse a súa ideoloxía persoal, Prosas Galegas (1962). Redactáronse outros escritos seus sobre a civilización céltica e castrexa coma Prehistoria en Historia de Galiza, vol III (1973). O seguinte texto vén de Prosas Galegas ed. Galaxia, Vigo 1962 p. 78. Cómpre que os que de veras queren á nosa terra, os que traballan a prol da súa exaltación, os que a senten no cerne do seu espírito, os que quixeran convencer e persuadir, os que cen veces sentirían abaixarse o voo do seu corazón, os que dubidaron e dubidan da eficacia e da fertilidade do seu esforzo, deprendan, para non esquencela, esta verdade: a verdade de que a alma de Galicia non pode deixar de ser nin convertirse noutra alma, e que só desaparecerá cando o mundo desapareza. Nos anos que han vir veredes quizais debecer aínda máis a nosa cultura, perder terreo a nosa lingua, confundirse os perfís do noso país deica borrárense no neboeiro borrallento que o invade todo. Non desesperedes, os que de verdade sintades a emoción galega; seguide sempre con fe, e se se vos ocorre pensar acaso se sementades ou se só esparexedes, desbotade ese pensamento e tede por certo que calquera traballo, grande ou pequeno, duro ou livián, que emprendades en nome de Galicia, é sempre sementeira. |