zrI-zrI-bhakti-rasAmRta-sindhuH

bhagavad-bhakti-bheda-nirUpakaH
pUrva-vibhAgaH

prathama-laharI sAmAnya-bhaktiH

zrI-zrI-rAdhA-govinda-devau vijayete

akhila-rasAmRta-mUrtiH prasRmara-ruci-ruddha-tArakA-pAliH |
kalita-zyAmA-lalito rAdhA-preyAn vidhur jayati ||1||
hRdi yasya preraNayA pravartito’haM varAka-rUpo’pi |
tasya hareH pada-kamalaM vande caitanya-devasya ||2||
vizrAma-mandiratyA tasya sanAtana-tanor mad-Izasya |
bhakti-rasAmRta-sindhur bhavatu sadAyam pramodAya ||3||
bhakti-rasAmRta-sindhau carataH paribhUta-kAla-jAla-bhiyaH |
bhakta-makarAn azIlita-mukti-nadIkAn namasAmi ||4||
mImAMsaka-baDavAgneH kaThinAm api kuNThayann asau |
sphuratu sanAtana suciraM tava bhakti-rasAmRtAmbhodhiH ||5||
bhakti-rasasya prastutir akhila-jagaG-maGgala-prasaGgasya |
ajJenApi mayAsya kriyate suhRdAm pramodAya ||6||

etasya bhagavad-bhakti-rasAmRta-payonidheH |
catvArah khalu vakSyante bhAgAH pUrvAdayaH kramAt ||7||
tatra pUrve vibhAge’smin bhakti-bheda-nirUpake |
anukrameNa vaktavyaM laharINAM catuSTayam ||8||
AdyA sAmAnya-bhakty-ADhyA dvitIyA sAdhanAnvitA |
bhAvAzritA tRtIyA ca turyA prema-nirUpikA ||9||
tatrAdau suSThu vaiziSTyam asyAH kathayituM sphuTam |
lakSaNaM kriyate bhakter uttamAyAH satAM matam ||10||

anyAbhilASitA-zUnyaM jJAna-karmAdy-anAvRtam |
AnukUlyena kRSNAnuzIlanaM bhaktir uttamA ||11||

yathA zrI-nArada-paJcarAtre --
sarvopAdhi-vinirmuktaM tat-paratvena nirmalam |
hRSIkeNa hRSIkeza-sevanaM bhaktir ucyate ||12||

zrI-bhAgavatasya tRtIya-skandhe ca (3.29.11-13) --
ahaituky avyavahitA yA bhaktiH puruSottame ||13||
sAlokya-sArSTi-sAmIpya-sArUpyaikatvam apy uta |
dIyamAnaM na gRhNanti vinA mat-sevanaM janAH ||14||
sa eva bhakti-yogAkhya Atyantika udAhRtaH ||15||

sAlokyetyAdi-padyastha-bhaktotkarSa-NirUpaNam |
bhakter vizuddhatA-vyaktyA lakSaNe paryavasyati ||16||
kleza-ghnI zubhadA mokSa-laghutA-kRt sudurlabhA |
sAndrAnanda-vizeSAtmA zrI-kRSNAkarSiNI ca sA ||17||

tatrAsyAH klezaghnatvam -
klezAs tu pApaM tad-bIjam avidyA ceti te tridhA ||18||

tatra pApam --
aprArabdhaM bhavet pApaM prArabdhaM ceti tad dvidhA ||19||

tatra aprArabdha-haratvam, yathA ekaDaze (11.14.19) -
yathAgniH susamiddhArciH karoty edhAMsi bhasmasAt |
tathA mad-viSayA-bhaktir uddhavainAMsi kRtsnazaH ||20||

prArabdha-haratvam, yathA tRtIye (3.33.6) -
yan-nAma-dheya-zravaNAnukIrtanAd
yat-prahvaNad yat-smaraNAd api kvacit |
zvAdo'pi sadyaH savanAya kalpate
kutaH punas te bhagavan nu darzanAt ||21||

durjAtir eva savanAyogyatve kAraNam matam |
durjAty-ArambhakaM pApaM yat syAt prArabdham eva tat ||22||

padma-purAne ca --
aprArabdha-phalaM pApaM kUTaM bIjaM phalonmukham |
krameNaiva pralIyeta viSNu-bhakti-ratAtmanAm ||23||

bIja-haratvam, yathA SaSThe (6.2.17) -
tais tAny aghAni pUyante tapo-dAna-vratAdibhiH |
nAdharmajaM tad-hRdayaM tad apIzAGghri-sevayA ||24||

avidyA-haratvam, yathA caturthe (4.22.39) -
yat-pAda-paGkaja-palAza-vilAsa-bhaktyA
karmAzayaM grathitam udgrathayanti santaH |
tadvan na rikta-matayo yatayo’pi ruddha-
sroto-gaNAs tam araNaM bhaja vAsudevam ||25||

pAdme ca --
kRtAnuyAtrA-vidyAbhir hari-bhaktir anuttamA |
avidyAM nirdahaty Azu dAva-jvAleva pannagIm ||26||

zubhadatvam --
zubhAni prINanaM sarva-jagatAm anuraktatA |
sadguNAH sukham ity-AdIny AkhyAtAni manISibhiH ||27||

tatra jagat-prINanAdidvaya-pradatvam, yathA pAdme --
yenArcito haris tena tarpitAni jaganty api |
rajyanti jantavas tatra jangamAH sthAvarA api ||28||

sad-guNAdi-pradatvam, yathA paJcame (5.18.12) -
yasyAsti bhaktir bhagavaty akiJcanA
sarvair guNais tatra samAsate surAH |
harAv abhaktasya kuto mahad-guNA
manorathenAsati dhAvato bahiH ||29||

sukhapradatvam --
sukhaM vaiSayikaM brAhmam aizvaraM ceti tat tridhA ||30||

yathA tantre --
siddhayaH paramAzcaryA bhuktir muktiz ca zAzvatI |
nityaM ca paramAnando bhaved govinda-bhaktitaH ||31||

yathA hari-bhakti-sudhodaye ca --
bhUyo’pi yAce deveza tvayi bhaktir dRDhAstu me |
yA mokSAnta-caturvarga phaladA sukhadA latA ||32||

mokSa-laghutAkRt --
manAg eva prarUDhAyAM hRdaye bhagavAd-ratau |
puruSArthAs tu catvArAs tRNAyante samantataH ||33||

yathA zrI-nArada-paJcarAtre --
hari-bhakti-mahA-devyAH sarvA mukty-Adi-siddhayaH |
bhuktyaz cAdbhutAs tasyAz ceTikAvad anuvratAH ||34||iti |

sudurlabhA --
sAdhanaughair anAsangair alabhyA sucirAd api |
hariNA cAzvadeyeti dvidhA sA syAt sudurlabhA ||35||

tatra AdyA, yathA tAntre --
jJAnataH sulabhA muktir bhuktir yajJAdi-puNyataH |
seyaM sAdhana-sAhasrair hari-bhaktiH sudurlabhA ||36||

dvitIyA, yathA paJcama-skandhe (5.6.18) --
rAjAn patIr gurur alaM bhavatAM yadUnAM
daivaM priyaH kula-patiH kva ca kiGkaro vaH |
astv evam aGga bhajatAM bhagavAn mukundo
muktiM dadAti karhicit sma na bhakti-yogam ||37||

sAndrAnanda-vizeSAtmA --
brahmAnando bhaved eSa cet parArddha-guNIkRtaH |
naiti bhakti-sukhAmbhodheH paramANu-tulAm api ||38||

yathA, hari-bhakti-sudhodaye --
tvat-sAkSAt-karaNAhlAda-vizuddhAbdhi-sthitasya me |
sukhAni goSpadAyante brAhmANy api jagad-guro ||39||

tathA bhAvArtha-dIpikAyAM (10.88.11) ca -
tvat-kathAmRta-pAthodhau viharanto mahA-mudaH |
kurvanti kRtinaH kecit catur-vargaM tRNopamam ||40||

zrI-kRSNAkarSiNI --
kRtvA hariM prema-bhAjaM priya-varga-samanvitam |
bhaktir vazIkarotIti zrI-kRSNAkarSiNI matA ||41||

yathaikAdaze (11.14.20) --
na sAdhyati mAm yogo na sAGkhyaM dharma uddhava |
na svAdhyAyas tapas tyAgo yathA bhaktir mamorjitA ||42||

saptame (7.10.48) ca nAradoktau --
yUyaM nRloke bata bhUri-bhAgA
lokaM punAnA munayo'bhiyanti |
yeSAM gRhAn AvasatIti sAkSAd
guDhaM paraM brahma manuSya-liGgam ||43||

agrato vakSyamANAyAs tridhA bhakter anukramAt |
dvizaH SaDbhiH padair etan mAhAtyaM parikIrtitam ||44||

kiM ca -
svalpApi rucir eva syAd bhakti-tattvAvabodhikA |
yuktis tu kevalA naiva yad asyA apratiSThatA ||45||

tatra prAcInair apy uktam -
yatnenApAdito’py arthaH kuzalair anumAtRbhiH |
abhiyuktatarair anyair anyathaivopapAdyate ||46||

iti zrI zrI bhakti-rasAmRta-sindhau
pUrva-bhAge bhakti-sAmAnya laharI prathamA

-=o0o=-

dvitIyA laharI
sAdhana-bhaktiH


sA bhaktiH sAdhanaM bhAvaH premA ceti tridhoditA ||1||

tatra sAdhana-bhaktiH -
kRti-sAdhyA bhavet sAdhya-bhAvA sA sAdhanAbhidhA |
nitya-siddhasya bhAvasya prAkaTyaM hRdi sAdhyatA ||2||
sA bhaktiH saptama-skandhe bhaGgyA devarSiNoditA ||3||

yathA saptame (7.1.31) --
tasmAt kenApy upAyena manaH kRSNe nivezayet ||4||iti |

vaidhI rAgAnugA ceti sA dvidhA sAdhanAbhidhA ||5||

tatra vaidhI --
yatra rAgAnavAptatvAt pravRttir upajAyate |
zAsanenaiva zAstrasya sA vaidhI bhaktir ucyate ||6||

yatha, dvitIye (2.1.6) --
tasmAd bhArata sarvAtmA bhagavAn Izvaro hariH |
zrotavyaH kIrtitavyaz ca smartavyaz cechatAbhayam ||7||

pAdme ca --
smartavyaH satataM viSNur vismartavyo na jAtucit |
sarve vidhi-niSedhAH syur etayor eva kiGkarAH ||8||

ity asau syAd vidhir nityaH sarva-varNAzramAdiSu |
nityatve’py asya nirNItam ekAdazy-Adivat-phalam ||9||

yathA, ekAdAze (11.5.2-3) tu vyaktam evoktam --
mukha bAhUru-pAdebhyaH puruSasyAzramaiH saha |
catvAro jajJire varNA guNair viprAdayaH pRthak ||10||
ya eSAM puruSaM sAkSAd Atma-prabhavam Izvaram |
na bhajanty avajAnanti sthAnAd bhraSTAH patanty adhaH ||11||

tat phalaM ca, tatraiva (11.27.49) --
evaM kriyA-yoga-pathaiH pumAn vaidika-tAntrikaiH |
arcann ubhyataH siddhiM matto vindaty abhIpsitAm ||12||

paJcarAtre ca --
surarSe vihitA zAstre harim uddizya yA kriyA |
saiva bhaktir iti proktA tayA bhaktiH parA bhavet ||13||

tatra adhikArI --
yaH kenApy atibhAgyena jAta-zraddho’sya sevane |
nAtisakto na vairAgya-bhAg asyAm adhikAry asau ||14||

yathaikAdaze (11.20.28) --
yadRcchayA mat-kathAdau jAta-zraddho’stu yaH pumAn |
na nirviNNo nAtisakto bhakti-yogo’sya siddhidaH ||15||

uttamo madhyamaz ca syAt kaniSThaz ceti sa tridhA ||16||

tatra uttamaH -
zAstre yuktau ca nipuNaH sarvathA dRDha-nizcayaH |
prauDha-zraddho’dhikArI yaH sa bhaktAv uttamo mataH ||17||

tatra madhyamaH -
yaH zAstrAdiSv anipuNaH zraddhAvAn sa tu madhyamaH ||18||

tatra kaniSThaH -
yo bhavet komala-zraddhaH sa kaniSTho nigadyate ||19||

tatra gItAdiSUktAnAM caturNAm adhikAriNAm |
madhye yasmin bhagavatah kRpA syAt tat-priyasya vA ||20||
sa kSINa-tat-tad-bhAvaH syAc chuddha-bhakty-adhikAravAn |
yathebhaH zaunakAdiz ca dhruvaH sa ca catuHsanaH ||21||
bhukti-mukti-spRhA yAvat pizAcI hRdi vartate |
tAvad bhakti-sukhasyAtra katham abhyudayo bhavet ||22||
tatrApi ca vizeSeNa gatim aNvIm anicchataH |
bhaktir hRta-manaH-prANAn premNA tAn kurute janAn ||23||

tathA ca, tRtIye (3.25.36) --
tair darzanIyAvayavair udAra-
vilAsa-hAsekSita-vAma-sUktaiH |
hRtAtmano hRta-prANAMz ca bhaktir
anicchato me gatim aNvIM prayuGkte ||24||

zrI kRSNa-caraNAmbhoja-sevA-nirvRta-cetasAm |
eSAM mokSAya bhaktAnAM na kadAcit spRhA bhavet ||25||

yathA tatraiva, zrImad-uddhavoktau (3.4.15) --
ko nv Iza te pAda-saroja-bhAjAM
sudurlabho’rtheSu caturSv apIha |
tathApi nAhaM pravRNomi bhUman
bhavat-padAmbhoja-niSevaNotsukaH ||26||

tatraiva, zrIkapila-devoktau (3.25.35) –
naikAtmatAM me spRhayanti kecin
mat-pAda-sevAbhiratA mad-IhAH |
ye’nyonyato bhAgavatAH prasajya
sabhAjayante mama pauruSANi ||27||

tatraiva (3.29.13) --
sAlokya-sArSTi-sAmIpya- sArUpyaikatvam apy uta |
dIyamAnaM na gRhNanti vinA mat-sevanaM janAH ||28||

caturthe zrI-dhruvoktau (4.9.10) --
yA nirvRtis tanu-bhRtAM tava pAda-padma-
dhyAnAd bhavaj-jana-kathA-zravaNena vA syAt |
sA brahmaNi sva-mahimany api nAtha mA bhUt
kiM tv antakAsi-lulitAt patatAM vimAnAt ||29||

tatraiva zrImad-AdirAjoktau (4.20.24) –
na kAmaye nAtha tad apy ahaM kvacin
na yatra yuSmac-caraNAmbujAsavaH |
mahattamAntar-hRdayAn mukha-cyuto
vidhatsva karNAyutam eSa me varaH ||30||

paJcame zrI-zukoktau (5.14.44) –
yo dustyajAn kSiti-suta-svajanArtha-dArAn
prArthyAM zriyaM sura-varaiH sadayAvalokAm |
naicchan nRpas tad-ucitaM mahatAM madhudviT-
sevAnurakta-manasAm abhavo’pi phalguH ||31||

SaSThe zrI-vRtroktau (6.11.25) –
na nAka-pRSThaM na ca pArameSThyaM
na sArva-bhaumaM na rasAdhipatyam |
na yoga-siddhIr apunar-bhavaM vA
samaJjasa tvA virahayya kAGkSe ||32||

tatraiva zrI-rudroktau (6.17.28) –
nArAyaNa-parAH sarve na kutazcana bibhyati |
svargApavarga-narakeSv api tulyArtha-darzinaH ||33||

tatraiva indroktau (6.18.74) –
ArAdhanaM bhagavata IhamAnA nirAziSaH |
ye tu necchanty api paraM te svArtha-kuzalAH smRtAH ||34||

saptame prahlAdoktau (7.6.25) –
tuSTe ca tatra kim alabhyam ananta Adye
kiM tair guNa-vyatikarAd iha ye sva-siddhAH |
dharmAdayaH kim aguNena ca kAGkSitena
sAraM juSAM caraNayor upagAyatAM naH ||35||

tatraiva zakroktau (7.8.42) –
pratyAnItAH parama bhavatA trAyatA naH sva-bhAgA
daityAkrAntaM hRdaya-kamalaM tad-gRhaM pratyabodhi |
kAla-grastaM kiyad idam aho nAtha zuzrUSatAM te
muktis teSAM na hi bahumatA nArasiMhAparaiH kim ||36||

aSTame zrI-gajendroktau (8.3.20) –
ekAntino yasya na kaJcanArthaM
vAJchanti ye vai bhagavat-prapannAH |
aty-adbhutaM tac-caritaM sumaGgalaM
gAyanta Ananda-samudra-magnAH ||37||

navame zrI-vaikuNThanAthoktau (9.4.67) --
mat-sevayA pratItaM te sAlokyAdi-catuSTayam |
necchanti sevayA pUrNAH kuto’nyat kAla-viplutam ||38||

zrI-dazame nAgapatnI-stutau (10.16.37) –
na nAka-pRSThaM na ca sArva-bhaumaM
na pArameSThyaM na rasAdhipatyam |
na yoga-siddhIr apunar-bhavaM vA
vAJchanti yat-pAda-rajaH-prapannAH ||39||

tatraiva zrI-veda-stutau (10.87.21) –
duravagamAtma-tattva-nigamAya tavAtta-tanoz
carita-mahAmRtAbdhi-parivarta-parizramaNAH |
na parilaSanti kecid apavargam apIzvara te
caraNa-saroja-haMsa-kula-saGga-visRSTa-gRhAH ||40||

ekAdaze zrI-bhagavad-uktau (11.20.34) –
na kiJcit sAdhavo dhIrA bhaktA hy ekAntino mama |
vAJchanty api mayA dattaM kaivalyam apunar-bhavam ||41||

tathA (11.14.14) –
na pArameSThyaM na mahendra-dhiSNyaM
na sArvabhaumaM na rasAdhipatyam |
na yoga-siddhIr apunar-bhavaM vA
mayy arpitAtmecchati mad vinAnyat ||42||

dvAdaze zrI-rudroktau (12.10.6) –
naivecchaty AziSaH kvApi brahmarSir mokSam apy uta |
bhaktiM parAM bhagavati labdhavAn puruSe’vyaye ||43||

padma-purANe ca kArttika-mAhAtmye (dAmodarASTake) –
varaM deva mokSaM na mokSAvadhiM vA
na cAnyaM vRNe’haM varezAd apIha |
idaM te vapur nAtha gopAla-bâlaM
sadA me manasy avirAstAM kim anyaiH ||44||

kuverAtmajau baddha-mUrtyaiva yadvat
tvayA mocitau bhakti-baddhau kRtau ca |
tathA prema-bhaktiM svakAM me prayaccha
na mokSe graho me’sti dAmodareha ||45||

hayazIrSIya-zrI-nArAyaNa-vyUha-stave ca -
na dharma kAmam arthaM vA mokSaM vA varadezvara |
prArthaye tava pAdAbje dAsyam evAbhikAmaye ||46||

tatraiva -
punaH punar varAn ditsur viSNur muktiM na yAcitaH |
bhaktir eva vRtA yena prahlAdaM taM namAmy ahaM ||47||
yadRcchayA labdham api viSNor dAzarathes tu yaH |
naicchan mokSaM vinA dAsyaM tasmai hanumate namaH ||48||

ataeva prasiddham zrI-hanumad-vAkyam --
bhava-bandha-cchide tasyai spRhayAmi na muktaye |
bhavAn prabhur ahaM dAsa iti yatra vilupyate ||49||

zrI-nArada paJcarAtre ca jitante-stotre -
dharmArtha-kAma-mokSeSu necchA mama kadAcana |
tvat-pAda-paJkajasyAdho jIvitaM dIyataM mama ||50||
mokSa-sAlokya-sArUpyAn prArthaye na dharAdhara |
icchAmi hi mahAbhAga kAruNyaM tava suvrata ||51||

ataeva zrI-bhAgavate SaSThe (6.14.5) –
muktAnAm api siddhAnAM nArAyaNa-parAyaNaH |
sudurlabhaH prazAntAtmA koTiSv api mahA-mune ||52||

prathame ca zrI-dharmarAja-mAtuH stutau (1.8.20) –
tathA paramahaMsAnAM munInAm amalAtmanAm |
bhakti-yoga-vidhAnArthaM kathaM pazyema hi striyaH ||53||

tatraiva zrI-sUtoktau (1.7.10) –
AtmArAmAz ca munayo nirgranthA apy urukrame |
kurvanty ahaitukIM bhaktim ittham-bhUta-guNo hariH ||54||

atra tyAjyatayaivoktA muktiH paJca-vidhApi cet |
sAlokyAdis tathApy atra bhaktyA nAtivirudhyate ||55||
sukhaizvaryottarA seyaM prema-sevottarety api |
sAlokyAdir dvidhA tatra nAdyA sevA-juSaM matA ||56||
kintu premaika-mAdhurya-juSa ekAntino harau |
naivAGgIkurvate jAtu muktiM paJca-vidhAm api ||57||
tatrApy ekAntinAM zreSthA govinda-hRta-mAnasAH |
yeSAM zrIza-prasAdo'pi mano hartuM na zaknuyAt ||58||
siddhAntatas tv abhede'pi zrIza-kRSNa-svarUpayoH |
rasenotkRSyate kRSNa-rUpam eSA rasa-sthitiH ||59||
zAstrataH zrUyate bhaktau nR-mAtrasyAdhikAritA |
sarvAdhikAritAM mAgha-snAnasya bruvatA yataH |
dRStAntitA vaziSThena hari-bhaktir nRpaM prati ||60||

yathA pAdme -
sarve’dhikAriNo hy atra hari-bhaktau yathA nRpa ||61||

kAzI-khaNDe ca tathA -
antyajA api tad-rASTre zaGkha-cakrAGka-dhAriNaH |
samprApya vaiSNavIM dIkSAM dIkSitA iva sambabhuH ||62||

api ca -
ananuSThAnato doSo bhakty-aGgAnAM prajAyate |
na karmaNAm akaraNAd eSa bhakty-adhikAriNAm ||63||
niSiddhAcArato daivAt prAyazcittaM tu nocitam |
iti vaiSNava-zAstrANAM rahasyaM tad-vidAM matam ||64||

yathaikAdaze (11.20.26, 11.21.2) --
sve sve’dhikAre yA niSThA sA guNaH parikIrtitaH |
viparyayas tu doSaH syAd ubhayor eSa nizcayaH ||65||

prathame (1.5.17) --
tyaktvA svadharmaM caraNAmbujam harer
bhajann apakvo’tha patet tato yadi |
yatra kva vAbhadram abhUd amuSya kiM
ko vArtha Apto’bhajatAM sva-dharmataH ||66||

ekAdaze (11.11.37)-
AjJAyaiva guNAn doSAn mayAdiSTAn api svakAn |
dharmAn santyajya yaH sarvAn mAM bhajet sa ca sattamaH ||67||

tatraiva (11.5.41) -
devarSi-bhUtApta-nRRNAM pitRRNAM
na kiGkaro nAyam RNI ca rAjan |
sarvAtmanA yaH zaraNaM zaraNyaM
gato mukundaM parihRtya kartam ||68||

zrI-bhagavad-gItAsu (18.66) -
sarva-dharman parityAjya mAm ekaM zaraNaM vraja |
ahaM tvAM sarva-pApebhyo mokSayiSyAmi mA sucaH ||69||

agastya-saMhitAyAm --
yathA vidhi-niSedhau tu muktaM naivopasarpataH |
tathA na spRzato rAmopAsakaM vidhi-pUrvakam ||70||

ekAdaze eva (11.5.42) -
svapAda-mulaM bhajataH priyasya
tyaktAny abhAvasya hariH parezaH |
vikarma yac cotpatitaM kathaJcid
dhunoti sarvaM hRdi sanniviSTaH ||71||

hari-bhakti-vilAse’syA bhakter aGgAni lakSazaH |
kintu tAni prasiddhAni nirdizyante yathAmati ||72||

atra aGga-lakSaNam -
AzritAvAntarAneka-bhedaM kevalam eva vA |
ekaM karmAtra vidvadbhir ekaM bhakty-aGgam ucyate ||73||

atha aGgAni -
guru-pAdAzrayas tasmAt kRSNa-dIkSAdi-zikSaNam |
vizrambheNa guroH sevA sAdhu-vartmAnuvartanam ||74||
sad-dharma-pRcchA bhogAdi-tyAgaH kRSNasya hetave |
nivAso dvArakAdau ca gaGgAder api sannidhau ||75||
vyAvahAreSu sarveSu yAvad-arthAnuvartitA |
hari-vAsara-sammAno dhAtry-azvatthAdi-gauravam ||76||
eSAm atra dazAGgAnAM bhavet prArambha-rupatA ||77||
saGga-tyAgo vidUreNa bhagavad-vimukhair janaiH |
ziSyAdy-ananubandhitvaM mahArambhAdy-anudyamaH ||78||
bahu-grantha-kalAbhyAsa-vyAkhyA-vAda-vivarjanam ||79||
vyAvahAre’py akArpaNyaM zokAdy-avaza-vartitA ||80||
anya-devAn avajJA ca bhUtAnudvega-dAyitA |
sevA-nAmAparAdhAnAm udbhavAbhAva-kAritA ||81||
kRSNa-tad-bhakta-vidveSa-vinindAdy-asahiSNutA |
vyatirekatayAmISAM dazAnAM syAd anuSThitIH ||82||
asyAs tatra pravezAya dvAratve’py aGga-viMzateH |
trayAM pradhAnam evoktaM guru-pAdAzrayAdikam ||83||
dhRtir vaiSNava-cihNAnAM harer nAmAkSarasya ca |
nirmAlyAdez ca tasyAgre tANDavaM daNDavan-natiH ||84||
abhyutthAnam anuvrajyA gatiH sthAne parikramaH |
arcanaM paricaryA ca gItaM saGkIrtanaM japaH ||85||
vijJaptiH stava-pAThaz ca svAdo naivedya-pAdyayoH |
dhUpa-mAlyAdi-saurabhyaM zrI-mUrteH spRSTir IkSaNam ||86||
ArAtrikotsavAdez ca zravaNaM tat-kRpekSaNam |
smRtir dhyAnaM tathA dAsyaM sakhyam Atma-nivedanam ||87||
nija-priyopaharaNaM tad-arthe’khila-ceSTitam |
sarvathA zaraNApattis tadIyAnAM ca sevanam ||88||
tadIyAs tulasI-zAstra-mathurA-vaiSNavAdayaH |
yathA-vaibhava-sAmagrI sad-goSThIbhir mahotsavaH ||89||
UrjAdaro vizeSeNa yAtrA janma-dinAdiSu |
zraddhA vizeSataH prItiH zrI-mUrter aGghri-sevane ||90||
zrImad-bhAgavatArthAnAm AsvAdo rasikaiH saha |
sajAtIyAzaye snigdhe sAdhau saGgaH svato vare ||91||
nAma-saGkIrtanaM zrI-mathurA-maNDale sthitiH ||92||
aGgAnAM paJcakasyAsya pUrvaM vilikhitasya ca |
nikhila-zraiSThya-bodhAya punar apy atra kIrtanam ||93||
iti kAya-hRSIkAntaH-karaNAnAm upAsanAH ||94||
catuHSaSTiH pRthak sAGghAtika-bhedAt kramAdinAH ||95||
athArSAnumatenaiSAm udAharaNam Iryate ||96||

1 - tatra gurupAdAzrayo, yathA ekAdaze (11.3.21) -
tasmAd guruM prapadyeta jijJAsuH zreya uttamam |
zAbde pare ca niSNAtaM brahmaNy upazamAzrayam ||97||

2 - zrI-kRSNa-dIkSAdi-zikSaNaM, yathA tatraiva (11.3.22)
tatra bhAgavatAn dharmAn zikSed gurv-Atma-daivataH |
amAyayAnuvRttyA yais tuSyed AtmAtma-do hariH ||98||

3 - vizrambheNa guroH sevA, yathA tatraiva (11.17.27)-
AcAryaM mAM vijAnIyAn nAvamanyeta karhicit |
na martya-buddhyAsUyeta sarva-deva-mayo guruH ||99||

4 - sAdhu-vartmAnuvartanam, yathA skAnde -
sa mRgyaH zreyasAM hetuH panthAH santApa-varjitaH |
anvApta-zramaM pUrve yena santaH pratasthire ||100||

brahma-yAmale ca -
zruti-smRti-purANAdi-paJcarAtra-vidhiM vinA |
aikAntikI harer bhaktir utpAtAyaiva kalpate ||101||

bhaktir aikAntikI veyam avicArAt pratIyate |
vastutas tu tathA naiva yad azAstrIyatekSyate ||102||

5 - sad-dharma-pRcchA, yathA nAradIye --
acirAd eva sarvArthaH sidhyaty eSAm abhIpsitaH |
sad-dharmasyAvabodhAya yeSAM nirbandhinI matiH ||103||

6 - kRSNArthe bhogAdi-tyAgo, yathA pAdme -
harim uddizya bhogAni kAle tyaktavatas tava |
viSNu-loka-sthitA sampad-alolA sA pratIkSate ||104||

7 - dvArakAdi-nivAso, yathA skAnde --
saMvatsaraM vA SaNmAsAn mAsaM mAsArdham eva vA |
dvArakA-vAsinaH sarve narA nAryaz caturbhujAH ||105||

Adi-padena puruSottama-vAsaz ca, yathA brAhme --
aho kSetrasya mAhAtmyaM samantAd daza-yojanam |
diviSThA yatra pazyanti sarvAn eva caturbhujAn ||106||

gaGgAdi-vAso, yathA prathame (1.19.6) --
yA vai lasac-chrI-tulasI-vimizra-
kRSNAGghri-reNv-abhyadhikAmbu-netrI |
punAti sezAn ubhayatra lokAn
kas tAM na seveta mariSyamANaH ||107||

8 – yAvad-arthAnuvartitA, yathA nAradIye --
yAvatA syAt sva-nirvAhaH svIkuryAt tAvad artha-vit |
Adhikye nyUnatAyAM ca cyavate paramArthataH ||108||

9 - hari-vAsara-sammAno, yathA brahma-vaivarte -
sarva-pApa-prazamanaM puNyam AtyantikaM tathA |
govinda-smAraNaM nRRNAm ekadazyAm upoSaNam ||109||

10 – dhAtry-azvatthAdi-gauravam, yathA skAnde -
azvattha-tulasI-dhAtrI-go-bhUmisura-vaiSNavAH |
pUjitAH praNatAH dhyAtAH kSapayanti nRRNAm agham ||110||

11 - atha zrI-kRSNa-vimukha-jana-saMtyAgo, yathA kAtyAyana-saMhitAyAm -
varaM huta-vaha-jvAlA-paJjarAntar-vyavasthitiH |
na zauri-cintA-vimukha-jana-saMvAsa-vaizasam ||111||

viSNu-rahasye ca -
AliGganaM varaM manye vyAla-vyAghra-jalaukasAm |
na saGgaH zalya-yuktAnAM nAnA-devaika-sevinAm ||112||

12 - 13 - 14 - ziSyAnanubanddhitvAdi-trayaM, yathA saptame (7.13.8) -
na ziSyAn anubadhnIta granthAn naivAbhyased bahUn |
na vyAkhyAm upayuJjIta nArambhAn Arabhet kvacit ||113||

15 - vyAvahAre’py akArpaNyaM, yathA pAdme --
alabdhe vA vinaSTe vA bhakSyAcchAdana-sAdhane |
aviklava-matir bhUtvA harim eva dhiyA smaret ||114||

16 – zokAdy-avaza-vartitA, yathA tatraiva --
zokAmarSAdibhir bhAvair AkrAntaM yasya mAnasam |
kathaM tatra mukundasya sphUrti-sambhAvanA bhavet ||115|||

17- anya-devAnajJA, yathA tatraiva --
harir eva sadArAdhyaH sarva-devezvarezvaraH |
itare brahma-rudrAdyA nAvajJeyAH kadAcana ||116||

18- bhUtAnudvega-dAyitA, yathA mahAbhArate --
piteva putraM karuNo nodvejayati yo janam |
vizuddhasya hRSIkezas tUrNaM tasya prasIdati ||117||

19 - sevA-nAmAparAdhAnAM varjanaM, yathA vArAhe --
mamArcanAparAdhA ye kIrtyante vasudhe mayA |
vaiSNavena sadA te tu varjanIyAH prayatnataH ||118||

pAdme ca --
sarvAparAdha-kRd api mucyate hari-saMzrayaH |
harer apy aparAdhAn yaH kuryAd dvipadapAMzulaH ||119||
nAmAzrayaH kadAcit syAt taraty eva sa nAmataH |
nAmno hi sarva-suhRdo hy aparAdhAt pataty adhaH ||120||

20- tan-nindAdy asahiSNutA, yathA zrI-dazame (10.74.40) –
nindAM bhagavataH zrNvaMs tat-parasya janasya vA |
tato nApaiti yaH so’pi yAty adhaH sukRtAc cyutaH ||121||

21 - atha vaiSNava-cihNa-dhRtiH, yathA pAdme --
ye kaNTha-lagna-tulasI-nalinAkSA-mAlA
ye bAhu-mUla-paricihNita-zaGkha-cakrAH |
ye vA lalATa-phalake lasad-Urdhva-puNDrAs
te vaiSNavA bhuvanam Azu pavitrayanti ||122||

22 - nAmAkSara-dhRtiH, yathA skAnde --
hari-nAmAkSara-yutaM bhAle gopI-mRDaGkitam |
tulasI-mAlikoraskaM spRzeyur na yamodbhaTAH ||123||

pAdme ca --
kRSNa-nAmAkSarair gAtram aGkayec candanAdinA |
sa loka-pAvano bhutvA tasya lokam avApnuyAt ||124||

23 - nirmAlya-dhRtiH, yathA ekAdaze (11.6.46)--
tvayopayukta-srag-gandha-vAso'laGkAra-carcitAH |
ucchiSTa-bhojino dAsAs tava mAyAM jayemahi ||125||

skAnde ca --
kRSNottIrNaM tu nirmAlyaM yasyAGgaM spRzate mune |
sarva-rogais tathA pApair mukto bhavati nArada ||126||

24 - agre tANDavaM, yathA dvArakA-mAhAtmye --
yo nRtyati prahRSTAtmA bhAvair bahuSu bhaktitaH |
sa nirdahati pApAni manvantara-zateSv api ||127||

tathA zrI-nAradoktau ca --
nRtyatAM zrI-pater agre tAlikA-vAdanair bhRzam |
uDDIyante zarIra-sthAH sarve pAtaka-pakSiNaH ||128||

25 – daNDavan-natiH, yathA nAradIye --
eko’pi kRSNAya kRtaH praNAmo
dazAzvamedhAvabhRthair na tulyaH |
dazAzvamedhI punar eti janma
kRSNa-praNAmI na punar-bhavAya ||129||

26 - abhyUtthAnaM, yathA brahmANDe --
yAn ArUDhaM puraH prekSya samAyAntaM janArdanam |
abhyutthAnaM naraH kurvan pAtayet sarva-kilbiSam ||130||

27 - anuvrajyA, yathA bhaviSyottare --
rathena saha gacchanti pArzvataH pRSThato’grataH |
viSNunaiva samAH sarve bhavanti zvapadAdayaH ||131 ||

28 - sthAne gatiH
sthAnaM tIrthaM gRhaM cAsya tatra tIrthe gatir yathA ||132 ||

purANAntare --
saMsAra-maru-kAntAra-nistAra-karaNa-kSamau |
slAghyau tAv eva caraNau yau hares tIrtha-gAminau ||133 ||

Alaye ca, yathA hari-bhakti-sudhodaye --
pravIzann AlayaM viSNor darzanArthaM subhaktimAn |
na bhUyaH pravizen mAtuH kukSi-kArAgRhaM sudhIH ||134 ||

29 - parikramo, yathA tatraiva --
viSNuM pradakSinI-kurvan yas tatrAvartate punaH |
tad evAvartanaM tasya punar nAvartate bhave ||135||

skAnde ca caturmAsya-mAhAtmye --
catur-vAraM bhramIbhis tu jagat sarvaM carAcaram |
krAntaM bhavati viprAgrya tat-tIrtha-gamanAdikam ||136||

30 - atha arcanam --
zuddhi-nyAsAdi-pUrvAGga-karma-nirvAha-pUrvakam |
arcanam tUpacArANAM syAn mantreNopapAdanam ||137||

tad, yathA dazame -- (10.81.19)
svargApavargayoH puMsAM rasAyAM bhuvi sampadAm |
sarvAsAm api siddhInAM mUlaM tAc-caraNArcanaM ||138||

viSNurahasye ca --
zrI-viSNor arcanaM ye tu prakurvanti narA bhuvi |
te yAnti zAzvataM viSNor AnandaM paramaM padam ||139 ||

31 - paricaryA --
paricaryA tu sevopakaraNAdi-pariSkriyA |
tathA prakIrNaka-cchatra-vAditrAdyair upAsanA ||140||

yathA nAradIye --
muhUrtaM vA muhUrtArdhaM yas tiSThed dhari-mandire |
sa yAti paramaM sthAnaM kim u zuzrUSaNe ratAH ||141 ||

yathA caturthe (4.21.31) --
yat-pAda-sevAbhirucis tapasvinAm
azeSa-janmopacitaM malaM dhiyaH |
sadyaH kSiNoty anvaham edhatI satI
yathA padAGguSTha-viniHsRtA sarit ||142 ||

aGgAni vividhAny eva syuH pUjA-paricaryayoH |
na tAni likhitAny atra grantha-bAhulya-bhItitaH ||143 ||

32 - atha gItaM, yathA laiGge --
brAhmaNo vAsudevAkhyaM gAyamAno’nizaM param |
hareH sAlokyam Apnoti rudra-gAnAdhikaM bhavet ||144 ||

33 - atha saMkIrtanam --
nAma-lIlA-guNadInAm uccair-bhASA tu kIrtanam ||145||

tatra nAma-kIrtanam, yathA viSNu-dharme --
kRSNeti maGgalaM nAma yasya vAci pravartate |
bhasmIbhavanti rAjendra mahA-pAtaka-koTayaH ||146||

lIlA-kIrtanam, yathA saptame (7.9.18) --
so’haM priyasya suhRdaH paradevatAyA
lIlA-kathAs tava nRsiMha viriJca-gItAH |
aJjas titarmy anugRNan guNa-vipramukto
durgANi te pada-yugAlaya-haMsa-saGgaH ||147||

guNa-kIrtanam, yathA prathame (1.5.22) --
idaM hi puMsas tapasaH zrutasya vA
sviSTasya sUktasya ca buddhi-dattayoH |
avicyuto’rthaH kavibhir nirUpito
yad uttamaHzloka-guNAnuvarNanam ||148||

34 - atha japaH
mantrasya sulaghUccAro japa ity abhidhIyate ||149 ||

yathA pAdme --
kRSNAya nama ity eSa mantraH sarvArtha-sAdhakaH |
bhaktAnAM japatAM bhUpa svarga-mokSa-phala-pradaH ||150||

35 - atha vijJaptiH, yathA skAnde --
harim uddizya yat kiJcit kRtaM vijJApanaM girA |
mokSa-dvArArgalAn mokSas tenaiva vihitas tava ||151 ||

samprArthanAtmikA dainya-bodhikA lAlasAmayI |
ity Adir vividhA dhIraiH kRSNe vijJaptir IritA ||152 ||

tatra samprArthanAtmikA, yathA pAdme --
yuvatInAM yathA yUni yUnAM ca yuvatau yathA |
mano’bhiramate tadvan mano’bhiramatAM tvayi ||153 ||

dainya-bodhikA, yathA tatraiva --
mat-tulyo nAsti pApAtmA nAparAdhI ca kazcana |
parihAre’pi lajjA me kiM brUve puruSottama ||154 ||

lAlasAmayI, yathA zrI-nArada-paJcarAtre --
kadA gambhIrayA vAcA zriyA yukto jagat-pate |
cAmara-vyagra-hastaM mAm evaM kurv iti vakSyasi ||155||

yathA vA --
kadAhaM yamunA-tIre nAmAni tava kIrtayan |
udbASpaH puNDarIkAkSa racayiSyAmi tANDavam ||156||

36 - atha stava-pAThaH --
proktA manISibhir gItA-stava-rAjAdayaH stavAH ||157||

yathA skAnde --
zrI-kRSNa-stava-ratnaughair yeSAM jihvA tv alaGkRtA |
namasyA muni-siddhAnAM vandanIyA divaukasAm ||158||

nArasiMhe ca --
stotraiH stavaz ca devAgre yaH stauti madhusUdanam |
sarva-pApa-vinirmukto viSNu-lokam avApnuyAt ||159 ||

37 - atha naivedyAsvAdo, yathA pAdme --
naivedyam annaM tulasI-vimizraM
vIzeSataH pAda-jalena siktam |
yo’znAti nityaM purato murAreH
prApNoti yajJAyuta-koTi-puNyam ||160||

38 - atha pAdyAsvAdo, yathA tatraiva --
na dAnaM na havir yeSAM svAdhyAyo na surArcanam |
te’pi pAdodakaM pItvA prayAnti paramAM gatim ||161 ||

39 - atha dhUpa-saurabhyam, yathA hari-bhakti-sudhodaye --
AghrANaM yad dharer datta-dhUpocchiSTasya sarvataH |
tad-bhava-vyAla-daSTAnAM nasyaM karma viSApaham ||162 ||

atha mAlya-saurabhyaM, yathA tantre --
praviSTe nAsikA-randhre harer nirmAlya-saurabhe |
sadyo vilayam AyAti pApa-paJjara-bandhanam ||163 ||

agastya-saMhitAyAM ca --
AghrANaM gandha-puSpAder arcitasya tapodhana |
vizuddhiH syAd anantasya ghrANasyehAbhidhIyate ||164 ||

40 - atha zrI-mUrteH sparzanaM, yathA viSNu-dharmottare --
spRsTvA viSNor adhiSThAnaM pavitraH zraddhayAnvitaH |
pApa-bandhair vinirmuktaH sarvAn kAmAn avApnuyAt ||165||

41 - atha zrI-mUrter darzanam, yathA vArAhe --
vRndAvane tu govindaM ye pazyanti vasundhare |
na te yama-puraM yAnti yAnti puNya-kRtAM gatim ||166||

42 - ArAtrika-darzanaM, yathA skAnde --
koTayo brahma-hatyAnAm agamyAgama-koTayaH |
dahaty Aloka-mAtreNa viSNoH sArAtrikaM mukham ||167||

utsava-darzanaM, yathA bhaviSyottare --
ratha-sthaM ye nirIkSante kautikenApi kezavam |
devatAnAM gaNAH sarve bhavanti zvapacAdayaH ||168||

Adi-zabdena pUjA-darzanaM, yathAgneye --
pUjitaM pUjyamAnaM vA yaH pazyed bhaktito harim ||169||

43 - atha zravaNam
zravaNaM nAma-carita-guNAdInAM zrutir bhavet ||170||

tatra nAma-zravaNaM, yathA gAruDe --
saMsAra-sarpa-daSTa-naSTa-ceSTaika-bheSajam |
kRSNeti vaiSNavaM mantraM zrutvA mukto bhaven naraH ||171 ||

caritra-zravaNaM, yathA caturthe -- (4.29.41)
tasmin mahan-mukharitA madhubhic-caritra-
pIyUSa-zeSa-saritaH paritaH sravanti |
tA ye pibanty avitRSo nRpa gADha-karNais
tAn na spRzanty azana-tRD-bhaya-zoka-mohAH ||172 ||

guNa-zravaNaM, yathA dvAdaze (12.3.15) --
yas tUttamaHzloka-guNAnuvAdaH
saGgIyate’bhIkSNam amaGgala-ghnaH |
tam eva nityaM zRNuyAd abhIkSNaM
kRSNe’malAM bhaktim abhIpsamAnaH ||173 ||

atha tat-kRpekSaNaM, yathA dazame (10.14.8) --
tat te’nukampAM su-samIkSamANo
bhuJjAna evAtma-kRtaM vipAkam |
hRd-vAg-vapurbhir vidadhan namas te
jIveta yo mukti-pade sa dAya-bhAk ||174 ||

atha smRtiH --
yathA kathaM cin-manasA sambandhaH smRtir ucyate ||175||

yathA viSNu-purANe (5.17.17) --
smRte sakala-kalyANa-bhAjanaM yatra jAyate |
puruSaM tam ajaM nityaM vrajAmi zaraNaM harim ||176||

yathA ca pAdme --
prayANe cAprayANe ca yan-nAma smaratAM nRRNAm |
sadyo nazyati pApaugho namas tasmai cid-Atmane ||177||

atha dhyAnam --
dhyAnam rupa-guNa-krIDA-sevAdeH suSThu cintanam ||178||

tatra rUpa-dhyAnaM, yathA nArasiMhe --
bhagavac-caraNa-dvandva-dhyAnaM nirdvandvam Iritam |
pApino’pi prasaGgena vihitaM suhitaM param ||179 ||

guNa-dhyAnaM, yathA viSNudharme --
ye kurvanti sadA bhaktyA guNAnusmaraNaM hareH |
prakSINa-kaluSaughAs te pravizanti hareH padam ||180||

krIdA-dhyAnaM, yathA padme --
sarva-mAdhurya-sArANi sarvAdbhutamayAni ca |
dhyAyan harez caritrANi lalitAni vimucyate ||181 ||

sevA-dhyAnaM, yathA purANAntare --
mAnasenopacArena paricarya hariM sadA |
pare vAG-manasA’gamyaM taM sAkSAt pratipedire ||182 ||

atha dAsyam --
dAsyaM karmArpaNaM tasya kaiGkaryam api sarvathA ||183 ||

tatra AdyaM yathA skAnde --
tasmin samarpitaM karma svAbhAvikam apIzvare |
bhaved bhAgavato dharmas tat-karma kimutArpitam ||184 ||

karma svAbhAvikaM bhadraM japa-dhyAnArcanAdi ca |
itIdaM dvividhaM kRSNe vaiSNavair dAsyam arpitam ||185||
mRdu-zraddhasya kathitA svalpA karmAdhikAritA |
tad-arpitaM harau dAsyam iti kaizcid udIryate ||186||

dvitiyaM, yathA nAradIye --
IhA yasya harer dAsye karmaNA manasA girA |
nikhilAsv apy avasthAsu jIvan-muktaH sa ucyate ||187||

atha sakhyam --
vizvAso mitra-vRttiz ca sakhyaM dvividham Iritam ||188||

tatra AdyaM, yathA mahAbhArate --
pratijJA tava govinda na me bhaktaH praNazyati |
iti saMsmRtya saMsmRtya prANAn saMdhArayAmy aham ||189 ||

tathA ekAdaze (11.2.53) ca --
tri-bhuvana-vibhava-hetave’py akuNTha-
smRtir ajitAtma-surAdibhir vimRgyAt |
na calati bhagavat-padAravindAl
lava-nimiSArdham api yaH sa vaiSNavAgryaH ||190||

zraddhA-mAtrasya tad-bhaktAv adhikAritva-hetutA |
aGgatvam asya vizvAsa-vizeSasya tu kezave ||191 ||

dvitIyaM, yathA agastya-saMhitAyAm --
paricaryA parAH kecit prAsAdeSu ca zerate |
manuSyam iva taM draSTuM vyAvahartuM ca bandhuvat ||192 ||

atha Atma-nivedanaM, yathA ekAdaze (11.29.34) --
martyo yadA tyakta-samasta-karmA
niveditAtmA vicikIrSito me |
tadAmRtatvaM pratipadyamAno
mayAtma-bhuUyAyA ca kalpate vai ||194 ||

artho dvidhAtma-zabdasya paNDitair upapAyate |
dehy-ahantAspadaM kaizcid dehaH kaizcin mamatva-bhAk ||195||

tatra dehI, yathA yAmunAcArya-stotre (49) --
vapurAdiSu yo’pi ko'pi vA
guNato’sAni yathA tathA-vidhaH |
tad ayaM tava pAda-padmayor
aham adyaiva mayA samarpitaH ||196||

deho, yathA bhakti-viveke --
cintAM kuryAn na rakSAyai vikrItasya yathA pazoH |
tathArpayan harau dehaM viramed asya rakSanAt ||197||

duSkaratvena virale dve sakhyAtma-nivedane |
keSAMcid eva dhIrANAM labhate sAdhanArhatAm ||198||

atha nija-priyopaharaNaM, yathA ekAdaze (11.11.41) --
yad yad iSTatamaM loke yac cAti-priyam AtmanaH |
tat tan nivedayen mahyaM tad AnantyAya kalpate ||199 ||

atha tad-arthe’khila-ceSTitaM, yathA paJcarAtre --
laukikI vaidikI vApi yA kriyA kriyate mune |
hari-sevAnukUlaiva sA kAryA bhaktim icchatA ||200||

atha zaraNApattiH, yathA hari-bhakti-vilAse (11.677) --
tavAsmIti vadan vAcA tathaiva manasA vidan |
tat-sthAnam Azritas tanvA modate zaraNAgataH ||201 ||

zrI-nArasiMhe ca --
tvAM prapanno’smi zaraNaM deva-deva janArdana |
iti yaH zaraNaM prAptas taM klezAd uddharAmy aham ||202 ||

53 -- atha tadIyAnAM sevanam | tulAsyaH, yathA skAnde --
yA dRSTA nikhilAgha-saGga-zamanI spRSTA vapuH-pAvanI
rogANAm abhivanditA nirasanI siktAntaka-trAsinI |
pratyAsatti-vidhAyinI bhagavataH kRSNasya saMropitA
nyastA tac-caraNe vimukti-phaladA tasyai tulasyai namaH ||203 ||

tathA ca tatraiva --
dRStA spRSTA tathA dhyAtA kIrtitA namitA stutA |
ropitA sevitA nityaM pUjitA tulasI zubhA ||204 ||
navadhA tulasIM devIM ye bhajanti dine dine |
yuga-koTi-sahasrANi te vasanti harer gRhe ||205||

54 -- atha zAstrasya,
zAstram atra samAkhyAtaM yad bhakti-pratipAdakam ||206||

yathA skAnde --
vaiSNavAni tu zAstrANI ye zRNvanti paThanti ca |
dhanyAs te mAnavA loke tesAM kRSNaH prasIdati ||207||
vaiSNavAni tu zAstrANI ye’rcayanti gRhe narAH |
sarva-pApa-vinirmuktA bhavanti sura-vanditAH ||208||
tiSThate vaiSNavaM zAstraM likhitaM yasya mandire |
tatra nArAyaNo devaH svayaM vasati nArada ||209 ||

tathA zrI-bhAgavate dvAdaze (12.13.15) ca --
sarva-vedAnta-sAraM hi zrI-bhAgavatam iSyate |
tad-rasAmRta-tRptasya nAnyatra syAd ratiH kvacit ||210||

55 -- atha mathurAyAH, yathA Adi-vArAhe
mathurAM ca parityajya yo’nyatra kurute ratim |
mUDho bhramati saMsAre mohitA mama mAyayA ||211 ||

brahmANDe ca --
trailokya-varti-tIrthAnAM sevanAd durlabhA hi yA |
parAnanda-mayI siddhir mathurA-sparSa-mAtrataH ||212 ||

zrutA smRtA kIrtitA ca vAJchitA prekSitA gatA |
spRSTA zritA sevitA ca mathurAbhISTadA nRNAm |
iti khyAtaM purANeSu na vistAra-bhiyocyate ||213 ||

56 --atha vaiSNavAnAM sevanaM, yathA pAdme (6.253.176) --
ArAdhanAnAM sarveSAM viSNor ArAdhanaM param |
tasmAt parataraM devi tadIyAnAM samarcanam ||214 ||

tRtIye (3.7.19) ca --
yat-sevayA bhagavataH kUTa-sthasya madhu-dviSaH |
rati-rAso bhavet tIvraH pAdayor vyasanArdanaH ||215||

skAnde ca --
zaGkha-cakrAGkita-tanuH zirasA maJjarI-dharaH |
gopI-candana-liptAGgo dRStaz cet tad-aghaM kutaH ||216||

prathame (1.19.33) ca --
yeSAM saMsmaraNAt puMsAM sadyaH zuddhyanti vai gRhAH |
kiM punar darzana-sparza-pAda-zaucAsanAdibhiH ||217||

AdI-purANe --
ye me bhakta-janAH pArtha na me bhaktAz ca te janAH |
mad-bhaktAnAM ca ye bhaktAs te me bhaktatamA matAH ||218||

yAvanti bhagavad-bhakter aGgAni kathitAnIha |
prAyas tAvanti tad-bhakta-bhakter api budhA viduH ||219 ||

57 - atha yathA-vaibhava-mahotsavo, yathA pAdme --
yaH karoti mahIpAla harer gehe mahotsavam |
tasyApi bhavati nityaM hari-loke mahotsava ||220||

58 - atha UrjAdaro, yathA pAdme --
yathA dAmodaro bhakta-vatsalo vidito janaiH |
tasyAyaM tAdRzo mAsaH svalpam apy uru-kArakaH ||221 ||

tatrApi mathurAyAM vizeSo, yathA tatraiva --
bhuktiM muktiM harir dadyAd arcito’nyatra sevinAm |
bhaktiM tu na dadAty eva yato vazyakarI hareH ||222 ||
sA tv aJjasA harer bhaktir labhyate kArttike naraiH |
mathurAyAM sakRd api zrI-dAmodara-sevanAt ||223 ||

59 -- atha zrI-janma-dina-yAtrA, yathA bhaviSyottare --
yasmin dine prasUteyaM devakI tvAM janArdana |
tad-dinaM brUhi vaikuNTha kurmas te tatra cotsavam |
tena samyak-prapannAnAM prasAdaM kuru kezavaH ||224 ||

60 -- atha zrI-mUrter-anghri-sevane prItiH, yathA Adi-purANe --
mama nAma-sadAgrAhI mama sevA-priyaH sadA |
bhaktis tasmai pradAtavyA na tu muktiH kadAcana ||225||

61 -- atha zrI-bhAgavatArthAsvAdo, yathA prathame (1.1.3) --
nigama-kalpa-taror-galitaM phalaM
zuka-mukhAd amRta-drava-saMyutam |
pibata bhAgavataM rasam AlayaM
muhur aho rasikA bhuvi bhAvukAH ||226||

tathA dvitIye (2.1.9) ca --
pariniSThito’pi nairguNye uttamaHzloka-lIlayA |
gRhita-cetA rAjarSe AkhyAnaM yad adhItavAn ||227||

62 --atha sa-jAtIyAzaya-snigdha-zrI-bhagavad-bhakta-saGgo, yathA prathame (1.18.13) --
tulayAma lavenApi na svargaM nApunar-bhavam |
bhagavat-saGgi-saGgasya martyAnAM kimutAziSaH ||228||

hari-bhakti-sudhodaye ca --
yasya yat-saGgatiH puMso maNivat syAt sa tad-guNaH |
sva-kUlarddhyai tato dhImAn sva-yUthyAn eva saMzrayet ||229 ||

63 -- atha zrI-nAma saMkIrtanaM, yathA dvitIye (2.1.11)
etan nirvidyamAnAnAm icchatAm akuto-bhayam |
yoginAM nRpa nirNItaM harer nAmAnukIrtanaM ||230||

Adi-purANe ca --
gItvA ca mama nAmAni vicaren mama sannidhau |
iti bravImi te satyaM krIto’haM tasya cArjuna ||231 ||

pAdme ca --
yena janma-sahasrANi vAsudevo niSevitaH |
tan-mukhe hari-nAmAni sadA tiSThanti bhArata ||232 ||

yatas tatraiva ca --
nAma cintAmaNiH kRSNaz caitanya-rasa-vigrahaH |
pUrNaH zuddho nitya-mukto’bhinnatvAn nAma-nAminoH ||233 ||

ataH zrI-kRSNa-nAmAdi na bhaved grAhyaM indriyaiH |
sevonmukhe hi jihvAdau svayam eva sphuraty adaH ||234 ||

64 - atha zrI-mathurA-maNDale sthitiH, yathA pAdme --
anyeSu puNya-tIrtheSu muktir eva mahA-phalam |
muktaiH prArthyA harer bhaktir mathurAyAM tu labhyate ||235||
tri-vargadA kAminAM yA mumukSUNAM ca mokSadA |
bhaktIcchor bhaktidA kas tAM mathurAM nAzrayed budhaH ||236||
aho madhu-purI dhanyA vaikuNThAc ca garIyasI |
dinam ekaM nivAsena harau bhaktiH prajAyate ||237||

durUhAdbhuta-vIrye’smin zraddhA dUre’stu paJcake |
yatra svalpo’pi sambandhaH sad-dhiyAM bhAva-janmane ||238||

tatra zrI-murtiH yathA --
smerAM bhaGgI-traya-paricitAM sAci-vistIrNa-dRSTiM
vaMzI-nyastAdhara-kizalayAm ujjvalAM candrakeNa |
govindAkhyAM hari-tanum itaH kezi-tIrthopakaNThe
mA prekSiSThAs tava yadi sakhe bandhu-sange’sti raGgaH ||239 ||

zrI-bhAgavataM yathA --
zaGke nItAH sapadi dazama-skandha-padyAvalInAM
varNAH karNAdhvani pathi katAmAnupurvyAd bhavadbhiH |
haMho dimbhAH parama-zubhadAn hanta dharmArtha-kAmAn
yad garhantaH sukhamayam amI mokSam apy AkSipanti ||240||

kRSNa-bhakto yathA --
dRg-ambhobhir dhautaH pulaka-patalI maNDita-tanuH
skhalann antaH-phullo dadhad atipRthuM vepathum api |
dRzoH kakSAM yAvan mama sa puruSaH ko’py upayayau
na jAte kiM tAvan matir iha gRhe nAbhiramate ||241 ||

nAma yathA --
yadavadhi mama zItA vaiNikenAnugItA
zruti-patham agha-zatror nAmA-gAthA prayAtA |
anavakalita-pUrvAM hanta kAm apy avasthAM
tadavadhi dadhad-antar-mAnasaM zAmyatIva ||242 ||

zrI mathurA-maNDalaM yathA
taTa-bhuvi kRta-kAntiH zyAmalA yAs taTinyAH
sphuTita-nava-kadambAlambi-kUjad-dvirephA |
niravadhi-madhurimNA maNDiteyaM kathaM me
manasi kam api bhAvaM kAnana-zrIs tanoti ||243 ||

alaukika-padArthAnAm acintyA zaktir IdRzI |
bhAvaM tad-viSayaM cApi yA sahaiva prakAzayet ||244 ||
keSAMcit kvacid aGgAnAM yat kSudraM zrUyate phalaM |
bahir-mukha-pravRttyaitat kintu mukhyaM phalaM ratiH ||245||
saMmataM bhakti-vijJAnAM bhakty-aGgatvaM na karmaNAm ||246||

yatha caikAdaze (11.20.9)
tAvat karmANi kurvIta na nirvidyeta yAvatA |
mat-kathA-zravaNAdau vA zraddhA yAvan na jAyate ||247||

jJAna-vairAgyayor bhakti-pravezAyopayogitA |
ISat prathamam eveti nAGgatvam ucitaM tayoH ||248||
yad ubhe citta-kAThinya-hetU prAyaH satAM mate |
sukumAra-svabhAveyaM bhaktis tad-dhetur IritA ||249 ||

yathA tatraiva (11.20.31) --
tasmAn mad-bhakti-yuktasya yogino vai mad-AtmanaH |
na jJAnaM na ca vairAgyaM prAyaH zreyo bhaved iha ||250||

kintu jJAna-virakty-Adi-sAdhyaM bhaktyaiva sidhyati ||251 ||

yathA tatraiva (11.20.32-33) --
yat karmabhir yat tapasA jJAna-vairAgya taz ca yat |
yogena dAna dharmeNa zreyobhir itarair api ||252 ||
sarvaM mad-bhakti-yogena mad-bhakto labhate’njasA |
svargApavargaM mad-dhAma kathaJcid yadi vAJchati ||253 ||

rucim udvahatas tatra janasya bhajane hareH |
viSayeSu gariSTho’pi rAgaH prAyo vilIyate ||254 ||
anAsaktasya viSayAn yathArham upayuJjataH |
nirbandhaH kRSNa-sambandhe yuktaM vairAgyam ucyate ||255||
prApaJcikatayA buddhyA hari-sambandhi-vastunaH |
mumukSubhiH parityAgo vairAgyaM phalgu kathyate ||256||
proktena lakSaNenaiva bhaktir adhikRtasya ca |
aGgatve suniraste’pi nityAdy-akhila-karmaNAM ||257||
jnAnasyAdhyAtmikasyApi vairagyasya ca phalgunaH |
spaSTatArthaM punar api tad evedaM nirAkRtaM ||258||
dhana-ziSyAdibhir dvArair yA bhaktir upapAdyate |
vidUratvAd uttamatA-hAnyA tasyAz ca nAGgatA ||259 ||
vizeSaNatvam evaiSAM saMzrayanty adhikAriNAm |
vivekAdIny ato’mISAm api nAGgatvam ucyate ||260||
kRSNonmukhaM svayaM yAnti yamAH zaucAdayas tathA |
ity eSAM ca na yuktA syAd bhakty-aGgAntara-pAtitA ||261 ||

yathA skAnde --
ete na hy adbhutA vyAdha tavAhiMsAdayo guNAH |
hari-bhaktau pravRttA ye na te syuH para-tApinaH ||262 ||

tatraiva --
antaH-zuddhir bahiH-zuddhis tapaH-zAnty-adayas tathA |
amI guNAH prapadyante hari-sevAbhikAminAm ||263 ||

sA bhaktir eka-mukhyANgAzritAnaikAGgi kAtha vA |
svavAsanAnusAreNa niSThAtaH siddhi-kRd bhavet ||264 ||

tatra ekAGgA, yathA granthAntare --
zrI viSNoH zravaNe parIkSid abhavad vaiyAsakiH kIrtane
prahlAdaH smaraNe tad-aGghri-bhajane lakSmIH pRthuH pUjane |
akrUras tv abhivandane kapi-patir dAsye’tha sakhye’rjunaH
sarvasvAtma-nivedane balir abhUt kRSNAptir eSAM parA ||265||

anekAGgA, yathA navame (9.4.18-20) --
sa vai manaH kRSNa-padAravindayor vacAMsi vaikuNTha-guNAnuvarNane |
karau harer mandira-mArjanAdiSu zrutiM cakArAcyuta-sat-kathodaye ||266||
mukunda-liGgAlaya-darzane dRzau tad-bhRtya-gAtra-sparze’Gga-saGgamaM |
ghrANaM ca tat-pAda-saroja-saurabhe zrImat-tulasyA rasanAM tad-arpite ||267||
pAdau hareH kSetra-padAnusarpaNe ziro hRSIkeza-padAbhivandane |
kAmaM ca dAsye na tu kAma-kAmyayA yathottamaHzloka-janAzraya ratiH ||268||

zAstroktayA prabalayA tat-tan-maryAdayAnvitA |
vaidhi bhaktir iyaM kaizcan maryAdA-mArga ucyate ||269 ||

atha rAgAnugA –
virAjantIm abhivyaktAM vraja-vAsI janAdiSu |
rAgAtmikAm anusRtA yA sA rAgAnugocyate ||270||
rAgAnugA-vivekArtham Adau rAgAtmikocyate ||271 ||
iSTe svArasikI rAgaH paramAviSTatA bhavet |
tan-mayI yA bhaved bhaktiH sAtra rAgAtmikoditA ||272 ||
sA kAmarUpA sambandha-rUpA ceti bhaved dvidhA ||273 ||

tathA hi saptame (7.1.29-30) --
kAmAd dveSAd bhayAt snehAd yathA bhaktyezvare manaH |
Avezya tad aghaM hitvA bahavas tad-gatiM gatAH ||274 ||
gopyaH kAmAd bhayAt kaMso dveSAc caidyAdayo nRpAH |
sambandhAd vRSNayaH snehAd yUyaM bhaktyA vayaM vibho ||275||iti ||

AnukUlya-viparyAsAd bhIti-dveSau parAhatau |
snehasya sakhya-vAcitvAd vaidha-bhakty-anuvartitA ||276||
kiM vA premAbhidhAyitvAn nopayogo’tra sAdhane |
bhaktyA vayam iti vyaktaM vaidhI bhaktir udIritA ||277||
yad-arINAM priyANAM ca prApyam ekam ivoditam |
tad brahma-kRSNayor aikyAt kiraNArkopamA-juSoH ||278||
brahmaNy eva layaM yAnti prAyeNa ripavo hareH |
kecit prApyApi sArUpyAbhAsaM majjanti tat-sukhe ||279 ||

tathA ca brahmANDa purANe –
siddha-lokas tu tamasaH pAre yatra vasanti hi |
siddhA brahma-sukhe magnA daityAz ca hariNa hatAH ||280||

rAga-bandhena kenApi taM bhajanto vrajanty amI |
aGghri-padma-sudhAH prema-rUpAs tasya priyA janAH ||281 ||

tathA hi zrI-dazame (10.87.23) –
nibhRta-marun-mano’kSa-dRDha-yoga-yujo hRdi yan
munaya upAsate tad-arayo’pi yayuH smaraNAt |
striya uragendra-bhoga-bhuja-daNDa-viSakta-dhiyo
vayam api te samAH sama-dRzo’Gghri-saroja-sudhAH ||282 ||

tatra  rUpA –
sA kAmarUpA sambhoga-tRSNAM yA nayati svatAm |
yad asyAM kRSNa-saukhyArtham eva kevalam udyamaH ||283 ||
iyaM tu vraja-devISu suprasiddhA virAjate |
AsAM prema-vizeSo’yaM prAptaH kAm api mAdhurIM |
tat-tat-krIDA-nidAnatvAt kAma ity ucyate budhaiH ||284 ||

tathA ca tantre –
premaiva gopa-rAmANAM kAma ity agamat prathAm ||285||

ity uddhavAdayo’py etaM vAJchati bhagavat-priyAH ||286||
kAma-prAyA ratiH kintu kubjAyAm eva sammatA ||287||

tatra sambandha-rUpA –
sambandha-rUpA govinde pitRtvAdy-AbhimAnitA |
atropalakSaNatayA vRSNInAM vallavA matAH |
yadaizya-jJAna-zUnyatvAd eSAM rAge pradhAnatA ||288||
kAma-sambandha-rUpe te prema-mAtra-svarUpake |
nitya-siddhAzrayatayA nAtra samyag vicArite ||289 ||
rAgAtmikAyA dvaividhyAd dvidhA rAgAnugA ca sA |
kAmAnugA ca sambandhAnugA ceti nigadyate ||290||

tatra adhikArI –
rAgAtmikAika-niSThA ye vraja-vAsi-janAdayaH |
teSAM bhAvAptaye lubdho bhaved atrAdhikAravAn ||291 ||
tat-tad-bhAvAdi-mAdhurye zrute dhIr yad apekSate |
nAtra zAstraM na yuktiM ca tal-lobhotpatti-lakSaNaM ||292 ||
vaidha-bhakty-adhikArI tu bhAvAvirbhavanAvadhi |
atra zAstraM tathA tarkam anukUlam apekSate ||293 ||
kRSNaM smaran janaM cAsya preSThaM nija-samIhitam |
tat-tat-kathA-rataz cAsau kuryAd vAsaM vraje sadA ||294 ||
sevA sAdhaka-rUpeNa siddha-rUpeNa cAtra hi |
tad-bhAva-lipsunA kAryA vraja-lokAnusArataH ||295||
zravaNotkIrtanAdIni vaidha-bhakty-uditAni tu |
yAny aGgAni ca tAny atra vijJeyAni manISibhiH ||296||

tatra kAmAnugA –
kAmAnugA bhavet tRSNA kAma-rUpAnugAminI ||297||
sambhogecchA-mayI tat-tad-bhAvecchAtmeti sA dvidhA ||298||
keli-tAtparyavaty eva sambhogecchA-mayI bhavet |
tad-bhAvecchAtmikA tAsAm bhAva-mAdhurya-kAmitA ||299 ||
zrI-mUrter mAdhurIM prekSya tat-tal-lIlAM nizamya vA |
tad-bhAvAkANkSiNo ye syus teSu sAdhanatAnayoH |
purANe zruyate pAdme puMsam api bhaved iyam ||300||

yathA –
purA maharSayaH sarve daNDakAraNya-vAsinaH |
dRSTvA rAmaM hariM tatra bhoktum aicchan suvigraham ||301 ||
te sarve strItvam ApannAH samudbhUtAz ca gokule |
hariM samprApya kAmena tato muktA bhavArNavAt ||302 ||

riraMsAM suSThu kurvan yo vidhi-mArgeNa sevate |
kevalenaiva sa tadA mahiSItvam iyAt pure ||303 ||

tathA ca mahA-kaurme –
agni-putrA mahAtmAnas tapasA strItvam Apire |
bhartAraM ca jagad-yoniM vAsudevam ajaM vibhum ||304 ||

atha sambandhAnugA --
sA sambandhAnugA bhaktiH procyate sadbhir Atmani |
yA pitRtvAdi-sambandha-mananAropanAtmikA ||305||
lubdhair vAtsalya-sakhyAdau bhaktiH kAryAtra sAdhakaiH |
vrajendra-subalAdInAM bhAva-ceSTita-mudrayA ||306||
tathA hi zruyate zAstre kazcit kurupurI-sthitaH |
nanda-sUnor adhiSThAnaM tatra putratayA bhajan |
nAradasyopadezena siddho’bhUd vRddha-vardhakiH ||307||

ataeva nArAyaNa-vyUha-stave –
pati-putra-suhRd-bhrAtR-pitRvan maitravad dharim |
ye dhyAyanti sadodyuktAs tebhyo’pIha namo namaH ||308||

kRSNa-tad-bhakta-kAruNya-mAtra-lAbhaika-hetukA |
puSTi-mArgatayA kaizcid iyaM rAgAnugocyate ||309 ||

iti zrI-zrI-bhakti-rasAmRta-sindhau
purva-vibhAge sAdhana-bhakti-laharI-dvitiyA ||


atha bhAvaH

zuddha-sattva-vizeSAtmA prema-sUryAMzu-sAmya-bhAk |
rucibhiz citta-mAsRNya-kRd asau bhAva ucyate ||1 ||

tathA hi tantre --
premNas tu prathamAvasthA bhAva ity abhidhIyate |
sAttvikAH svalpa-mAtrAH syur atrAzru-pulakAdayaH ||2 ||

sa yathA padma-purANe --
dhyAyaM dhyAyaM bhagavataH pAdAmbuja-yugaM tadA |
ISad-vikriyamANAtmA sArdra-dRStir abhUd asau ||3 ||

AvirbhUya mano-vRttau vrajanti tat-svarUpatAM |
svayaM-prakAza-rUpApi bhAsamAnA prAkAzyavat ||4 ||
vastutaH svayam AsvAda-svarUpaiva ratis tv asau |
kRSNAdi-karmakAsvAda-hetutvaM pratipadyate ||5||
sAdhanAbhinivezena kRSNa-tad-bhaktayos tathA |
prasAdenAtidhanyAnAM bhAvo dvedhAbhijAyate |
Adyas tu prAyikas tatra dvitIyo viralodayaH ||6||

tatra sAdhanAbhiniveza-jaH
vaidhI-rAgAnugA-mArga-bhedena parikIrtitaH |
dvividhaH khalu bhAvo'tra sAdhanAbhinivezajaH ||7||
sAdhanAbhinivezas tu tatra niSpAdayan rucim |
harAv Asaktim utpAdya ratiM saMjanayaty asau ||8||

tatra Adyo (1.5.26) --
tatrAnvahaM kRSNa-kathAH pragAyatAm
anugraheNAzRNavaM manoharAH |
tAH zraddhayA me’nupadaM vizRNvataH
priya-zravasy aGga mamAbhavad ratiH ||9 ||iti |

ratyA tu bhAva evAtra na tu premAbhidhIyate |
mama bhaktiH pravRtteti vakSyate sa yad agrataH ||10||

yathA tatraiva (1.5.28) --
itthaM zarat-prAvRSikAv RtU harer
vizRNvato me’nusavaM yazo’malam |
saGkIrtyamAnaM munibhir mahAtmabhir
bhaktiH pravRttAtma rajas-tamopahA ||11 ||

tRtIye ca (3.25.25) --
satAM prasaGgAn mama vIrya-saMvido
bhavanti hRt-karNa-rasAyanAH kathAH |
taj-joSaNAd Azv apavarga-vartmani
zraddhA ratir bhaktir anukramiSyati ||12 ||

purANe nAtya-zAstre ca dvayos tu rati-bhAvayoH |
samAnArthatayA hy atra dvayam aikyena lakSitam ||13 ||

dvitIyo, yathA pAdme --
itthaM manorathaM bAlA kurvatI nRtya utsukA |
hari-prItyA ca tAM sarvAM rAtrim evAtyavAhayat ||14 ||

atha zri-kRSNa-tad-bhakta-prasAdajaH
sAdhanena vinA yas tu sahasaivAbhijAyate |
sa bhAvaH kRSNa-tad-bhakta-prasAdaja itIyate ||15||

atha zrI-kRSNa-prasAdajaH --
prasAdA vAcikAloka-dAna-hArdAdayo hareH ||16||

tatra vAcika-prasAdajaH, yathA nAradIye --
sarva-maNgala-mUrdhanyA pUrNAnanda-mayI sadA |
dvijendra tava mayy astu bhaktir avyAbhicAriNI ||17||

Aloka-dAnajaH, yathA skAnde --
adRSTa-pUrvam Alokya kRSNaM jAGgala-vAsinaH |
viklidyad-antarAtmano dRSTiM nAkraSTum Izire ||18||

hArdaH --
prasAda Antaro yaH syAt sa hArda iti kathyate ||19 ||

yathA zuka-saMhitAyAM --
mahAbhAgavato jAtaH putras te bAdarAyaNa |
vinopAyair upeyAbhUd viSNu-bhaktir ihoditA ||20||

atha tad-bhakta-prasAdajaH, yathA saptame (7.4.36)
guNair alam asaGkhyeyair mahAtmyaM tasya sUcyate |
vAsudeve bhagavati yasya naisargikI ratiH ||21 ||

nAradasya prasAdena prahlAde zudha-vAsanA |
nisargaH saiva tenAtra ratir naisargikI matA ||22 ||

skAnde ca --
aho dhanyo’si devarSe kRpayA yasya tat-kSaNAt |
nIco’py utpulako lebhe lubdhako ratim acyute ||23 ||

bhaktAnAM bhedataH seyaM ratiH paJca-vidhA matA |
agre vivicya vaktavyA tena nAtra prapaJcyate ||24 ||
kSAntir avyartha-kAlatvaM viraktir mAna-zunyatA |
AzA-bandhaH samutkaNThA nAma-gAne sadA ruciH ||25||
Asaktis tad-guNAkhyAne prItis tad-vasati-sthale |
ity Adayo’nubhAvAH syur jAta-bhAvAGkure jane ||26||

tatra kSAntiH --
kSobha-hetAv api prApte kSAntir akSubhitAtmatA ||27||

yathA prathame (1.19.15) --
taM mopayAtaM pratiyantu viprA
gaGgA ca devI dhRta-cittam Ize |
dvijopasRSTaH kuhakas takSako vA
dazatv alaM gAyata viSNu-gAthAH ||28||

atha avyArtha-kAlatvaM, yathA hari-bhakti-sudhodaye
vAgbhiH stuvanto manasA smarantas
tanvA namanto’py anizaM na tRptAH |
bhaktAH sravan-netra-jalAH samagram
Ayur harer eva samarpayanti ||29 ||

atha viraktiH --
viraktir indriyArthAnAM syAd arocakatA svayaM ||30||

yathA paJcame (5.14.43) --
yo dustyajAn dAra-sutAn suhRd rAjyaM hRdi-spRzaH |
jahau yuvaiva malavad uttamaHzloka-lAlasaH ||31 ||

atha mAna-zUnyatA --
utkRSTatve’py amAnitvaM kathitA mAna-zUnyatA ||32 ||

yathA pAdme --
harau ratiM vahann eSa narendrANAM zikhA-maNiH |
bhikSAm aTann ari-pure zvapAkam api vandate ||33 ||

atha AzA-bandhaH --
AzA-bandho bhagavataH prApti-sambhAvanA dRDhA ||34 ||

yathA zrImat-prabhupAdAnAM --
na premA zravaNAdi-bhaktir api vA yogo’thavA vaiSNavo
jJAnaM vA zubha-karma vA kiyad aho saj-jAtir apy asti vA |
hInArthAdhika-sAdhake tvayi tathApy acchedya-mUlA satI
he gopI-jana-vallabha vyathayate hA hA mad-Azaiva mAm ||35||

atha samutkaNThA --
samutkaNThA nijAbhISTa-lAbhAya guru-lubdhatA ||36||

atha kRSNa-karNAmRte (54) --
AnamrAm asita-bhruvor upacitam akSINa-pakSmAGkureSv
AlolAm anurAgiNor nayanayor ArdrAM mRdau jalpite |
AtAmrAm adharAmRte mada-kalAm amlAna vaMzI-svaneSv
AzAste mama locanaM vraja-zizor-mUrtiM jagan-mohinIm ||37||

atha nAma-gAne sadA ruciH, yathA --
rodana-bindu-maranda-syandi-dRg-indIvarAdya govinda |
tava madhura-svara-kaNThI gAyati nAmAvalIM bAlA ||38||

tad-guNAkhyAne AsAktiH, yathA kRSNa-karNAmRte (88) --
mAdhuryAd api madhuraM
manmathatA tasya kim api kaizoram |
capalyAd api capalaM
ceto bata harati hanta kiM kurmaH ||39 ||

tad vasati-sthale prItiH, yathA padyAvalyAm --
atrAsIt kila nanda-sadma zakaTasyAtrAbhavad bhaJjanaM
bandha-ccheda-karo’pi dAmabhir abhUd baddho’tra dAmodaraH |
itthaM mAthura-vRddha-vaktra-vigalat-pIyUSa-dhArAM pibann
AnandAzru-dharaH kadA madhu-purIM dhanyaz cariSyAmy aham ||40||

api ca --
vyaktaM masRNitevAntar lakSyate rati-lakSaNam |
mumukSu-prabhRtInAM ced bhaved eSA ratir na hi ||41 ||
vimuktAkhila-tarSair yA muktir api vimRgyate |
yA kRSNenAtigopyAzu bhajadbhyo’pi na dIyate ||42 ||
sA bhukti-mukti-kAmatvAc chuddhAM bhaktim akurvatAm |
hRdaye sambhavaty eSAM kathaM bhAgavatI ratiH ||43 ||
kintu bAla-camatkAra-karI tac-cihna-vIkSayA |
abhijJena subodho’yaM raty-AbhAsaH prakIrtitaH ||44 ||
pratibimbas tathA cchAyA raty-AbhAso dvidhA mataH ||45||

tatra pratibimbaH --
azramAbhISTa-nirvAhI rati-lakSaNa-lakSitaH |
bhogApavarga-saukhyAMza-vyaJjakaH pratibimbakaH ||46||
daivAt sad-bhakta-saGgena kIrtanAdy-anusAriNAm |
prAyaH prasanna-manasAM bhoga-mokSAdi rAgiNAm ||47||
keSAMcit hRdi bhAvendoH pratibimba udaJcati |
tad-bhakta-hRn-nabhaH-sthasya tat-saMsarga-prabhAvataH ||48||

atha chAyA --
kSudra-kautUhala-mayI caJcalA duHkha-hAriNI |
ratez chAyA bhavet kiMcit tat-sAdRzyAvalambinI ||49 ||
hari-priya-kriyA-kAla-deza-pAtrAdi-saGgamAt |
apy AnuSaGgikAd eSa kvacid ajJeSv apIkSyate ||50||
kintu bhAgyaM vinA nAsau bhAva-cchAyApy udaJcati |
yad abhyudayataH kSemaM tatra syAd uttarottaram ||51 ||
hari-priya-janasyaiva prasAda-bhara-lAbhataH |
bhAvAbhAso’pi sahasA bhAvatvam upagacchati ||52 ||
tasminn evAparAdhena bhAvAbhAso’py anuttamaH |
krameNa kSayam Apnoti kha-sthaH pUrNa-zazI yathA ||53 ||

kiM ca --
bhAvo’py abhAvam AyAti kRSNa-preSThAparAdhataH |
AbhAsatAM ca zanakair nyUna-jAtIyatAm api ||54 ||
gADhAsaGgAt sadAyAti mumukSau supratiSThite |
AbhAsatAm asau kiMvA bhajanIyeza-bhAvatAm ||55||
ataeva kvacit teSu navya-bhakteSu dRzyate |
kSaNam Izvara-bhAvo’yaM nRtyAdau mukti-pakSagaH ||56||
sAdhanekSAM vinA yasminn akasmAd bhAva IkSyate |
vighna-sthagitam atrohyaM prAg-bhavIyaM susAdhanaM ||57||
lokottara-camatkAra-kArakaH sarva-zaktidaH |
yaH prathIyAn bhaved bhAvaH sa tu kRSNa-prasAdajaH ||58||
jane cej jAta-bhAve’pi vaiguNyam iva dRzyate |
kAryA tathApi nAsUyA kRtArthaH sarvathaiva saH ||59 ||

yathA nArasiMhe --
bhagavati ca harAv ananya-cetA
bhRzam alino’pi virAjate manuSyaH |
na hi zaza-kaluSa-cchaviH kadAcit
timira-parAbhavatAm upaiti candraH ||60||

ratir aniza-nisargoSNa-prabalatarAnanda-pUra-rUpaiva |
uSmANam api vamantI sudhAMzu-koTer api svAdvI ||61 ||

iti zrI-zrI bhakti-rasAmRta-sindhau
purva-vibhAge bhAva-bhakti-laharI tRtIyA ||

atha premA

samyaG-masRNita-svAnto mamatvAtizayAGkitaH |
bhAvaH sa eva sAndrAtmA budhaiH premA nigadyate ||1 ||

yathA paJcarAtre—
ananya-mamatA viSNau mamatA prema-saGgatA |
bhaktir ity ucyate bhISma-prahlAdoddhava-nAradaiH ||2 ||

bhaktiH premocyate bhISma-mukhyair yatra tu saGgatA |
mamatAnya-mamatvena varjitety atra yojanA ||3 ||
bhAvottho’ti-prasAdotthaH zrI-harer iti sa dvidhA ||4 ||

tatra bhAvotthaH --
bhAva evAntar-aGgANam-aGgAnAm-anusevayA |
ArUDhaH parama-utkarSam bhAva-uttaH parikIrtitaH ||5||

tatra vaidha-bhAvottho, yathaikAdaze (11.2.40)
evaM-vrataH sva-priya-nAma-kIrtyA
jAtAnurAgo druta-citta uccaiH |
hasaty atho roditi rauti gAyaty
unmAdavan nRtyati loka-bAhyaH ||6||

rAgAnugIya-bhAvottho, yathA pAdme
na patiM kAmayet kaJcid brahmacarya-sthitA sadA |
tam-eva mUrtiM dhyAyantI candrakantir-varAnanA ||7||
zrI-kRSNa-gAthAM gAyantI romANcodbheda-lakSaNA |
asmin-manvantare snigdhA zrI-kRSNa-priya-vartayA ||8||

atha harer atiprasAdotthaH --
harer atiprasAdo’yaM saGga-dAnAdir AtmanaH ||9 ||

yathaikAdaze (11.12.7) --
te nAdhIta-zruti-gaNA nopAsita-mahattamAH |
avratAtapta-tapasaH mat-saGgAn mAm upAgatAH ||10||

mAhAtmya-jJAna-yuktaz ca kevalaz ceti sa dvidhA ||11 ||

atha Adyo, yathA paJcarAtre --
mAhAtmya-jJAna-yuktas tu sudRDhaH sarvato’dhikaH |
sneho bhaktir iti proktas tayA sArSTyAdinAnyathA ||12 ||

kevalo, yathA tatraiva --
manogatir avicchinnA harau prema-pariplutA |
abhisandhi-vinirmuktA bhaktir-viSNu-vazaGkarI ||13 ||iti |

mahima-jJAna-yuktaH syAd vidhi-mArgAnusAriNAm |
rAgAnugAzritAnAM tu prAyazaH kevalo bhavet ||14 ||

Adau zraddhA tataH sAdhu-saGgo’tha bhajana-kriyA |
tato’nartha-nivRttiH syAt tato niSThA rucis tataH ||15||
athAsaktis tato bhAvas tataH premAbhyudaJcati |
sAdhakAnAm ayaM premnaH prAdurbhAve bhavet kramaH ||16||
dhanyasyAyaM navaH premA yasyonmIlati cetasi |
antarvANIbhir apy asya mudrA suSThu sudurgamA ||17||

ataeva zrI-nArada-paJcarAtre, yathA --
bhAvonmatto hareH kiJcin na veda sukham AtmanaH |
dukhaM ceti mahezAni paramAnanda AplutaH ||18||

premNa eva vilAsatvAd vairalyAt sAdhakeSv api |
atra snehAdayo bhedA vivicya na hi zaMsitAH ||19 ||

zrImat-prabhupadAmbhojaiH sarvA bhAgavatAmRte |
vyaktIkRtAsti gUDhApi bhakti-siddhAnta-mAdhurI ||20||
gopAla-rUpa-zobhAM dadhad api raghunAtha-bhAva-vistArI |
tuSyatu sanAtanAtmA prathama-vibhAge sudhAmbu-nidheH ||21 ||

iti zrI-zrI-bhakti-rasAmRta-sindhau
pUrva-vibhAge prema-bhakti-laharI-caturthI

iti zrI-zrI-bhakti-rasAmRta-sindhau
rasopayogi-sthAyi-bhAvopapAdano nAma
pUrvavibhAgaH samAptaH