Billy Lau Ho-Him's Home Page
Email address: [email protected]

得救見證 @ 講台 - 05/16/05

這是 Billy 植堂後, 在福音主日分享的得救見證, 唔經唔覺, 離開浸禮那次分享已七個年頭, 同一件歷史事實, 經過七年又有冇更深一重體會呢?

一向以來得救見證似乎都是為未信的會眾度身訂造. 如果放低九十九隻羊去尋找一隻迷失的羊係你的使命, 咁負責幫你看住果九十九隻羊的人就一定係我的負擔.

Focus 唔同, Sharing 自然都與別不同, 希望大家多多包函, 因為呢個得救見證係為你, 為巳經信左的你度身訂造.

素問

1985年, 即係幼稚園畢業果年, 我跟媽咪去英國.

同媽咪一齊係某個福音夏令營裡面舉手決志信耶穌.

你話幼稚園就信耶穌, 咁細個, 明唔明自己信 D乜呀?

唔好睇小一個幾歲的小朋友.

耶穌都話人要回復小孩子的樣式, 先可以進入天國.

信主之後, 有返教會, 崇拜, 主日學, 讀經, 祈禱, 直到小學畢業為止, 都斷斷續續咁 keep住.

直到1991年, 我 Daddy亦接受埋耶穌做佢個人救主.

(奇怪是: 到今日仲有人為我 Daddy信主祈禱, 佢講「阿們」果陣, 我唯有講「哈利路亞」啦!)

不過, 讀完中一之後一直到大學二年班, 一段好長的時間, 整整五年 冇返教會.

問題出係邊呢?

我信呢個世界有神, 我有罪, 耶穌愛我,

佢為我死, 佢復活, 佢係神, 只要我信佢, 以佢為主就得救.....

呢 D我都冇問題, 我一直都信.

就<<與神和好>>的「義」說: 我的得救是無可指摘的.

<<與神和好>>話呢個信仰能令我有赦免, 有平安, 有永生, 有豐盛生命.

赦免同平安比較講 feel, 因為睇唔到;

永生? 幾廿年之後先發生, 你話你有永生? 我都有, 邊個知呀?

嚴格來講, 真正睇得到就只有豐盛生命. (如果真係有的話.)

(Billy 從來唔諗信仰問題, 幾千年都答唔到的問題, 何必花時間諗? Billy 只會諗聖經同生活問題. 以下問題對於信左又或者末信的你, 同樣有反思價值.)

問題係: 乜野謂之「豐盛生命」呢?

豐盛係咪指每個禮拜返下崇拜, 去下團契, 傳下福音?

如果「豐盛」係同我返工返學冇關, 純綷係教會四道牆入面的事, 咁又係咪豐盛呢?

如果話信主前的生命係黑色, 信主後變做白色, 咁係咪就係豐盛呢?

白色變黑色令我諗起美元髮釆, 黑色變白色令我諗起米高績遜.

米高績遜生命唔見得有幾精釆, 美元髮釆又係咪真係冇得彈呢?

同樣, 做個好人唔見得會開心 D, 一個人無罪又係咪真係一身輕?

將世界描畫成黑色, 白色又或者係灰色, 人生又有幾精「彩」呢?

我中學果時, 唔返教會, 日日就掛住打機同睇武俠小說, 又唔讀書,

因為我覺得讀書多, 成續高好似冇乜用, 合格咪 ok lor. 返教會做乜, 得救咪 ok lor.

我又唔覺得教會幫到我解決生活問題, 亦幫唔到我生活得更精采.

至真要篇

1997年, 移民加拿大, 入大學第二年.

開始返番教會, 點解無啦啦又肯返教會呢?

最主要原因係因為報大學的過程當中, 有教會弟兄姊妹, 三唔識七, 但肯幫我;

加上我報 1st year, York 收我 2nd year, 我覺得呢個係神幫我, 所以就返番教會.

但係返番教會又唔代表生命更精采, 呢個只不過係個開始....

我當時諗:「我以前胡呢胡塗信到一舊雲, 今日開始要認認真真, 如果唔係, 返教會都係浪費緊時間.」

於是, 我開始刨聖經, 想知道自己信緊 D乜, 同埋究竟呢個信仰可唔可以令我生命更精釆.

如果唔得, 即係話呢個信仰係度吹水, 早走早著, 何必阻大家時間呢?

當時刨聖經遇到無數攔阻, 嘲笑與批評.

面對各方的衝激, Billy 沒有為自己辦護, 只是口軟心硬的把每日讀經數量加快.

神卻用約書亞記鼓勵我:「你去到幾盡, 我就撐你撐到幾盡, 唔洗理其他人, 總之搏命去啦!」

以前我讀中學, 懶到死, 成日驚會肥佬, 大學一年班開始發奮(仲未返教會).

成績由差幾分就唔合格, 跳到差幾分就爆燈, 都幾大對肶嫁!

但係讀得好辛苦, 個人極度精神緊張.

記得果陣每次考試, 成本書起碼讀五次先敢去考, 考果陣太緊張,

不斷無病呻吟, 幟幟復幟幟, 咁難識唔識, 做卷怕唔明, 做卷怕唔識.....

又鐘意係唔係, 不停咁拍枱拍櫈, 一住考一住拍,

好似黄飛鴻打<<將軍令>>咁 - <<拍住上>>.

每次考完試都好似去焗一身桑拿, 出完一身冷汗, 成隻醬鴨咁.

講起來又奇怪, 刨聖經令我讀書 relax左好多.

Relax到一個乜野乜步呢?

話說我有次去 library讀書, 遇到一個朋友同我講:

「Billy, 我留意左你好多次. 點解你可以笑住咁入 library, 邊得你讀書咁開心嫁?

所以我見到你來 library, 同你一齊温書, 我都會開心 D. 」

耶穌話:「凡勞苦擔重擔的人可以到我這裡來, 我就使你們得安息.」

不過, 成績好又如何? 周街 A仔A女 有一籮籮, 幾十車啦!

(我地身邊同教會裡面亦有唔少人, 唔聲唔聲, 成績高到近得人驚.)

一個人可以 relax又點? 大把人都得, 咁就算豐盛生命?

我諗: 安息係第一步, 好似學揸車, 要舞惦盤軚, 車裡面D野用得惦先至學睇交通情况, 學點同外面個世界溝通.

講番句公道說話: 我唔想誤導你以為信左耶穌就一帆風順.

Billy 信左耶穌之後, D成績冇高過, 仲跌左 +/- 10% 添.

感謝神係: 到 grad果時分數係低左, 但名次都冇變, 依然係三甲不入.

(廢話! 鬼唔知.)

生氣篇

大學四年班, 臨 grad果陣讀左科 ADMS 3900 General Management, 要做 group work.

六個 group members, 總共要交三份 projects.

第一份 project 就比阿蛇話我地抄舊卷, 點算?

原來負責Edit 同 submit project 果個 group member,

唔知點解, 將我地做果份 projects mixed with 份舊卷的其中一 part(佢負責果 part)交上去.

個 mistake到佢 submit之前果一分鐘先比我同另一個仲有聯絡的同學仔發現.

太遲啦, 乜辦法都諗唔到就交上去. (博大霧都唔好咁揚, 都冇霧, 博炒就得.)

要知道在大學參考舊卷冇問題, 但係抄襲就有可能被踢出校.

抄都算, 你唔好比人覺得你低能到連份舊卷上面個舊名都唔改咁懶嘛!!

我係阿蛇都 「No你」啦!

當阿蛇問我地有冇抄舊卷, 果位同學仲係第一個同埋最後一個去講大話同抵賴, 死口唔認.

最後唯有我地其餘五個 group members代佢承認錯誤.

感謝神, 阿蛇好人, 冇報上校方我地先唔洗比人踢出校, 淨係扣分.

果晚我搭巴士返屋企, 我同神祈禱. (你估我講乜?)

「父啊! 赦免他們; 因為他們所作的, 他們不曉得.」

(當然唔係!)

我同神講我真係好嬲, 呢種人又懶又唔負責任同唔認錯, 都算!

累人累街妨, 差 D 害我比人踢出校, 應該比人捉出去打, 係咪?

我同神講我見到佢前面就憎到佢後面, 恨不得打完心口打背脊.

我又求神保守我同果 group人, 唔好再行差踏錯, pass到, 又畢到業.

神係聽禱告的神, 佢喜愛人內裡誠實, 唔係扮乖乖.

祈完禱之後, 我內心果種忿怒得到釋放, 居然唔再嬲果個人.

好似大衛, 在詩篇鬧掃羅鬧到狗血淋頭,

到佢有機會報仇, 居然肯放佢走, 難道又因為佢扮乖乖么?

當然唔係!

(呢個經歷令我更明白同體會詩篇同撒母耳記, 真正的敬拜唔係唱歌仔, 係心靈和誠實.)

大惑篇

不過, 忿怒和猜疑環繞著其餘五個 group members 的心,

每次開會都各懷鬼胎, 狗咬狗骨, 嘗試尋求他人的「犯罪證據」, 除左我.

結果, 我成為每個人唯一信任同肯順服的人, 變左揸 fit人.

因為 group work 要互相比分, 結果大家互插比低分人地, 抬高自己, 除左我.

結果, 我就成為全班第二, 高過其他所有人.

(如果唔係 1st project冇左 D part mark, 理論上我應該可以全班第一.)

Again, 冇比人踢出校, 已經感謝神.

全班第二點講都唔算 amaze.

最 Amazing 係:  我從來冇諗過我第一份工係咁樣得番來.

但原來咁都未夠 amaze!! 我爹地媽咪以前好反對我讀經同返教會.

因為呢個經歷令佢地改變過來, 之後周街同人講 Billy點經歷神,

直接同間接咁帶左許多親朋好友返教會同信主.

好多人話: 「著鞋唔著襪, 就大方兼老實; 忠忠直直, 反而實聽乞食.」

但係耶穌話:「溫柔的人有福了! 因為他們必承受地土.」呢句說話我經歷到.

一個人可以relax咁<<上帝聽禱告>>和<<原諒>>, 仲有高分同埋找到工作, 全家歸主.

咁樣的人生算唔算精采/豐盛呢? 見人見志啦!

但係, 如果你咁就滿足, 咁你就太低估神, 太低估自己.

因為聖經話: 「神為愛他的人所豫備的是眼睛未曾看見, 耳朵未曾聽見, 人心也未曾想到的.」

耶穌話:「跟從我的人沒有不在今世得百倍, 來世得永生.」

呢句說話你信唔信呢?

以前我讀書淨係顧自己, 一個都幾正常的反應, 見到人地成績低過我就開心.

神令我個人 relax左之後, 對分數冇以前咁執著,

願意幫身邊識甚至唔識的同學揀科同讀書.

大學唔易, 自己走過一段, 幫到人扶下人, 自己亦開心 D.

三年大學生活正因為肯幫人,

令我最後得到唔單止係一張沙紙同埋一份見工冇人會 care的 transcript.

而係一個開心喜樂的校園生活, 同無數個美好的回憶及友誼.

主耶穌話:「施比受, 更為有福.」係真!

直到我離開校園三年, 我的名字還在一班師弟師師姊當中提及,

一個平凡的生命卻影響左唔少人的生命,

係度果陣影響, 估唔到走左之後都仲有影響力.

係因為我成績高? 定還是生命活得夠精采呢? (我唔排除成績高係一個因素.)

又有邊個會想到呢一切一切都皆因一個既簡單又容易, 每日持守的讀經生活, 與神同行的親密關係呢?

結語

2000年 8月 9日, Billy考完最後一科, 大學畢業.

14日, 正式開始在加拿大第一份工作, 工作裡頭的挑戰和衝激都遠比讀書大.

Billy在主裡, 在工作上同樣經歷了許許多多的恩典和神蹟, 是無法一一記在這篇見証當中.

「但記這些事要叫你們信耶穌是基督, 是神的兒子, 並且叫你們信了他, 就可以因他的名得生命.」

back to youth