INANG
Wrritten June 21, 1990 CLSU
31st poem written since December 1987
Sa bawat luha mo Inang at pawis na pumatak
Nais mo'y maibsan man lang
Kahit na kakarampot na ulap
Na pinupunduhan ng ulan.
Nang ialis mo ako sa sinapupunan mo
Upang ilagay sa lalong malambot na kandungan
At iduyan ng mga kudlit mong pangarap
Nahawi ang pangamba mo sa unos sa laot.
Nangarap ka Inang
Na kahit 'san sandali ng buhay mo
Makita ang ginhawang hatid ng supling
Na kahit isang guhit na hibla ng ligaya
Ay ipadama ko ang pagmamahal na
Gaya ng pagmamahal mo sa 'kin.
Pinilit kong gawin iyon
Ngunit hindi sa ibig mong anak ng iisang ina
Kundi anak ngmaraming magulang
Na tulad mo rin, kapos sa pagmamahal
Ng kahit ng kaisa-isang magandang pangarap
Na gaya ng pangarap mo.
Nakita ko sa iyo ang buhos-loob
Na paghahandog ng buhay sa akin
Mahal na mahal mo nga ako
At mahal na mahal naman kita
Dahil nakikita ko sa iyo
Ang mga tulad mong nangangarap din
Para sa maaliwalas na bukas
(kung di man sa akin o di man sa atin
sa mga tulad natin.
Kung minsan naitatanong ko
Ang sukatan ng isang mabuting anak
Kung minsan naguguluhan ako
Sa pagkakaiba at pagkakapareho
Ng anak ng mgulang at anak-bayan
Bakit ako nag-aalinlangan.
Minsan, kinaiinggitan kita Inang
Ako lang ang pangarap mo,
Samantalang ako nagangarap sa patay na ilaw
Na mangyayaring paghihirapan kong sindihan
Upang ibigay ang liwanag.
Bakit gano'n Inang
Magkatulad lamang tayo ng nasa
Subalit ayaw kang sindihan kata ang ilaw?
Ayaw kong matulad tayo
Sa gamo-gamo ng unang panahon
Na namatay ang anak
Nang hindi alam ng ina
Kung bakit lumapit sa darang ang bunso!
Kung bakit di niya alam -
Ah, alam ko, ayaw niyang intindihin
Ikaw ma'y gayundin
Nang isinisigaw ko
Ang rebolusyon!
March 2000