|
Billy Lau Ho-Him's Home Page |
|
Home |
英國之旅 (85年 5歲)
表姐 84年,與我同住婆婆家中的表姐移民英國. 她父母本已在歐洲生活/工作了一段日子,那年,他倆的生活穩定了,有了自己的餐廳,就把女兒接回英國.
據說,每個BB都有自己的一套BB話,係冇人識聽. Billy小時侯都有一套屬於Billy的BB話,係只有我表姐識聽. 聖經話,講方言的一定要翻方言. Billy小時侯有講方言的"恩賜",而我表姐卻識翻方言. 我Daddy成日懷疑表姐係唔識翻,係老吹.所以,每次當我表姐翻完之後,我Daddy都要我confirm,但我總是點頭稱是.
同表姐生活了兩,三年,大家感情非常要好. 有一次在某餐廳食飯,有個伙記見我得意,"met"我塊面.我是個很純,或者說:是個很鈍很膽小怕事的人,任人魚肉.表姐見到就非常生氣,居然拿枝鉛筆篤翻個伙記.
中午,當婆婆落街市買0野,或者她在廚房煮飯,表姐帶我去偷餅食. 我倆個唔夠高開櫃筒,要擔凳仔.但因為我忍唔到笑,結果比婆婆發現0左. 之後我表姐學乖了,佢叫我想食餅就唔好笑,偷餅才成功得手. 婆婆發現D餅幾日之間少0左好多,又冇人食過,開始生疑,以為有老鼠. 於是,終於再次比佢捉到偷餅食果兩隻大老鼠. 佢0地話,要食可以問大人,唔洗偷,怕我0地擔凳仔跌親云云. 此後,我0地有冇再偷0野食就唔記得了.
表姐離開我的那天晚上,我好唔捨得. 我半夜醒來,發覺唔見0左表姐,但又唔記得表姐已經走0左. 於是我起身在屋中走來走去,尋找我的表姐.(有點似雅歌第三章的情節) 天亮的時侯,婆婆發現唔見0左我(真係唔見0左),原來我訓0左出廳.
(我係個後知後覺的人. 例如訓醒仲以後自己訓緊教; 畢0左業個多月先知道自己原來畢0左業; 信0左主之後幾個月我先知道自己原來信0左耶穌, 教0左主日學成個幾term先知道自己原來教緊主日學etc. 有時我問神: 死0左,又能唔能夠後知後覺呢?)
探望 85年暑假,我跟媽咪去英國探望姨丈,阿姨同表姐,共四十日. 這是我第一次坐飛機,飛機在印度新德里機場停站,由於某些原因,飛機餐要等到飛機在印度重新起飛才有得食.我當時極其飢餓,一直靠飲奶奶為主要食糧的我,食晒份飛機餐所有的"差"飯,飯太少,食完都唔夠,由果陣開始我就鐘意食飯. 事後,我媽咪話其實D飯好難食.都好,訓練我日後生米,紅米,"牛"米都覺得好味,唔會太揀擇.(關於食飯,米的歷史及文化,Billy會在<<滋味篇>>中有更詳細的分享.)
我在機上走來走去,記得當時識0左兩個大哥哥(我想應該有廿歲),佢0地話自己有透視眼喎!另外坐我隔離位是位叔叔(媽咪話佢係阿伯,唔係阿叔喎!),我同佢傾計,因為經常睇教育電視,所以我同叔叔講番D內容:天文地理,科學歷史,乜都講下. 最記得果位叔叔同我走到救生門的窗口處望雲,佢話比我聽,我0地依家在希臘上空飛緊喎!當時我覺得果位叔叔好叻,我淨係望到D雲,點解佢知道係希臘呢? 媽咪卻呼呼入睡,訓到不省人事.
去到倫敦機場,叔叔教我走綠色通道,如何過海關同轉機. 後來,媽咪話個阿伯好得意,教個細路點行,個大人反而唔教. 無論如何,如果個叔叔唔教我0地,媽咪係個認路白痴,肯定會迷路. 轉機要座巴士由一個terminal去另一個terminal,有個外國人叔叔讓0左個位比我0地坐,之後發生什么事就不得而知,因為我講0左成日0野,太累,訓0左. 忽然想起一句話說:「你或向左或向右,你必聽見後邊有聲音說:“這是正路,要行在其間.」(賽 30:21) 感謝神,無論我往那裡去,衪都指引.
到了利勿蒲,阿姨有間前鋪後居的take away古老大屋. 有一次,阿姨帶我0地去屋企附近的遊樂場.(可能係好遠,但係我總覺得是在屋企後面果條街.)記得果度有個用紅繩紮成的塔子,供小朋友攀爬. 我爬了幾步就唔敢再爬上去,但是媽咪係都要我爬上去,話要比D信心自己接受挑戰云云.(多年以後,我可以肯定一件事,如果我翻唔到落0黎,媽咪自己係定救唔到我.)
人生都係一樣,我們比信心自己,接受挑戰,越爬越高,但係無論你爬到幾高,你都要爬番落0黎,咁又有七為呢?所以,唔好係又爬,唔係又爬. 但另一方面,今日我們做事又的確太容易give up,爬的目標對,就算跌倒,又或者遇到困難都係好.我們可能在不同的處境下攀爬,卻同有一個目標,就是基督.
除了利勿蒲之外,我們去過蘇格蘭,有個叫「養哥」的叔叔接待我們.他的兒子叫「聞道」,跟我同年,是個非常反斗活潑的小孩.七年之後,他來港一遊,曾相約去吐露港公路騎單車,久別重逢,居然是個溫文安靜的少年,如果現在再相見,佢又變成點呢?只怕他記不起我了. 離開英國,沒有坐內陸機,是姨丈車我們去倫敦. 印象中,在倫敦只停留了半天,經過某卡通片曾經提及過的大笨鐘. 還記得去了一間唐餐館食午飯,我同表姐搶食叉燒包同酸辣湯,搶得好好味.返香港之後,唔洗搶,酸辣湯就冇咁好味了.
決志 在英國,我們跟了阿姨番屋企對面街的華人教會.(應該真係對面街,又好似唔係,anyway.) 我返兒童主日學,講攻打耶利哥城,繼耶穌降生的故仔後第二個聽到的聖經故仔. 當時,媽咪,姨丈同一個租住在阿姨家中的留學生 - 迪哥哥三人同心立約:「三人同心互相守望�,誓死不決志信耶穌.」 番教會番耐0左,媽咪這個"決心"都慢慢動搖了. 就在這個時侯,邪靈開始攻擊我媽咪.
原來,媽咪年輕時經常玩碟仙. (一種用碟,紙同筆的交鬼術,要占卜未來未知的人事物) 又因為佢想生BB,卻多次小產,於是她求個泰國佛. 後來,我就出世. 所以媽咪經常被鬼魘,又被鬼弄損手腳. 現在媽咪要決志信主,邪靈的手段當然更加厲害啦! 媽咪覆述,那日她比鬼魘,她於是呼叫說:「主啊!救我.我奉主耶穌的名,吩咐你離開!」 這是教會的弟兄姊妹教她的,結果真係洗得. 從此,她再沒有被鬼魘以及被鬼弄傷. 那年暑假,媽咪,姨丈同迪哥哥亦先後接受了主耶穌為個人救主,與及生命的主了. 迪哥哥後來同表姐拍施,於2003年6月結為夫妻,做0左我表姐夫.
在離開英國之前,我同媽咪跟阿姨一家去了福音夏令營. 個夏令營講乜我都唔識,識都唔會記得. 只記得一晚,應該係類似天才表演的program.我同阿姨,仲有個姐姐做skit - 該隱同阿伯的故事,我扮果隻羊.那是我第中T個聽的聖經故仔.我知道自己快要返港,於是在令會裡面,遇見任何人,識同唔識都講聲:「再見!我要返香港....」攪到個個人都去擁住我媽咪,佢每次提起呢件事都話我唔應該乜都同人講.但係這正是我的性格嘛!
原意 多年之後,Daddy Mammy講起這次旅行,原來唔係為探訪. 媽咪本來想同我留居英國,留番daddy在港. 後來由於學校方面認為我太細,要一年後才讓我入學云云.爸爸又有急電要媽咪立刻返港,才打消了這個念頭. 無論如何,神籍著這個機會讓媽咪信主,又讓我對佢有一點認識,經已是最大的恩典了.
|