|
Billy Lau Ho-Him's
Home Page |
|
|
2004/11/28 Sermon Hebrews 13:15
「我們應當靠著耶穌、常常以頌讚為祭、獻給 神、這就是那承認主名之人嘴唇的果子。」
提起頌讚和感恩, 令我想起八月去温哥華旅行的經歷. 今年八月, 我和Daddy join 了萬通旅行社橫跨東西兩岸的九天團, 有趣是: 同團的團友都是上了年紀的公公婆婆和退休人仕, 原來佢地成班都係日日去世紀皇宮跳舞的舞林人仕, 今次約埋一齊「闖蕩江湖, 行俠扙義」, 失敬, 失敬!! 每朝早, 旅遊車出發, 要去另一個遙遠的景點, (世紀皇)宮裡面為首的魏公公(今年己經七十幾, 真係真人不露相, 露相不真人)都會出來教所有團友做運動, 在做運動之前, 魏公公都會講一大堆感恩頌讚的說話:
好犀利, 可以講足幾分鐘. 又帶領所有團友一齊叫感謝的口號, 一齊鼓掌, 一齊唱歌... 原來魏公公未來加國入(世紀皇)宮之前, 係在台彎做教官, 唔怪之得佢不怒自威, 自有一份難以抗的感召力.
呢個經歷點解咁深刻, 除了因為感恩頌讚令每一個團友在旅途中增添不少歡樂之外, 仲因為那班宮中, 感恩得最真誠和懇切的舞林人仕, 全部都係佛教徒, 而唔係基督徒. 令我覺得更迷惘是: 唔知幾時開始, 我聽弟兄姊妹閒話家常, 有理冇埋都喜歡用一個口頭蟬: 「我唔開心!!」 點解教外的人講感恩, 我地反而講唔開心? 角色係咪亂左呢? 我地唔係成日話人冇指望, 話人失喪? Negative的說話, 如果純屬講笑, 會唔會失見証, 將絆脚石放在瞎子跟前呢? 如果係真感受的話, 又係咪真係咁慘, 老是要將這些負面說話掛在口邊, 以博取多一份同情和注意呢? 「常常以頌讚為祭、獻給 神.」如果唔記得, 又或者, 真係諗唔到有乜好頌, 每日逼都逼 D出來, 都好.
另一方面, 經文話這個頌讚是要靠著耶穌而發出的. 好似冇乜野, 頂天經地義, 但諗深一層都發覺唔妥. 唔知大家有冇朝早聽王桂林的<<自我增值全攻略>>, 其中有一集話, 一個人如果每朝起身都同自己講 D positive 說話, 無時無刻都為生活感恩 (那怕你係基督徒定係胡呢胡塗), 工作效率都會勁D, 積極D. 類似的究研比比皆是. 亦即係話, 人唔需要靠著耶穌的頌讚都會產生神奇果效, 咁點解聖經話要靠著耶穌呢? 靠著耶穌同唔靠耶穌的頌讚又有乜野分別, 以致我地的感恩頌讚可以從不信的人中分別出來, 蒙神悅納呢? 如果我地相信感恩係要「靠著耶穌」, 咁在日常生活當中, 乜野謂之靠著耶穌的頌讚呢?
聖經話「頌讚」係是那承認主名之人嘴唇的果子, 原來頌讚有其賞賜, 是唯獨歸給「那承認主名之人」. 也就是說, 感恩頌讚除了自我增值, 令人積極D, 開心D之外, 有一D野係唯獨賞給那些「靠著耶穌」和「承認主名」之人的, 咁 who is 「承認主名」的人呢?
一大堆問題通通可以用最膚淺的 model answer答晒佢, 但係聖經係咪真係咁膚淺呢? 神的話語點先可以藏在心裡, 以致我們能在生活中自然表露出來呢? 我想其中一個要點, 就係唔好太快接受一個 model answer, 即使那個 answer come from 牧師, 傳道, 如果我地唔晝夜思想, 個 answer 永遠都唔屬於我地; 如果我地唔上心, 個心都唔認同唔相信, 點行到出來呢?
|