網主的話_香港人的網頁

網主的話

舊話連篇XXXI(20/04/2005-03/06/2005)_共11篇

※1/6日記
　又成個禮拜無打到日記添。
　近來返工嘅鐘數已經越來越多，非常令人感動。已經決定入咗U之後點都要繼續做。
　今日俾人「放逐」咗去睇住啲怪獸機（MTBT機，智財咭專用），好無奈，之前又幾乎完全無教過我，攪到我要成日搵人求救。仲以為呢隻機真係好勁，但係始終有嘢出問題，只係頻率低過啲老爺機好多，如果唔係嘅話，一個人睇成十幾部係會死的。最有趣的還是食咗張智財咭時拎返佢出來嘅方法．．．竟然係用大頭針！呢方面，好似啲老爺機先進啲喎。
　用咗僅有嘅三個字來食飯，食完真係覺得有少少消化不良．．．
　典型賭仔嘅行徑真係好攪笑，gum gum 吓部機又拎番轉頭－去睇電視機，睇完再gum，令我以為佢地要搵我，不過之後已經見慣不怪。而佢地臨開跑前趕住買飛嘅心急樣子，在我這些「旁觀者」看來亦非常有趣。
　好多人真係唔睇on screen instruction的，明明三T截咗受注，佢仲係咁試部機想買電腦飛．．．於是我又可以扮專業咁話俾個客知三T已經截咗。
　真係出面跑乜都覺得唔關自己事，淨係成日諗住幾時收工。唔怪之得Mina話有無賭馬／賭波係有樣睇的。
　成晚都見到有人喺垃圾桶摷飛。不過算喇，馬會嘅垃圾桶點都會乾淨過外面嗰啲嘅。不過最精彩嘅都係上次有人要喺垃圾桶搵返自己張飛。
　最近兩日已經喺啲機度執咗兩張智財咭出來。
　好多人都叫我可以搵多一兩份補習，但係我覺得可以balance到work，leisure 同埋money嘅工唔易搵囉。況且喺馬會做一個鐘一定輕鬆過同人補習一個鐘好多。
　其實點睇馬會班客嘅煙民比例一定低唔過茶餐廳，但係馬會咪一樣可以全面禁煙。已經見過唔少人攞住包煙來問嘢，但係從來見唔到有人食。所以全面禁煙是絕對不會影響生意的，更會引來不吸煙的大多數。
　突然間喺度諗，喺巴士公司做可以免費搭巴士，就算做M記都有個餐食吓吖，如果做馬會都有免費投注額送俾我地嘅話，會點呢？
　話時話，依家除咗返工之外都好似無行入過馬會半步。
03/06/2005

※報應
　繼續返工。
　重過那種不斷有人塞錢埋來的生活，講得難聽啲嘅，啲人真係慌死輸唔切。　有時都唔知呢啲係咪就叫做報應。收到成大堆一蚊餅，連毫子都收到成兩蚊，好在堆一蚊到最後找吓找吓清哂，而其中一個五毫子喺派彩嗰陣用咗。但係，我絕對無用成張一千蚊紙去買十蚊嘅MK6，或者相同性質嘅嘢囉。
　今日都唔知做乜。一般來講，好多人買電腦六合彩(QP MK6)係就咁隊廿蚊入來，乜都唔講（口架）嘛。有個女人，整咗張廿蚊，咁我咪照做咯，打緊飛嗰陣先睇到原來佢有後着！仲要唔係買QP MK6咯！XYZ．．．好在張飛無幾耐又賣得番出去啫。之後仲打錯咗張7個字，又係要等人買。最無奈都係幫個客填過張飛嗰陣眼花睇錯位，攪到要cancel 飛再出過一張。部機又唔係好順，有啲飛俾部機摺鄒咗先彈出來。
　有個啊婆好人到連自己俾咗幾多錢都唔知。佢明明數足五十蚊俾我，但係返轉頭以為只係俾咗四十，想用張一百叫我找番九十。攪咗一陣至明發生緊咩事。我想話，收多咗嗰十蚊又唔係我嘅，況且，博俾人鬧咩。
　擺明係大陸落來嘅女人，竟然話要買兩期MK6．．．都唔知係咪路，無佢咁好氣，叫佢今期開咗之後再來買。負責睇我嘅後來話，應該sell 佢買五期嘛。算喇，話唔埋佢根本等唔切，要趕住返大陸；或者直頭唔夠錢呢。
　中途點出來個數好好意頭:$28,880.00。
　收工。一諗到份糧，就覺得應該更加努力地工作。
24/05/2005

※23/5隨影

　真係俾個天玩死，本來諗住出去行吓嘅，但係見到落咁大雨就諗住算喇，唯有留喺屋企睇埋集星球大戰。之後竟然又好似尋日咁鬼死好太陽，無理由就咁（口歨）咗d 陽光（口架），於是又去咗屯門。不過完全係熱到溶咗，都好，終於知道要點樣充份運用部相機嘅功能，好耐未試過影嘢影得咁free。
23/05/2005

※21/5日記
　最近無論係有建設性同埋無建設性的胡思亂想都少了很多，應該是好事來的。嗯．．要在這裡多謝Kiddy，更加要多謝Sam。
　連續返咗幾日工都俾人「驅逐出境」，要企大堂。喺出面就free啲，入面就充實啲，不過，始終享受那不斷數銀紙的過程。
　名言摘錄：
　「（喺入面counter）點都叫做隔住塊玻璃吖。」
　「機器始終係機器，如果唔係駛乜我地企喺度。」
　今日返工連幾點鐘開跑都唔知，要𥄫啲客手上面份報紙先知。
　三甲同埋頭三隻大熱門往往由六隻馬組成，唔怪得之馬會可以出咁高人工請我地。
　最無聊亦最難做的工作是queue control。明明已經去到equilibrium，條條隊嘅長度都差唔多，都仲係要我走去叫人排入面啲嘅counter，玩咩。只要人係 maximizer，根本就唔需要我地去「趕客」。不過好多賭仔排隊嗰陣都係完全唔望週圍環境的。最攪笑嘅場面都係每場開跑嗰陣，counter 前面嘅人一哄而散，去哂後面睇直播。
　世界難撈，不過最無辜嘅都係，連掃地個啊姐都要俾人鬧。
　今日有個客，買完孖寶之後都唔知自己買咗啲乜，係咁追住我來問，雖然我已經非常清楚地解釋要等埋下一場賽果，神奇的地方是，佢自己竟然喺張飛度再畫過嘢，不過嘛，一切以機印為準，無分別的。
　大家都好好人，好睇我。

　只要聽到我話要讀心理，聽回來的反應好像都不離冷門和遙不可及．．．不是吧，睇吓收生成績就清楚得很。其實，真係n年前已經對心理呢科好有興趣，而且，以今時今日的世界而言，心理有問題嘅人隨時比無問題嘅仲多。
　同學錄篇嘢都唔知點寫好，畢竟呢兩年以來，出得街嘅感受係無乜嘅。想死。
22/05/2005

※開工大吉
　（這個是甚麼標題來的．．）
　是日心情不錯。第一日正式開工。
　一開始又係「罰企」，後來先至搵到人傍住我坐機。
　完全係做到無停。喺隔籬借咗五千蚊（係佢睇住我）開檔之後，啲錢不斷咁湧入來，特別剛開始時連做招牌動作的時間同埋空間都無。
　實際只係做咗兩個幾鐘，仲要以我啲咁嘅速度，都幫馬會淨收咗三萬八千幾返來，打咗705張飛。
　仲要整咗單大額交易，是入電話投注的。
　有啲客勁好禮貌咯，感覺到自己這時才真正有笑容。不過嘛，自問對客的態度已經很OK。但係有時講極佢都係聽唔到，一定要大聲啲咯，我大聲唔代表我無禮貌。
　起碼有幾個攞張大棉胎來買十蚊廿蚊嘅飛，真係激死，呢啲情況通常都會再加倍小心。
　就算淨係開Sell燈都要做埋Pay 嗰份。
　枝筆真係好重要，無佢就收得工，不過盒蠟依然未用過，純粹當紙鎮咁用。
　依家啲銀紙設計越來越不知所謂。連張五百蚊紙都金到好似金巴咁，攪到我差ｄ睇錯，以為係金牛；一係就整到灰灰黑黑，好心班人讀吓設計先喇！啲舊銀紙都不知幾靚。雖然我唔like 綠色嘅五十蚊同埋非常唔like 張玩具十蚊紙，但係起碼一定唔會認錯先吖。
　將兩張舊一百蚊紙據為己有。
　很好很好，最愛的還是：Balance 0.00。
　其實份工都幾好玩，就算不停咁收錢、找錢都唔會悶，好過之前嗰三日好多。不過大家好似聽到要自己計找贖金額都怕怕，還不是加減數而已．．我想，用計數機真的會比較慢。
　好彩，我應該係適合呢份工的。
　放咗工之後再影吓車先返屋企。
　明天繼續開工。
13/05/2005

※20050512 隨拍

Import 同埋 Entrance 的中文是一樣的．．．

　第一次搭有冷氣嘅天星小輪。
　「星光House」

13/05/2005

※DAY 7-9
　4月27號同埋5月5號嘅高考日記等我有心情先補番喇。
　不知怎的就成為了《防止賄賂條例》裡的公務員。
　呢三日都係喺counter 後面「罰企」，睇住人點做，真無奈。覺得自己同玩具舖d display 無乜分別。不過嘛，企喺度乜都唔駛做就有錢收嘅工，邊度搵呀，就算企成日都係咁話喇。
　第一日報到，就係喺馬會第一次俾人check 身份證之時，好在check 我唔係因為懷疑我唔夠十八歲。
　呢個世界果然係乜人都有。親眼見到有條友排隊嗰陣，舐完手指先至數錢，非常慶幸依家只係來「罰企」的。又有條友係d指甲係全黑ga咯。唉，到我開工嗰陣唔會遇到d咁嘅嘢啩。
　原來上堂時爛飛嘅case唔係作的，第一日就見識到，不過好似因為係幾張飛爛咗，再砌埋砌唔啱而攞唔到錢．．．
　好多人連填六合彩都填錯，唔係填咗五個字就係七個字，而且好鍾意用張複式飛來買單式，而且一來就幾張，真唔環保。
　這三日眼前不斷出現的就是錢、錢和錢。除了那些很新淨的舊銀紙之外，已經睇到麻木哂。不過自己嘅銀紙又係另一回事，產權這東西果然很重要。
　Day 8朝頭早同Sam、Z小姐、I小姐去唱K，大家都唱得很pro，而我的狀態比平時的不濟更不濟．．．嗯，不過聽說了一些對我而言很有用的資料。
　今日返到去就係簽約，竟然俾咗件supervisor嘅制服我，想升我職都唔駛咁快 ga。不過件嘢粒頸喉鈕勁難扣，還是低級職員的那件比較正常。
　有一兩個supervisor 今日開始「啊仔」「啊仔」咁叫我，有少少無奈，好在 Mina 上堂嗰陣已經俾足心理準備我地。不過嘛，親切感還是有的。
　「利是」指中國傳統習俗中在農曆新年期間派贈的紅包。←這句是從《員工守則》抄出來的，講到尾，都係無講到點解唔收得利是－咪就係因為入面「有餡」囉。
　明日影職員證後日正式返工，真係夠哂充實。

　呢個世界有d嘢，感受比事實來得重要。況且，有些時候，根本連甚麼才是真相都無法認清。Z小姐那段日記簡直就是我的心聲。

　《巴士都城 Bus Metro》相簿（測試中）:
　http://community.webshots.com/user/bus_metro
　真係好想就咁將d巴士相整哂落相簿度就算。
11/05/2005

※Day 6
　今日好多時間剩，去了利舞臺廣場的無印行咗一轉。
　又是來找死的，今日考試，但係所有筆記同埋個注數表都無帶，發生咗咩事．．．幾乎以為真係要用式去計，雖然那只是Maths & Stat 第一課嘅嘢．．．
　成日唔俾人畫份卷，馬會駛唔駛咁慳。於是，做BT 嗰份唯有出動了「秘密」武器－大間尺一把，可以逐行對住，費事睇漏。好彩最後個balance 真係零。
　波份卷竟然有30條MC，而且都比想像中容易。最無奈的，還是到底超過了 $4999.90或$5000.00才要通知supervisor。這兩份卷的銀碼部份都不期然加上了「.00」。隔離嗰位不斷話佢俾D英文玩死，唉，好心喇，呢D嘢，好基本(口架）咋喎，仲好意思話唔識。請留意，份卷係用中文出的，只是夾雜了一些英文而已。幾乎想反問「乜份卷有英文咩？」，仔細回憶份卷才收回了這句話。
　Mina 一開始就問咗我地兩條customer service 嘅問題，其中一條仲要我答，原來係貼士來的，一條喺第一題，一條喺最後嗰題。說起來，唔睇嘅話會唔識個「贏」字點寫。唉，自己的中文很差。
　當然是順利過關啊。Brief 我們的仁兄感覺上有點乸型，而且我地係最遲放嗰組．．．編了去某間投注站就是喇，地點當然要保密。
　買了相機。Nikon Coolpix 8800。明天試機。
　又去睇玩具，在旺角地鐵站見到長毛。他行在我前面在講電話。不過嘛，基本上我都唔會投票俾佢。
　到底是不是所有玩具舖都會有「鎮店之寶」－只有它那裡才有得賣的玩具？
04/05/2005

※Day 4 and 5：102
　有時發現自己也有一點點犯罪頭腦的。
　Day 4：終於有時間剩，沒有膽量再去試附近的茶餐廳，非常感動地以比平時更慢的速度品嚐了大ｘ樂的一哥焗豬扒飯。印象中，上一次吃這個已經是03年沙士後期，牛頭角下邨一區封樓前10 日，在淘大花園的分店。價錢貴了，但份量少了，過份。
　已連續兩天在時代廣場大電視下看新聞。
　第一日玩部BT(betting terminal)，進了馬場票房後，除了那部BT 本身外，亦發現了香港電話年代的攪盤式電話，而BT的機套依然是Royal Hong Kong Jockey Club，真經典。對呀，畢竟賽馬是英式玩意。
　現金券這種東西真有趣，甚麼東西都旨意它。不過，這兩天的training 實在浪費了很多紙張，特別是現金券，連sign on 和 sign off 都要用。
　做exercise的時候，犯了些很白痴的錯誤，明明要派彩變咗cancel 張飛．．要是真實情況如此一定會被鬧得狗血淋頭．．．
　這兩天的導師（Mina 叫佢做「B女」，但係明明最保守估計都超過40，一副很師奶的模樣，而且英文發音嘛．．．咳，不過，還是教得不錯的。）在示範製造 barcode error 時，部機偏偏讀到個barcode，要整幾次先做到。原來自己畫嘅飛成日因為畫得太大力而讀唔到barcode，今日開始輕手了，以免考試時會有麻煩。
　她亦說了一單IOU要賠錢的案例，並強調了案中的同事是一個「很可愛的妹妹仔」。
　中途有人解說新機的用法，不過講得快到連個Mon 有d咩都睇唔切，還是算了，聞說實習時會再教我們。
　超咗時幾個字先放，時間過得很快。
　話說今日個個都要執到正一正返去，於是唯有帶哂成套衫出去換，袋嘢重得要命，是應該去搭968而不是西鐵+地鐵的。
　跟小學同學們去唱K。成個禮拜都train，一定要發洩一下的。
　聰哥才厲害（雖然佢大我一個月都唔夠），已經有兩份工在手，將會有第三份。有點自愧不如，不過嘛，又唔係等錢駛，份工最重要係唔困身，但我又不太喜歡替人補習。
　我和Wing 姐的共同嗜好是三文魚。我想，對我來說，即使整晚只吃這個也可以的。
　嗯．．．現在一首歌對我來說，應該只能是一首歌。

　Day 5：今日的重頭戲是考數銀紙，亦是本篇標題來源。
　繼續玩部BT，mock 嗰兩份exercise 輕鬆地完成了。
　網主隔籬嗰位仁兄，連cash voucher 係咩都唔識，有點難以相信為何他可以坐在這裡。
　終於要考。一人派咗一大疊。沒有用他們提供的蠟，因為一直無用過，以免因為一時不習慣而影響表現。一開始即刻拆開佢做兩疊，數咗三張覺得唔多順，又由頭數過。有d「銀紙」已經用到好殘，條邊捲起變厚咗，攪到我幾驚係兩張。跟住數數吓先突然驚覺自己數咗咁多張，一到80張就開始減速，最後竟然數到102張！再加埋寫名及報數的一張，一共103張。
　當然合格嘛，真令人感動。
　跟住由「B女」扮顧客，逐樣嘢玩我地組人。見到別人犯錯時當然忍俊不禁，不過，唉，到自己時情況還不是一樣．．．很白痴，最後還將收1毫子當作俾1毫子，很不習慣它顯示「.10」而不是「0.10」。雖然兩蚊以下唔駛賠，但總不能這樣吧。唔怪得，「收錢」兩個字要做到咁大隻。
　高層人士真係無樣睇的。那個看起來沒事可做，經常在「遊蕩」而且很好人的，竟然是馬場的Senior ，很無奈。他還在我坐counter 時過來玩埋我一份。
　之後去了看相機和玩具。始終旺角的玩具舖可觀得多。網主不才，原來「水貨」一詞已被「日本行貨」代替了，細心想的話，又真有其道理。
30/04/2005

※Day 1-Day 3：生死時速－收錢
　終於可以暫時鬆一口氣。這三天忙得連正式看看「新聞紙」的時間也沒有。
　真意想不到現在要日日出入馬場。
　還是將這三天的東西綜合起來吧。馬會投注站的分區方法奇怪得很，鰂魚涌、柴灣竟然納入九龍東南；新界東卻包括樂富和九龍城；新界西就跟當年租借新界的「新界」範圍一致，對啊，連深水埗也是新界西。
　不知道其他人見我抄這些「無聊」的東西時有何感想。
　好像是第一日說的，不可以對客人說「多謝」，想起來又頗有道理，反正馬場跑道的草已經長得夠好的了。「輸」字就當然是大忌，要講「唔中」．．．中文詞彙真豐富。
　原來做咗馬會員工真係唔可以買馬同賭波，不過六合彩除外。還是算了吧，反正我要罷買。
　第一日講馬，事前經過父親大人一輪解說後，就覺得很容易。那些計注數的 formula，不就是combination 和 permutation 嘛，不明白為何大半班人都說難記。
　開始教數銀紙，一分鐘要有84張，一直很怕這項會不合格，好在今日總算證實了問題不太大。
　每日上堂和放學前要做那招牌右手舉高四十五度角邀請客人的動作，再加一句「先生／小姐你好」。Mina（就是train 我們的導師）總是說我「講得夠大聲，好好／我鍾意」，不過自問只是用了標準音量．．．這也算是優勢之一吧．．．
　連續三日都可以提早散場。
　第二日朝早攞咗隻硬碟去沙田換。反正40X 和43X都可以去到，也就沒有深究路線。上43X是因為車型問題。去到沙田市中心，發現部40X塞咗喺上橋位度就好心涼。咳。
　不過落車時兜咗個大圈先搵到路去目的地。上到去，條友想test吓隻硬碟，不過佢仲要慢慢逐樣逐砌落底板．．．好想X佢，後來話趕時間先即刻攞隻新嘅俾我。唉，正常人都唔會攞隻正常嘅硬碟去換喇，貪好玩咩。不過到依家都無時間裝返落部電腦度。
　搭680出去，結果又行咗個大運。行觀塘繞道嗰陣，當年仍有飛機升降的跑道的影像浮現起來。香港變得太快了，而且往往越變越不堪。第一次搭巴士行東隧。
　開始唔夠時間，求其搵間茶餐廳食就算，點知．．．等咗成兩個半字碟飯先到，都唔知有無攪錯，而且又唔好食得去邊，發誓以後唔幫襯。發現帆船隨時成枱人未落齊單已經有得食的服務是一流的。唯有用兩個字食哂碟飯，再半行半跑的在最後兩分鐘趕到．．．真險，而且這天開始要簽到！這對網主來說已經是極限中的極限，趕得要命。無法理解某些同學吃飯速度是網主的雙倍（甚至三倍），卻遠比我輕鬆。真無奈，是不是香港式的生活節奏不適合我呢。
　份馬仔測驗比練習更容易。
　今日只係瞓咗4個鐘左右，不知怎的又失眠。
　今日（27號）朝頭早考Maths & Stat，唉，唔好提，今次玩完。遇到梁生。
　今日穿的桃紅色T-shirt感覺很不錯，雖然我更喜歡紅或橙的色系。
　又吃了M記的買一送一。
　馬會的賭波規例有點兒不合理，怪不得常引起客人不滿。不過，不合理得來還是自成一套系統而一致的，起碼唔會佢鍾意就派彩，唔鍾意就「釋法」釋到賽果無效為止。
　開始講counter 部電腦，Mina 說這部份會比較悶，但我覺得講波同馬更悶。
　原來部電腦係有中文字的，不過只有兩個非常大隻的字：「收錢」。而派彩時只有一個很低調的，向上的箭咀。馬場那款很有80年代feel，好想睇吓聽日有無可能影佢相。
　咁就返咗三日。仲未返工已經覺得頗為吃力，不過，為了買玩具，怎樣捱也是值得的吧。近來也冷落了它們，所以今日終於用咗大半個鐘幫佢地執位。對呀，要不如此辛苦幹嗎？真的是純粹為了工作經驗嗎？
　唉，世界難撈。
28/04/2005

※第一次「互望」成功！
　「互望」者，interview也，對呀，你望我，我望你。
　說起來，是第一次去見工。沒有辦法，兩年前唔等錢駛，依家要搵錢買玩具。要說得偉大一點的話，就是為了促進香港經濟和提高GDP。
　本來以為，排期面試也要好幾天，不過，尋日打電話去預約竟然今日（19號）就要我去見。勁無奈，但係無理由縮沙（口架）！份人工實在太吸引。
　先去了太原街睇玩具，不過今日無乜嘢特別吸引到我。
　然後當然是跑馬地馬場。足足繞場一週才到達目的地。
　上到去先發現好熱鬧吓，攞咗張申請表填之後，足足等咗個幾鐘先到我．．．等都等到霉霉地。
　其實我連自己申請職位個名都唔係好清楚．．．只係知道喺投注站度開工。
　馬會的英文水平．．．唉，竟然將"by-law"寫成"bye-law"。
　嗰度真係乜人都有，有ｄ都唔知係咪來見工嘅。有人淨係帶咗張會考成績通知書，但係張嘢上面寫到明唔可以當會考證書咁用，咁即係唔係有效嘅學歷證明喇，唔知嗰位仁兄咩下場呢。又有人將張申請表捲到好似魷魚咁，網主連摺都唔敢摺。坐我後面的，更加可以聽歌大聲到我都好清楚聽到。這樣一來，跟九巴一樣地喜愛金色倒不是甚麼大問題了。
　同一排遠處好像見到有人在溫Bio。又係今日見工後日考試．．．
　當然也有全套西裝執得好正的。
　終於到我。他看了我的cert之後，話「你成績都好好喎。」。慶幸那張東西仲見得吓人。這是我第一次感謝考試局俾咗呢張嘢我，雖然這是應得的。原來唔駛睇leaving cert，等我仲帶埋去。不過佢竟然要睇我學生證。
　第一條問題，你從甚麼途徑得知今次招聘。真係估佢唔到。
　預備佢會問的例牌問題只問了一條：你點解申請呢份工。
　真心話：就係貪你人工夠高。
　真回答：可以見識人生百態（這倒是真的，單是今日也見識了不少）。當然也 sell了自己怎樣適合這份工作。
　第二條問題都估到，情境題，答案當然行貨得來也很得體。
　問題都比想像中易答。仲以為會問吓「幫襯」馬會的密度。
　接著是測試。淺到令網主呆了一呆。中英文句子照讀，和用中英文讀數字。害網主我都很仔細去數零頭，以免眼花睇錯。奇怪的是沒有國語。不過．．．到用計數機計加數嘅時候．．．某人將十萬零三入了做一萬零三．．．白痴的，幾驚因為咁而唔請我。
　第二部份，電腦測試。攪咗好耐我先至做到。其實都很易，但一定要很小心。特別是入數字的，你打一個字佢先出下一個字，仲要無得用backspace更正。
　到最後，有得training。令人感動，可能係張cert 救咗我一命。但係，要6日都去返跑馬地，真要命。那個人（另一個來的）填training紙時，將Tuen Mun 變了做Tuen Wan。無言，但寫在他紀錄上的卻沒有錯。
　現在當務之急，是學懂如何賭波和賭馬（咳咳），以前沒有想過，這會變成「工作需要」。「教材」嘛，要自己去投注站拎。去到時代廣場附近的馬會，拿「筆記」時，才意識到原來有很多人跟網主一樣，in完就來攞「筆記」，那位職員還非常好人地多找幾份給我。
　賭波合法化是少數網主支持政府做的事之一，因為這是一個自由社會所必需的。只是，現在應該要反悔了．．．因為，單是波飛也有十六種不同款式的！天呀．．．
　今期六合彩，連半個字都唔中，決定暫時罷買！
　結論：要賺馬會的銀両，一點也不容易啊！
20/04/2005

Hosted by www.Geocities.ws