(alay sa isang lumisan)

Kung ang tanging maririnig
ay ang halik ng alon sa dalampasigan
Hayaan mong ligunin ng iyong isip 
Ang taong iyong nilisan,
At di narinig ang iyong pamamaalam.

Kung sa pag-ugong ng makina
ng iyong kinalululanan
Ikaw ay mabahala,
Hayaan mong mapanatag,
At ikaw ay magtiwala,
Dahil sa pampang ay may umuusal
ng iyong kaligtasan.

At kung sandaling
Bilog ang buwan
At ang mga mata mo
Ay nais nang umidlip,
Hayaan mong gisingin ka
Ng mga alaala,
Bawat sabado ng gabi
Ng inyong masasayang kuwentuhan.

Kung sa gitna ng dagat
Ay wala kang matanaw,
Hayaan mong buklatin ng iyong diwa 
Ang bawat pahina ng nakalipas
Noong naroon ka pa
Sa kanyang paningin.